Ikisila 8 - Ebaibuli

¹ “Iricete aicorakinet kere nakecorak yes lolo aiswamaenen, tetere ijarete, kipuaros, kolomasi airum akwap naabu EJAKAIT kiyapoik lukapapaakus.

² lituni erot kere loabu EJAKAIT kiŋarenikinio jo ikar lu akaisaoŋon kotoma amodiŋ, tetere inonokiari ijo, aigimor jo ajenun nuejaas otaukon, arai irici aicorakinetake arai mam.

³ Abu kitononok jo, kitakany jo eteŋei, kitanyam jo emanu, lomam ibu kojeni, karaida lukapapaakon mam ajenete; tetere kitejenuni jo ebe mam ituŋanan ejari kanuka atap bon, konye ejari ituŋanan kanuka ŋinikirot naelomuni kaituk naka EJAKAITa.

⁴ Mam akoninapito abu komojon, karaida akonikeju abuun, kokar kalu akaisaoŋon.

⁵ Iwomoomoi ijo kotaukon ebe, kwape elecoria ituŋanan okokuke, kilecori EJAKAIT Ekonideke jo kwaŋin.

⁶ Irici ijo aicorakineta nuka EJAKAIT Ekonideke, alosenen korotinike, ka ayoŋit ŋes.

⁷ Naarai kiyaŋaarit EJAKAIT Ekonideke jo akwap naejok, akwap naka aguurun nuka akipi, naka akonye nuka atanin ka aidules, nuibulubulununos kaditon ka iukon;

⁸ Akwap naka akima ka esairi, ka imusabibun, ka itinin ka ikamamagan; akwap naka iseitunin luka akinyet, ka esik;

⁹ Akwap nainyamiata atap naidila, emameun ibore yenipudakinos kaŋina; akwap naeraas akemor asuat, naibokuniata aisinit koukonoke.

¹⁰ Inyami kimonikin, ituri EJAKAIT Ekonideke, kanuka akwap naejok nakiinak jo.

¹¹ “Kocoite sirikiimurwok EJAKAIT Ekonideke, kotoma amamus aricrt aicorakinetake, ka itubesiake, ka ikisilake, lukeeorak jo lolo:

¹² Arai kidau ainyam kimonikin da, kidau adukun itogoi luejok kiboikin nen:

¹³ Naeuriarotor isipaninikon luka aituk ka luka imerekekin, naiyatakinor epuesakon ka esabukon, naiyatakinotor da ŋul kere luijaatar ijo;

¹⁴ Kinyek ekonitau adakun, kimurwok EJAKAIT Ekonideke lokitolomuni jo kakwap nako Misiri, kotogo loka ebulesene;

¹⁵ Lokiŋarenikinit jo kamodiŋ nakos naesogim, naajaas imunwo luka akim ka ikiritona, ka akwap naeonit naamameete akip; loetolomuni akipi kanukus katiiba naegogoŋ;

¹⁶ Lokitanyami jo kamodiŋ emanu lomam lukapapaakon ajenete; tetere inonokiari ijo, tetere da kigimori jo, aiswamakin jo nuejok kapaarasia nuepote;

¹⁷ Itemari kotaukon ebe, ‘Apedorika ka agogoŋ naka akakan kes kadumakis eoŋ abara na.’

¹⁸ Konye kiitu ijo EJAKAIT Ekonideke, naarai ŋes lokikorakini jo agogoŋ naidumunia abar; tetere iticasi akeitutuket naeyapoikini lukapapaakon, kwape ejaar lolo.

¹⁹ Kosodi arai kiimurwok ijo EJAKAIT Ekonideke, kitupa da icedekesio, aijaanakin kes, ka aima kes, ketejen yes lolo ebe abeit imudiaros.

²⁰ Kwape katekerin nuemudianari EJAKAIT kakonyenekus, imudiaros yesi da kwape kwaŋin; naarai iŋeroto apupun eporoto loka EJAKAIT Ekusideke.