Ilebin 1 - Ebaibuli

¹ Kiworo EJAKAIT Musa, kinera kaŋes kowema loka airiamunun ebe,

² “Kolimok idwe luka Isirael ebe, Naeinakinia ituŋanan kayesi ainakinet mama ejai EJAKAIT, iinakinete ainakinetekus kotoma obaren, kosipanin luka aituk ka luka amerekekin.

³ Arai erai ainakineteke ainakinet naicweio nakosipan loka aituk, einakini yenikiliokit yenimam eŋwalit: einakini ŋes kokek loka ewema loka airiamunun, tetere ecamunio kakonyen nuka EJAKAIT.

⁴ Idokokini akekan akou naka ainakinet naicweio; ecamunio kanukeŋ alucio ŋes,

⁵ Earanakini emoŋ lotobait kakonyen nuka EJAKAIT: ijaikinete odwe luka Aaron, lusasedotin, aokot, kobwatanakis aokot owaitin luka etem loejai okek loka ewema loka airiamunun.

⁶ Ejeŋi ŋesi ainakinet naicweio, etubutubei da koinerinoke.

⁷ Kosodete odwe luka Aaron esasedoti aibwaikin akim otem, ka aigaŋ akito akim:

⁸ Inapanakinete odwe luka Aaron, lusasedotin, inerino, akou ka asiepai toma akito nuejaas akim naejai otem:

⁹ Konye ilosi kakip lukotomake ka akejeke: kosodi esasedoti aicweikin kere kotem, araun ainakinet naicweio, ainakinet naeinakinere kakim, naka asakat naeuru saa mama ejai EJAKAIT.

¹⁰ Arai da erai ainakineteke kosipan loka amerekekin, arai loka akinei, araun ainakinet naicweio; einakini ŋesi yenikiliokit yenimam eŋwalit.

¹¹ Earakini ŋes owai loka etem ari naka agolitomei kakonyen nuka EJAKAIT: ebwatanakinete odwe luka Aaron lusasedotin, aokotoke owaitin luka etem.

¹² Etubutubei da koinerinoke, nepepe kakouke ka asiepaike: inapanakini esasedoti kes akito nuejaas akim naejai otem:

¹³ Konye ilosi kakip lukotomake ka akeje: einakini esasedoti kere, icweikini kotem: erai ainakinet naicweio, ainakinet naeinakinere kakim, naka asakat naeuru maa mama ejai EJAKAIT.

¹⁴ Arai da erai ainakineteke mama ejai EJAKAIT ainakinet naicweio naka akweny, ŋes konyet einakinia ainakineteke naka ajeleik, arai naka ilukei ludidik,

¹⁵ Eyauni esasedoti ŋes otem, emojirikini aŋedar akouke, kicweikin kotem; eitanakini aokotoke ariri ketem:

¹⁶ Elemari elogorotoke ka ajuloke, ecakakini owai lokokide loka etem, aibois naka ekurwon:

¹⁷ Kosobi aicil abebenokake, konye mam etubutubei: ieweikini esasedoti ŋes kotem, kakito nuejaas akim: erai ainakinet naicweio, ainakinet naeinakinere kakim, naka asakat naeuru saa mama ejai EJAKAIT.