Ikisila 22 - Ebaibuli

¹ “Sirikijalak emoŋ loka onacekon arai amerekekike naianyunia eoliori: abeit inyakari kes neejai onacekon.

² Arai mam onacekon eapie kaneijai ijo, ido arai mam jo ijeni ŋes, iyaŋaari do ŋes orekon, ejaun kajo aitodol naemoia onaeekon ŋes, inyakakini ŋes.

³ Ikwaikini kwaŋin akesigiria; ikwaikini da kwaŋin akenapito; ikwaikini da kwaŋin ŋinibore yeneoliorit yenika onacekon, yeneoliorit kamake, ka yenidumuni ijo; sirikijalak.

⁴ Sirikite asigiria naka onacekon arai ekemoŋ ibirokina orot, kosodi ajalakin: iŋarakini ŋes cut aitobwo kes bobo.

⁵ “Sirinapenenei aberu yenerai yenika ekiliokit, karaida ekiliokit ainap inapen luka aberu: naarai ŋin yeniswamai ŋun erai yeniketal kama ejai EJAKAIT Ekonideke.

⁶ “Arai kejaun akai naka akweny orotokon, okitoi arai alup, ka idweke arai abeeike, kirukumite totokec idwe arai abeei, mam iyaŋaari totokec ka idwe:

⁷ Jjalakini totokec alosit, konye ipedori ayaŋaar idwe; tetere ijaun ejok, iyatakini da akonipaarasia.

⁸ “Naidukio etogo lokitetet, idukokini arwatat nadidi airimor eswikon, kinyek aitebe aokot togokon, arai kibirun ituŋanan kaŋina.

⁹ “Sirikiye ikinyom luka iponesio iarei amanakon naka emusabibu: kinyek atwaniar araito kere, ikinyom luibu koye, ka amio naka amana naka emusabibu.

¹⁰ Sirikitokor emoŋ nepepe kasigiria.

¹¹ Sirikinap anapito nainyalinyala, ajul ka ebaputa nuesonyitai nepepe.

¹² “Iswamakini isilo atokito aoŋon nuka anapitokon, naimukori ijo,

¹³ “Arai kemany etuŋanan aberu, koloma mamake, kosodi aila ŋes.

¹⁴ Apwakanakin ŋes, amunaun ekekiror, ebe, ‘Abu kamany aberu na kosodi naekunyakinia mamake, mam abu kadum aanyuneta nuka abekonut’:

¹⁵ Kosodi papa kapese, ka totoke, ayaŋaun aanyuneta nuka abekonut naka apese, mama ejaas imakio luka ere orute:

¹⁶ Etemari papa kapese imakio atiar, ‘Abu kakorak etuŋanan lo akokuka aimany, konye elait ŋes;

¹⁷ Ido koany, apwakanaki ŋes ebe, “Mam abu kadum aanyuneta nuka abekonut kaneejai akokukon”; kwabo nu kes aanyuneta nuka abekonut naka akokuka.’ Kosodete apesikin anapito akonyen nuka imakio luka ere.

¹⁸ Eyaŋaarete imakio luka ere etuŋanan ŋol elecorete da ŋes;

¹⁹ Itegelete ŋes isekelin akwatat luka epuesa, einakinete kes papa kapese, naarai abu komunau ekiror loka abekot naka Isirael: eraun akeberu; mam ireŋeari ŋes apaarasiake kere.

²⁰ Konye arai erai akirot abeit, ebe mam edumunitai aanyuneta nuka abekonut kaneejai apese:

²¹ Eyaŋaunete do apese okek loka etogo loka papake, ibiribirete ituŋa luka ereke ŋes kamor, kotwana: naarai eswamaa nukabaŋaanut koIsirael araun naadote kotogo loka papake: ilemari kwaŋin aronis kamakon.

²² “Arai kegolor etuŋanan ka aberu naka ekiliokit, etwakete kes kere iarei, etuŋanan loaperete kaberu, ka aberu da: ilemari kwaŋin aronis koIsirael.

²³ “Arai ejai apese naerai abekot naisinerit ekiliokit, kosodi etuŋanan adumakin ŋes ore, koperoto kaŋes;

²⁴ Iyaŋaunete do kes kere iarei orute loka ere kaŋol, ibiribirete kes kamor, kotwaka; apese, naarai mam abu kiluluk kwabo ajai ore; ka etuŋanan, naarai abu kitisil aberu naka eidunyeteke: ilemari kwaŋin aronis kamakon.

²⁵ “Konye arai kedumaki etuŋanan apese naisineritai ais, kosodi aitiŋaikin ŋes, koperoto kaŋes; etuŋanan do bon loaperete kaŋes, ŋes etwani:

²⁶ Konye mam iswamakini apese idiobore; emamei kaneejai apese adiakaret naibusakinitor atwanare; naarai kwape enyounio etuŋanan asurokin eiidunyeteke, kosodi aiar, kwape kwaŋin ejaar akirot ŋin da:

²⁷ Naarai adumakin ŋes ais; abu apese naisineritai kiluluk, konye komameun yeneyuuni ŋes.

²⁸ “Arai kedumu etuŋanan apese naerai abekot, namam isineritai, kosodi aikamun ŋes, koperoto kaŋes, kosodete adumun kes;

²⁹ Elemikini etuŋanan loaperete kaŋes papa kapese isekelin akaisakany luka epuesa, eraun do akeberu, naarai abu kitisil ŋes; mam ireŋeari ŋes apaarasiake kere.

³⁰ “Mam etuŋanan elomari neejai aberu naka papake, mam do epukori anapito nakaŋabet naka papake.