Ikisila 30 - Ebaibuli

¹ “Kosodi kanen, nakibunokiniata jo akiro ŋun kere, arereŋ ka ekenit, nuebwaik akonyenekon, kosodi ijo akiitun katekerin kere, nukireŋeikini EJAKAIT Ekonideke jo.

² Kosodi aboŋun mama ejai EJAKAIT Ekonideke; arimar ekeporoto kwape ejaatar kere nukecorak ijo lolo, ijo ka idwekon, ketaukon kere, ka aijarakon kere;

³ Ŋes do ibelokinio EJAKAIT Ekonideke aŋatariokon, kitimi jo, eboŋuni atukonokin jo kotuŋa kere, luabu EJAKAIT Ekonideke kisiarak jo mamakec.

⁴ Arai kejaunos lukon luireŋearitai atutubeta nukokiŋa nuka akuj, kitukuni EJAKAIT Ekonideke jo kaŋina, kiwomuni ŋesi jo kaŋina:

⁵ Kiyaŋauni EJAKAIT Ekonideke jo akwap naerumito lukapapaakon, irumi ijo da ŋes; kiswamakin jo nuejok, kitupui jo adepar lukapapaakon.

⁶ Ekepi EJAKAIT Ekonideke ekonitau, ka etau loka aurikon, tetere iminenena EJAKAIT Ekonideke ketaukon kere, ka aijarakon kere, tetere ijari.

⁷ Ibwaikini EJAKAIT Ekonideke ikenito lu kere mama ejaas lukasurupokon, ka ŋul da lukilaito, lukimanito jo.

⁸ Iboŋuni, irimari eporoto loka EJAKAIT, aiswamaenen aicorakinetake kere nukecorak jo lolo.

⁹ Kiinakini EJAKAIT Ekonideke jo akerianut kaswamisio kere nuka akanikon, ka aur naka akuanakon, ka aur naka ibarenikon, ka araito naka alupokon, kanuka ajokis: naarai isiyalamikini bobo EJAKAIT jo kanuka ajokis, kwape esiyalamikinia lukapapaakon.

¹⁰ Arai kirima ijo eporoto loka EJAKAIT Ekonideke airic aicorakinetake ka ikisilake luiwadikatai oitabo lo loka ikisila; arai kibelokin neejai EJAKAIT Ekonideke ketaukon kere, ka aijarakon kere.

¹¹ “Naarai aicorakinet na nakecorak jo lolo mam kitionikini jo noi, mam da elwana.

¹² Mam ejai akuj, tikitema ebe, ‘Iŋai edokari kuju ainun sio, kosodi aisiirar sio, tetere kiswamai?’

¹³ Mam da ejai okekwa loka aŋolol tikitema ebe, ‘Iŋai ikwaŋar kaŋolol, ainun sio, kosodi aisiirar sio, tetere kiswamai?’

¹⁴ Konye eapie akirot noi kamakon, kaitukukon, kotaukon da, tetere iswamai.

¹⁵ “Koany, ebwaik lolo akonyenekon aijar ka ajokis, atwanare ka aronis;

¹⁶ Naarai kecorak jo lolo aminenena EJAKAIT Ekonideke, alosenen koponesioke, airic aicorakinetake, ka ikisilake ka itubesiake, tetere ijari, kouriar, tetere da kisirereŋi EJAKAIT Ekonideke jo kakwap nailomari airum.

¹⁷ Konye arai kepaa ekonitau, komam ipupuni, konye kijodijodoor aima idekesio ice, aijaanakin da kes;

¹⁸ Kalimokinit yes lolo ebe abeit itwakete; mam akusipaarasia iyatakinos kakwap naidokarete airum kokekwa loka Yorodan.

¹⁹ Anyaraunit akuj ka akwap araut akajenakakus lolo, ebe ebwaik akonyenekon aijar ka atwanare, arereŋ ka ekenit: aso do koseu aijar, tetere ijari, ijo ka aurikon:

²⁰ Kominenena EJAKAIT Ekonideke, korima ekeporoto, kimorikikinos kaŋes: naarai ŋes aijarakon, ka eiyas loka apaarasiakon: tetere iboikin akwap naabu EJAKAIT kiyapoik lukapapaakon, Aburaam, ka Isaak, ka Yakob, ainakin kes.”