Ilebin 23 - Ebaibuli

¹ Kotema EJAKAIT Musa atiar,

² “Kolimok idwe luka Isirael ebe, Ipucin lueseunitai luka EJAKAIT, luilimorete araun atukokineta nukalaunak, lupe lu kes ipucinoka lueseunitai.

³ Iswamaete aswam apaarasia akanykape: konye apaaran nakikanyetekaarei ŋes nakasabato naka aibworar, atukokinet nakalaunan; siriswamaete adioswam kere; erai nakasabato mama ejai EJAKAIT kaiboisiokus kere.

⁴ Lu kes ipucino lueseunitai luka EJAKAIT, atukokineta nukalaunak, luilimonorete kapakiokec.

⁵ Olap losodit, kapaaran nakitomonet kaoŋon naka elap eboŋ, ŋes aleleŋ naka EJAKAIT.

⁶ Kapaaran nakitomonet kakany naka elap kaŋol ŋes epucit loka imugatin lumam itubuunitoi mama ejai EJAKAIT: inyamenenete imugatin lumam itubuunitoi apaarasia akanykaarei.

⁷ Kapaaran nasodit itukonokinos atukokinet nakalaunan: siriswamaete aswam, naelaŋir.

⁸ Konye iinanakinete ainakinet naeinakinere kakim mama ejai EJAKAIT apaarasia akanykaarei: kapaaran nakikanyetekaarei ŋes atukokinet nakalaunan; siriswamaete aswam naelaŋir.”

⁹ Kotema EJAKAIT Musa atiar,

¹⁰ “Kolimok idwe luka Isirael ebe, Kidoloto yesi akwap nakainakini yes, isakete nuke da, ŋes konyet iyaŋauniata eisuta loka nugeet nuka aisakakus neejai esasedoti:

¹¹ Ijaŋi ŋesi eisuta kakonyen nuka EJAKAIT, tetere ecamunio kanukus: kapaaran naetupakini nakasabato ŋes ijaŋia esasedoti eisuta.

¹² Kapaaran naijaŋiata yesi eisuta, iinakinete imerekek yenikiliokit yenimam eŋwalit yenika ekaru ediopet araun ainakinet naicweio mama ejai EJAKAIT.

¹³ Ainakineteke naka akiria eraun iarei kotomon luka epa loka akiria nuidicic nuinyalakinitai akinyet, ainakinet naeinakinere kakim mama ejai EJAKAIT araun asakat naeuru saa: ainakineteke da namatat eraun naka ebino, idiopet kooŋon yenika ekin.

¹⁴ Mam inyamete emugati, karaida imomwa luikawooritai, karaida aluŋuren nukitetiak aitodol apaaran ŋipeŋin, aitodol naiyaŋauniata ainakinet naka Edekekus: erai ekisil lomam edaun anatar aturiokus kaiboisiokus kere.

¹⁵ Imarete yesi agear kapaaran naetupakini nakasabato, agear kapaaran naiyaŋauniata eisuta loka ainakinet najiaŋio; itodolete asabaton akanykaarei cut:

¹⁶ Imarete apaarasia akaisakany aitodol apaaran naetupakini nakasabato nakikanyetekaarei; iinakinete do ainakinet naka akiria nuka agwei mama ejai EJAKAIT.

¹⁷ Itolomunete kaiboisiokus imugatin iarei lujiaŋio luka iarei kotomon luka epa: eraunos luka akiria nuidicic, ipeete kes kaluitubuunete, araun nugeet mama ejai EJAKAIT.

¹⁸ Iinakinete imerekekin ikanykaarei ludidik lumam eŋwalito luka ekaru ediopet nepepe kimugatin, ka emoŋ lotobait, ka imerekekin iarei: eraunos ainakinet naicweio mama ejai EJAKAIT, nepepe kainakinetekec naka akiria, ka ainakinetakec numatan, ainakinet naeinakinere kakim, naka asakat naeuru saa mama ejai EJAKAIT.

¹⁹ Iinakinete da ekoroi ediopet araun ainakinet naka adiakaret, ka imerekekin iarei lukiliok luka ekaru ediopet araun asubanit naka ainakineta nuka ainapakin.

²⁰ Ijaŋi esasedoti kes nepepe kemugati loka nugeet araun ainakinet naijaŋio mama ejai EJAKAIT, nepepe kimerekekin luarei ludidik; eraunos lukalaunak mama ejai EJAKAIT luka esasedoti.

²¹ Ilimorete kapaaran ŋipeŋin; ejaun atukokinet nakalaunan mamakus: siriswamaete aswam naelaŋir: erai ekisilomam edaun kaiboisiokus kere anatar aturiokus.

