Ipilipin 2 - Ebaibuli

¹ Aso arai ejai aitalakar kotoma Kristo, arai aiyamakina naka amin, arai eidicane loka Emoyo, arai aisioni ka aitim,

² kitodolete akaiyalama, tetere iwomitos adiopekirot, ijaas kamin adiopet, luka emoyo ediopet, iwomitos nepepe.

³ Sirikiswamata akirot kere kanuka aŋolopa, karaida eitur atai, dimarai kaitasono ŋinituŋanan kitopoloorite aupake, itia ŋes ilopet.

⁴ Kinyek ŋinituŋanan asesen nuke bon, konye nuka luce da.

⁵ Koomitos yesi kotomakus, kwape aomitor Kristo Yesu,

⁶ lokejai einono loka Edeke, komam imarakina arianakin ka Edeke araun ibore yenimariauna,

⁷ konye kitisilikin, koyaŋaa einono loka ebulesit, kouriai toma aput naka etuŋanan.

⁸ Abu kotakan ejaas kasubunet bala naka etuŋanan, kitasonikin, korima kiton atwanare, atwanare da naka emusalaba.

⁹ Ŋes etopolooria noi Edeke ŋes, koinak ŋes ekiror ŋol loitelekarit ikiroria kere,

¹⁰ tetere ekukonokini ŋinikuŋ ekiror loka Yesu, nuka akuj, ka nuka akwap, ka nukokwap kakwap da;

¹¹ ido kolimonori ŋiniŋajep ebe Yesu Kristo ŋes Ejakait, kitopolooritete Edeke Papa.

¹² Aso, luminanaka, kwape ipotu korimanariata apaarasia kere, mere naajaar eoŋ bon, konye aitelekarit noi kwana naamamea eoŋ, kitodolenenete aitajariokus, kayoŋite ka amaran da,

¹³ naarai Edeke ŋes iswamai kotomakus, ainakin yes akot ka aswam da nuitoiokit ŋesi.

¹⁴ Kiswamaenenete kere komamei aŋurian ka epeget,

¹⁵ tetere iraas idwe luka Edeke luemamei aitoronet, luiyapaara, luemamei akemer kokidiŋ katur kanamagul, ka naepaarit, naitakaniata bala aica kotoma akwapin,

¹⁶ itodiarete akirot naka aijar, kasodi aolobob kapaaran naka Kristo, ebe mam abu kaker atai, karaida aitaaritoi atai,

¹⁷ Konye karaida kaabukokinio asubanit ka aijaanakin naka aiyuunikus, eyalama, ido eyalama nepepe kayes kere.

¹⁸ Kiyalamas yesi da kwaŋin, kiyalamikinos da nepepe keoŋ.

¹⁹ Konye amuno kotoma Ejakait Yesu aijukakin yes atipet Timoteo, kasodi atitiŋior kadau ajenun akirokus.

²⁰ Naarai emamei eoŋ icetuŋanan yeneriakasi kaŋes, loepodo noi ejautenekus.

²¹ Naarai ŋul kere emootos nukec bonik, kwabo mere nuka Yesu Kristo.

²² Konye ijenete akeiturio, ebe kwape ikoku kapapake abu kijaanakini Akiro Nukajokak nepepe keoŋ,

²³ Aso amuno aijukun ŋes atipet kadau ber aanyun nukadoikinete;

²⁴ konye amuno kotoma Ejakait ebe eoŋ da abuni atipet.

²⁵ Konye abu kaomit ebe kebusakinit aijukakin yes Epapurodito onaceka, loiswamai ka ejie da nepepe keoŋ, konye ŋes ekiyakiakus, ekejaanakinan da loka eipudika.

²⁶ Naarai abu kimuite yes kere, kokadakinite noi, naarai ipotu kiirasi ebe edek.

²⁷ Naarai abu kodekakin noi nepetai atwanare, Konye abu Edeke kitim ŋes, kwabo mere ŋes bon, konye eoŋ da, kinyek aiturur aiyatakin toma aitururuka.

²⁸ Ŋes akokakinia noi aijukun ŋes, tetere naianyuniata ŋes bobo, kiyalamikinos, eoŋ da iŋoŋar akaiturur.

²⁹ Aso kisukunyikisi ŋes kotoma Ejakait, kaiyalama kere; ido kitubusikis luikote kwaka ŋol,

³⁰ naarai aapiarit nepetai atwanare kanuka aswam naka Kristo, abu koluŋak akeijar tetere itodolikini nuemameete kotoma aijaanakinikus kamakaŋ.