Ikolosain 2 - Ebaibuli

¹ Naarai akoto yes ajenun aut naetia nen naauta kanukus, kanuka ŋul da luejaas Laodikia, ka ŋul kere lumam eanyunito akakonyen toma akuan;

² tetere italakario ikecetauon, inicakina kotoma amin, koanyut abar kere naka acoit naitogogoŋitoi, kojenut cut aiyeiyea naka Edeke, ŋes Kristo,

³ loibwaitai kotomakeŋ iboro kere luketiai loepol luka acoa ka ajenun da.

⁴ Enera ŋun kinyek idiotuŋanan aitapaar yes kakiro nuka aijodijod.

⁵ Naarai karaida amamei eoŋ kotoma akuan, konye ajai kayes kotoma omoyo, eyalama da aanyun ekusipone loeteni ka aicasit naka aiyuunikus kotoma Kristo.

⁶ Aso kwape ijauniata Kristo Yesu Ejakait, kolosenenete kwaŋin kotomakeŋ;

⁷ kicasito aliasiokus, kodukokina kotomakeŋ, ido kitogogoŋitete kotoma aiyuun, kwape kisisianakinere, kilapara kaimal.

⁸ Kocoito kinyek idiotuŋanan aŋatar yes kanuka aminacoa ka aiŋal naatai, kwape ejaatar iponesio luka ituŋa, kwape ejaatar nugeet nuka akwapin, kwabo mere kwape ejaar Kristo,

⁹ Naarai kotomakeŋ iboie aitekoro kere naka Eidekeone kakuan,

¹⁰ yes da itekoro kotomakeŋ, loerai akou naka ayait kere ka apolou da.

¹¹ Kotomakeŋ da kikepitai yes kakepio namam iswamatai kakanin, ilacata akuan naka etuŋanan kotoma akepio naka Kristo;

¹² kinukio nepepe kaŋes kaibatis, kaŋin da aponi kitajarun nepepe kaŋes, kanuka aiyuun aswam naka Edeke lokitajaruni ŋes kokatwak,

¹³ Yes da lukitwakito kotoma aibucanareta, ka amamus akepio naka awatekus, abu Edeke koinak yes aijar nepepe kaŋes, kedau ŋesi aisioni oni aibucanaretawok kere,

¹⁴ kedau aimwatar aitutuket naewadikatai toma okisila nakitusurupi oni; abu kolema awai, kibubuk omusalaba.

¹⁵ Kolaca ŋesi ikayaitok ka lukapolou kitodia kes katitiŋ, kipiko kes komusalaba.

¹⁶ Aso kinyek idiotuŋanan atubokin yes kakiro nuka inyamat, arai numatan, arai bo kakiro nuka epucit, karaida ailamun naka elap, karaida nuka apaaran nakasabato.

¹⁷ Eraas nu etoribe loka nuepote; konye akuan ŋes naka Kristo.

¹⁸ Kinyek idio ademar ainakinetekus, yenekoto aitisilikin, ka aima imalaikan, kitogogoŋooro kaitapoeta, iturokina atai kanuka aomisioke nuka akuan,

¹⁹ kwabo mam iketakina Akou, lokotomakeŋ akuan kere isigalikinio ka ainicakinio kanuka ailenyeta ka amoori, iyatanakin keiyas loka Edeke.

²⁰ Arai ipotu kotwaka nepepe ka Kristo ainyein nugeet nuka akwapin, kanukinyo inonokikinitotor ikisila bala iroko ijarete kotoma akwapin,

²¹ ebe, “Sirikitiŋ, Sirikiir, Sirikitiro”,

²² (ŋul kere eoliorete toma aitwasamao) atupar aicorakineta ka aisisianakin naka ituŋa?

²³ Akiro ŋun kere ejai aput naka acoa kotoma aima naepwakunete ituŋa bonik, ka aitisilikin, ka aitican akuan; emamei ŋun ajokis nepetai da aitikokinia aiŋobel naka akuan.