²² Naisakiata yesi nuka akwapukus, sirikisakata cut agoria nuka emanikorikon, karaida aituk nuedepanara nuka aisakakon: inyeinia lukican, ka imoit: arai eoŋ EJAKAIT Ekusideke.”

²³ Kotema EJAKAIT Musa atiar,

²⁴ “Kolimok idwe luka Isirael ebe, Olap lokikanyetekaarei, kapaaran nasodit naka elap ejaun aibworar nakayamakina kamakus, aisiitunet naka aikut arupepen, atukokinet nakalaunan,

²⁵ Siriswamaete aswam naelaŋir: iinakinete ainakinet naeinakinere kakim mama ejai EJAKAIT.”

²⁶ Kotema EJAKAIT Musa atiar,

²⁷ “Konye kapaaran nakitomonet naka elap lo lokikanyetekaarei ŋes apaaran naka ailuc: eraun atukokinet nakalaunan mamakus, kitakadikis ikusitauon, iinakinete ainakinet naeinakinere kakim mama ejai EJAKAIT.

²⁸ Siriswamaenenete adioswam kapaaran kaŋin: naarai erai apaaran naka ailuc, aitulucio yes kakonyen nuka EJAKAIT Ekusideke.

²⁹ Naarai ŋolitau kere lomam itakadikina kapaaran kaŋin, egelario kotuŋake.

³⁰ Ŋinituŋanan da yeniswamai adioswam kapaaran kaŋin, agelari eoŋ ituŋanan ŋin kotuŋake,

³¹ Siriswamaenenete adioswam: erai ekisil lomam edaun anatar aturiokus kaiboisiokus kere.

³² Eraun mamakus nakasabato naka aibworar nakayamakina, kitakadikis ikusitauon: kapaaran nakikanyetekaoŋon naka elap eboŋ, agear eboŋ kiton eboŋ, idarete nakasabatokus.”

³³ Kotema EJAKAIT Musa atiar,

³⁴ “Kolimok idwe luka Isirael ebe, Kapaaran nakitomonet kakany naka elap kala lokikanyetekaarei, ŋes epucit loka iswamin adaun apaarasia akanykaarei mama ejai EJAKAIT.

³⁵ Kapaaran nasodit ejaun atukokinet nakalaunan: siriswamaete aswam naelaŋir.

³⁶ Iinakinete ainakinet naeinakinere kakim mama ejai EJAKAIT apaarasia akanykaarei: kapaaran nakikanyetekauni ejaun atukokinet nakalaunan mamakus; iinakinete ainakinet naeinakinere kakim mama ejai EJAKAIT: erai atukokinet nakayamakin; siriswamaete aswam naelaŋir,

³⁷ Ŋul kes ipucin lueseunitai luka EJAKAIT, luilimorete yesi araut atukokineta nukalaunak, ainakin ainakinet naeinakinere kakim mama ejai EJAKAIT, ainakinet naicweio, ka ainakinet naka akiria, ka asubanit, ka ainakineta numatan, ŋiniinakinet kapaaranike.

³⁸ Kogelara nukasabaton nuka EJAKAIT, kogelara da ainakinetakus, kogelara aiyaposiokus, kogelara da ainakinetakus nuka akot, nuiinanakinete EJAKAIT.

³⁹ Konye kapaaran nakitomonet kakany naka elap lokikanyetekaarei, kidaut atukonokin araito nuka akwap, idarete yesi epucit loka EJAKAIT apaarasia akanykaarei: kapaaran nasodit ejaun aibworar nakayamakina, kapaaran nakikanyetekauni da ejaun aibworar nakayamakina.

⁴⁰ Kapaaran nasodit iyaŋaarete araito nuka ikito luejok, atenuna nuka idukudukun, ka atenuna nuka ikito lueburok, ka ikito lukaguurut; iyalamasi yesi kakonyen nuka EJAKAIT Ekusideke apaarasia akanykaarei.

⁴¹ Kidarete ŋes araun epucit mama ejai EJAKAIT apaarasia akanykaarei ŋ: erai ekisil lomam edaun katuriokus: kidarete ŋes kolap lokikanyetekaarei.

⁴² Kibojete koswamin apaarasia akanykaarei; kere luurikina koIsirael kibojete koswamin:

⁴³ Tetere ejenunete aturiokus ebe abu kesiboik idwe luka Isirael oswamin, naketolomunia eoŋ kes kakwap nako Misiri: arai eoŋ EJAKAIT Ekusideke.”

⁴⁴ Abu Musa kolimok idwe luka Isirael ipucino lueseunitai luka EJAKAIT.