Ikisila 29 - Ebaibuli

¹ Ŋun kes akiro nuka aitutuket naceorakini EJAKAIT Musa aitutuk ka idwe luka Isirael, kakwap naka Moab, kogelara aitutuket naetutukete ŋesi kakes koKoreb.

² Konyarau Musa Isirael kere kotema kes atiar, “Ianyut kere nueswamak EJAKAIT Parao, ka ikekejaanakinak kere, ka akwapuke kere, kakonyenekus kakwap nako Misiri;

³ Aigimoreta nuepolok nuapotu akonikonye koanyut, aanyuneta da, ka nukaumokin ŋun nukos:

⁴ Konye mam EJAKAIT kiinakinit yes etau loejenuni, ka akonye nuesesenete, ka aki nuepupete, kiton lolo.

⁵ Keŋarenik yes ikar akaisaoŋon kamodiŋ: mam ikusinapen emojonito, akusimuka da mam emojoŋito.

⁶ Mam inyamito atap, karaida aimat ebino arai nuitemerete: tetere ijenunete ebe arai eoŋ EJAKAIT Ekusideke.

⁷ Ido naidolunioto aibois na, apotu Sikon ekabaka loka Kesibon, ka Og ekabaka loka Basan, kolomut asurokin oni, kipou oni kadanyata kes:

⁸ Kipou kayaŋaasi akecekwap, kainakis araun airumet naka Ireubenin, ka Igadin, ka atutubet naka ateker naka Imanasin.

⁹ Kanuka ŋun kidarata akiro nuka aitutuket kana, kiswamaenenete, tetere ikeriakaros kaswamisiokus kere.

¹⁰ “Ibwoete yesi kere lolo kakonyen nuka EJAKAIT Ekusideke; ikapolokokus, atekerinikus, imakiokus, ka ijakakus, ituŋa kere luka Isirael,

¹¹ Ludidikikus, ka aŋorokus, ka imokus luejaas oidukurunukus, ageun ka ekebetan akitokus, kiton ekeriton akipikus:

¹² Tetere ilomarete aitutuket naka EJAKAIT Ekusideke, aiyapositike da, naitutukinit EJAKAIT Ekusideke kayes lolo:

¹³ Tetere kiticasi yes lolo araun iketuŋa obe, koraun ŋesi Edekekus, kwape abu kolimokinia yes, kwape da eyapoikinio lukapapaakus, Aburaam, Isaak, ka Yakob.

¹⁴ Mere yes bonik kitutukio eoŋ aitutuket na ka aiyaposit na:

¹⁵ Konye ka ŋin yenebwoi kane lolo kaoni kakonyen nuka EJAKAIT Ewokodeke, ka ŋin da yenemamei lolo kane kaoni.

¹⁶ “Naarai ijenete kwape kipou keboikinotor akwap nako Misiri; kwape da kitorio atekerin nuipotu kitoroto;

¹⁷ Ipotu koanyut nuka italesiakec, ka aputosiakec, akito ka amor, epuesa ka esabu, nuajaas mamakec.

¹⁸ Kinyek ajaun mamakus etuŋanan, arai aberu, arai ekek, arai atekeu, naepaari eketar lolo ainyein EJAKAIT Ewokodeke, alosit aijaanakin idekesio luka atekerin kaŋun; kinyek ajaun mamakus aliasit naerai epiu ka adwaris.

¹⁹ Kosod: kanen kepupu akiro nuka aiyaposit kana, kikemerik kotauke ebe, ‘Enapakin, karaida katupit aninik naka ekatau,’ amudiar luepalal ka lueokito.

²⁰ Mam EJAKAIT isionie ŋes, konye epuruuni anyunyura naka EJAKAIT ka ekoloke aluikin ituŋanan ŋin, ebunokini ŋes ikenito kere luiwadikatai oitabo lo, emwatari da EJAKAIT ekekiror kokwap kakuj.

²¹ Egitari EJAKAIT ŋes neejai aronis katekerin kere nuka Isirael, kwape ejaatar ikenito kere luka aitutuket naiwadikatai oitabo lo loka ikisila.

²² Etemari atur da naebuni, idwekus lukitupanakinete yes, ka imoit yenebuni kakwap naelwana, naeanyuniata aiticaneta nuka akwap kaŋin, ka adekesia nuetedek EJAKAIT ŋes;

²³ Ido akwap ŋin kere erai acukumasia, ka abalaŋ, ido naenoki, namam eyeio, karaida aira, karaida idionya apol kotoma, kwape amudiario naka Sodom ka Gomora, ka Aduma ka Seboim, nuamudiari EJAKAIT kanyunyurake, ka aisiopoke:

²⁴ Etemarete atekerin kere ebe, ‘Kanukinyo eswamakinia EJAKAIT akwap na kwaŋin? Anyoin bo apolou naka amwanis naka anyunyura kana naepol?’

²⁵ Eboŋokinete do ituŋa ebe, ‘Naarai apotu kojalata aitutuket naka EJAKAIT, Edeke loka lukapapaakec, naetutukete ŋesi kakes naetolomunia kes kakwap nako Misiri;

²⁶ Kosodete alosit aijaanakin idekesio ice, komaata kes, idekesio lumam kes ajenete, lumam ŋes ainakinit kes.

²⁷ Ŋes do enepunia anyunyura naka EJAKAIT aluikin akwap na, ainun ŋes ikenito kere luiwadikatai oitabo lo:

²⁸ Abu EJAKAIT koruto kes kakwapukec kanyunyura, ka aisiop, ka akadakin naepol, kocaka kes akwap ace, kwape lolo.’

²⁹ “Akiro nuka aiyeiyea eraas nuka EJAKAIT Ewokodeke, konye akiro nuepukoro eraas nuwok ka nuka iwokodwe ikar kere, tetere kiswamai akiro kere nuka ikisila kalu.