Ilebin 2 - Ebaibuli

¹ Naeinakinia ituŋanan ainakinet naka akiria naeinakinio mama ejai EJAKAIT, eraun ainakineteke naka akiria nuidicic; ebukokini akinyet, ibwaikini lueuru maa:

² Einuni odwe luka Aaron lusasedetin: emuduni ŋesi akan ileleba akiria Ŋun nuidicic, ka akinyeteke, ka lueuru maa kere; icweikini esasedoti ŋes araun aiituneteke kotem, ainakinet naeinakinere kakim, naka asakat naeuru saa mama ejai EJAKAIT:

³ Ŋun da nuideunos nuka ainakinet naka akiria eraunos nuka Aaron ka odweke: erai ibore yenikalaunan noi yenika ainakineta nuka EJAKAIT nueinakinere kakim.

⁴ Naiinakinia ijo ainakinet naka akiria nupeon kokila, eraunos aluŋuren numam itubuunitoi neka akiria nuidicic nuinyalakinitai akinyet, arai imugatin luebenen lumam itubuunitoi luinyonyoikinitai akinyet,

⁵ Arai erai ainakinetekon naka akiria nukeon, eraun naka akiria nuidicic numam itubuunitoi, nuinyalakinitai akinyet,

⁶ Itiakatiakai kes katutubeta, ibukokini akinyet: ŋes ainakinet naka akiria,

⁷ Arai da erai ainakinetekon naka akiria nuka ibore yenikiwowas, itwasamaeneno kakiria nuidicic kakinyet.

⁸ Iyauni ainakinet naka akiria nuitwasamatai kiboro ŋul mama ejai EJAKAIT: einunio esasedoti, ŋes da eyauni otem.

⁹ Edakuni esasedoti kainakinet naka akiria aiituneteke, icweikini kotem: ainakinet naeinakinere kakim, naka asakat naeuru saa mama ejai EJAKAIT.

¹⁰ Ŋun da nuideunos nuka ainakinet naka akiria eraunos nuka Aaron ka odweke: erai ibore yenikalaunan noi yenika ainakineta nuka EJAKAIT nueinakinere kakim.

¹¹ Mam itwasamaete yenikitubuunet naiinanakiniata ainakinet naka akiria mama ejai EJAKAIT: naarai mam icweikinete yenikitubuunet, karaida esik, araun ainakinet naeinakinere kakim mama ejai EJAKAIT,

¹² Iinanakinete ŋul araun ainakinet naka nugeet mama ejai EJAKAIT: konye mam isupuruunio kes araun asakat naeuru saa kotem.

¹³ Kibwaanakin abalaŋ ŋiniinakinet naka akiria; mam itwataniari abalaŋ naka aitutuket naka Ekonideke kainakinetekon naka akiria: iinanakini abalaŋ kainakinetakon kere.

¹⁴ Arai ca iinakini ainakinet naka akiria nuka nugeet mama ejai EJAKAIT, koinanakini aluŋuren nuka imomwa luikawooritai, imumwa luicomom luka aluŋuren nukitetiak araun ainakinet naka akiria nuka nugeetekon.

¹⁵ Ibukonokini akinyet, ibwaikini da lueuru maa: ŋes ainakinet naka akiria.

¹⁶ Icweikini esasedoti aiituneteke, atutubet naka imumwake luicomom, ka atutubet naka akinyeteke, ka lueuru maa kere: ŋes ainakinet naeinakinere kakim mama ejai EJAKAIT.