Ikisila 3 - Ebaibuli

¹ “Kasodete aibelokin kabeata Basan: kolom Og ekabaka loka Basan asurokin oni, ŋes ka iketuŋa kere, ejie koEderei.

² Katema EJAKAIT eoŋ atiar, ‘Sirikikurianar ŋes; naarai ejaik ŋes ka ituŋake kere, ka akwapuke akanikon; iswamakini ŋes kwape ibu kiswamakinia Sikon ekabaka loka Imorain, lueboiete koKesibon.’

³ Kwaŋin kijaik EJAKAIT Ewokodeke Og da, ekabaka loka Basan ka ituŋake kere akaniwok: kadanyata ŋes aitodol naamameunor yenedeikina ŋes.

⁴ Kipou kerumata ireriake kere kapak kaŋin; amamei erekec lomam oni kipou kerumata; ireria akaisakanykape, akwap kere naka Arugob, ajakanut naka Og koBasan.

⁵ Ireria ŋul kere araas luabwaitai karwatatin ka irutei ka agolito nuaojak; kogelara ireria lumam abwaitai karwatatin luepu noi.

⁶ Kipou kamudiasi kes cut, kwape kiswamakinia Sikon ekabaka loka Kesibon, kamudiasi cut ŋolire loeboioto ituŋa kotoma, ka aŋor ka ludidik.

⁷ Konye kipou kaŋatutu ibaren kere ka luŋatan lukiŋatuni koreria.

⁸ Kerumata akwap kapak kaŋin kakan naka ikabakan iarei luka Imorain luajaas okekwa loka Yorodan, anyoun kaditot naka Arunon kiton moru Kerumon;

⁹ (Kerumon loenyarito Isidonin Sirion, enyarito da Imorain ŋes Senir:)

¹⁰ Ireria kere luka apuuton, ka Gilead kere, ka Basan kere, kiton Saleka ka Ederei ireria luka ajakanut naka Og koBasan.

¹¹ (Naarai Og ekabaka loka Basan, ŋes bon asalit kotoma kaluedeuna luka Irepaim; koany, eitadake kerai eitada loka asuat; mere ejai Raba neejaas idwe luka Amon? Aojauke kerai ikubitin Ikanykaoŋon ka alalauke ikubitin iwoŋon, kwape ejaar ekubit loka etuŋanan.)

¹² “Kipou kerumata akwap ŋin kapak kaya: anyoun koAroer, naejai ariri naka aditot naka Arunon, ka atutubet naka akwap nakiukon naka Gilead, ka ireriake, abu eoŋ kainak Ireubenin ka Igadin:

¹³ Ka Gilead naedeuna ka Basan kere, ajakanut naka Og abu eoŋ kainak atutubet naka ateker naka Manase; akwap kere naka Arugob, ŋes Basan kere. (Emaikinitai ŋipeŋin akwap naka Irepaim.

¹⁴ Abu Yair okoku loka Manase koyaŋa akwap kere naka Arugob, kiton oikor loka Igesurin ka Imaacatin; abu komaik kes, ŋes Basan, ekekiror elopet, Kabot-yair, kiton lolo.)

¹⁵ Abu kainak Makir Gilead.

¹⁶ Abu kainak Ireubenin ka Igadin anyoun koGilead kiton aditot naka Arunon, akidiŋot naka aditot ka eikoruke; kiton ocor Yabok, loerai eikor loka idwe luka Amon;

¹⁷ Araba da, ka Yorodan ka eikoruke, anyoun koCineret kiton aŋolol naka Araba, Aŋolol naka Abalaŋ, naejai kwap neijululuoro Pisiga kari nakokide.

¹⁸ “Abu kecorak yes kapak kaŋin ebe, ‘Kiinak EJAKAIT Ekusideke yes airum akwap na: ituboros ikapakina ejie kakonyen nuka ikusiinacan idwe luka Isirael, ituŋa kere luetitiŋ.

¹⁹ Konye esalete akusiŋor, ka ludidikikus, ka ibarenekus oreriakus lukainak yes, (ajeni ebe ipu yes ibaren);

²⁰ Aitodol naisiyeŋunia EJAKAIT ikusiinacan, kwape yes, aitodol nairumiata akwap naeinakinit EJAKAIT Ekusideke kes kokekwa loka Yorodan: ŋes konyet iboŋunioto yesi ŋinituŋanan alupoke nukainak yes.’

²¹ Abu kecorak Yosua kapak kaŋin ebe, ‘Aanyut akonikonye kere nueswamaki EJAKAIT Ekonideke ikabakan ŋul luarei: iswamakini kwaŋin EJAKAIT ajakanuto kere nuitori ijo mamakec,

²² Mam ikuriakaros kes: naarai EJAKAIT Ekusideke, ŋes kijiikinit yes.’

²³ “Abu keŋaiŋa EJAKAIT kapak kaŋin ebe,

²⁴ ‘Wu EJAKAIT Edeke, igeu aitodikin ekonibulesit akonipolou ka akonikan nakagogoŋ: naarai iŋai edeke loejai toma akuj arai toma akwap, loepedori aswam kwape ejaatar akoniswamisio, ido kwape ejaatar akoniswamisio nukapedor?

²⁵ Keŋaiŋait, kisiikinai katubor aanyun akwap naejok naejai okekwa loka Yorodan, eronat ŋol loejok, ka Lebanon.’

²⁶ Konye abu EJAKAIT kanyunyurik eoŋ kanukus, mam abu kapup eoŋ: katema EJAKAIT eoŋ atiar, “Kililiŋ; sirikiner bobo keoŋ akirot ŋin,

²⁷ Kodoka ijo aidi naka Pisiga, kiteluo akonikonye to, ka agolitomei, ka eŋalakimak, ka kide, koany kakonyekon: naarai mam idokari Yorodan lo.

²⁸ Konye kodakak Yosua, kitogogoŋ ŋes, kiticat: naarai iŋarenikini ŋesi ituŋa lu, isurumi kes akwap naianyuni ijo.’

²⁹ Kwaŋin keboikinos aditot naiteos kaBet-peor.