Ilebin 20 - Ebaibuli

¹ Kotema EJAKAIT Musa atiar,

² “Bobo da, kolimok idwe luka Isirael ebe, ŋinituŋanan kere kodwe luka Isirael, arai komo luiboiete koIsirael, yeneinakini Molek aurike; abeit eario ŋin: ibiribirete ituŋa luka akwap ŋes kamor,

³ Aluikini eoŋ da ituŋanan ŋin, agelari eoŋ ŋes kotuŋake; naarai abu koinak Molek aurike, amunaun aiboisika nakalaunan, eti sil da ekakiror lokalaunan.

⁴ Arai kibwaata ituŋa luka akwap akecekonye kotuŋanan kaŋol, naeinakinia Molek aurike, komam earete ŋes:

⁵ Kasodi eoŋ aluikin etuŋanan ŋol, ka ekekike, ka ŋul kere luiporoete kotupito ŋes aipororio Molek, agelari kes kotuŋakec.

⁶ Ituŋanan da yenibelokin mama ejaas ŋul luejaas ajokin, mama ejaas ikacudak da, aipororio kes, aluikin eoŋ ituŋanan ŋin, agelari ŋes kotuŋake.

⁷ Aso do, kitalaunos bonik, koraunos lukalaunak: naarai arai eoŋ EJAKAIT Ekusideke.

⁸ Koricito ikisilaka, kiswamaenenete kes: Eoŋ EJAKAIT loetalauni yes.

⁹ Naarai ŋinituŋanan yenilamakini papake arai totoke abeit eario: ilamakinit papake arai totoke; ebeikinete ŋes akeceokot,

¹⁰ Arai edotei etuŋanan kaberu naka eidunyeteke, lodote ka naadote da abeit eario kes kere.

¹¹ Etuŋanan da loeperete kaberu naka papake, apuko amujalal naka papake: abeit eario kes kere; ebeikinete kes akeceokot,

¹² Arai keperio etuŋanan aberu naka okokuke, abeit eario kes kere: eswamata nuka ainyalinyal; ebeikinete kes akeeeokot.

¹³ Arai keperio etuŋanan ekiliokit kwape kaberu, eswamata kere nuketal: abeit eario kes kere; ebeikinete kes akeceokot.

¹⁴ Arai keyaŋa etuŋanan aberu ka totoke da, erai aronis: icweikinio, ŋes ka kes kere; tetere emameun aronis kamakus.

¹⁵ Arai keperio etuŋanan etiaŋ, abeit eario: iarete etiaŋ da.

¹⁶ Arai kikunyaki aberu etiaŋ kere, apero kaŋes, iari ijo aberu ka etiaŋ da: abeit eario kes; ebeikinete kes akeceokot.

¹⁷ Arai keyaŋa etuŋanan inacike, akoku naka papake, arai akoku naka totoke, koany amujalalake, ka ŋin da eanyuni amujalal naka ŋol; erai akirot naka ileic; egelario kes kakonyen nuka idwe luka ituŋakec; apuko ŋesi amujalal naka inacike; ibwoki numam adoliteke.

¹⁸ Arai keperio etuŋanan aberu naibami, epukori amujalalake; apuko aleleke, ŋin da apuko alele naka aokotoke: egelario kes kere kotuŋakec,

¹⁹ Sirikipuko amujalal naka inaci naka totokon, karaida inaci naka papakon; naarai apuko amujalal naka naipajanas kaŋes; ibwokete numam adolitekec.

²⁰ Arai keperio etuŋanan aberu naka mamaike, apuko amujalal naka mamaike: ibwokete adiakaretekec; etwakete komameete idwe.

²¹ Arai keyaŋa etuŋanan aberu naka onaceke, erai numam aila: apuko amujalal naka onaceke; emamuunete kes idwe.

²² Aso do koricenenete ikakisila kere, ka itubesiaka kere, kiswamaenenete kes: kinyek akwap, naketolomari yes aiboienen, alekar yes,

²³ Sirilosenenete koponesio luka ateker naereŋeari kakonyenekus: naarai eswamata ŋun kere, tape alai kes,

²⁴ Konye abu katema yes ebe, Irumete yesi akecekwap, eoŋ da kainakini yes airum, akwap naeleleete akile ka esik: arai eoŋ EJAKAIT Ekusideke, loatiakuni yes kotuŋa,

²⁵ Aso do kotiaka yesi etiaŋ loelai, ka lomam elai, akweny namam elai ka naelai: sirikimunaasi ikusitauon kanuka etiaŋ, arai kanuka akweny, arai kanuka ibore yeneliat kakwap, luatiakunit eoŋ kamakus araut lumam elaete.

²⁶ Koraunos lukalaunak kama ajai: naarai Eoŋ EJAKAIT arai lokalaunan, abu katiak yes kotuna araun lukaŋ,

²⁷ Etuŋanan da arai aberu yenejai ajokit, arai yenerai ikacudan, abeit eario; ibiribirete kes kamor: ebeikinete kes akeceokot.”