Ikisila 18 - Ebaibuli

¹ “Mam isasedotin Ilebin, kes ateker kere naka Lebi, ejaunos kakorakinet karaida airumet koIsirael: enyamenenete ainakineta nueinakinere kakim nuka EJAKAIT, ka airumeteke.

² Mam kes ejaunos kairumet kama ejaas iinacanakec; EJAKAIT ŋes airumetekec kwape alimokinia ŋesi kes.

³ Lu kes luitebeitai isasedotin kaneejaas ituŋa, kaneejaas ŋul lueinakinete asubanit, arai emoŋ arai amerekek, einanakinete esasedoti akuat, ka iitinyo iarei ka aboi.

⁴ Iinakini ŋes nuegeete nuka akimakon, ka ebinokon, ka akinyetekon, ka nusodit nuka ajul nuka amerekekinikon.

⁵ Naarai aseu EJAKAIT Ekonideke ŋes katekerinikon kere abwoenen aijaanakin kokiror loka EJAKAIT, ŋes ka odweke ikar kere.

⁶ “Arai kenyou Elebit koreriakon koIsirael kere, loiboionono, kobu keimiel kere loka etauke aibois naeseuni EJAKAIT;

⁷ Jjaanakini ŋesi kokiror loka EJAKAIT Ekedeke, kwape iswamaata iinacanake kere Ilebin, luebwoenenete kanen kakonyen nuka EJAKAIT.

⁸ Edumunete akorakineta nueriakanara ainyam, kogelara ŋun nuelomunete kotiai loegwelarere akelup,

⁹ “Kidau adolore akwap nakiinakini EJAKAIT Ekonideke, sirikisisiau aswam kwape ejaatar italesio luka atekerin kwa.

¹⁰ Siriketakanu kaneijai ijo ituŋanan kere yenitotori okokuke arai akokuke akim, karaida yeniswamai nuka airo, karaida yeneŋici aanyuneta, karaida yenikalemeleman, karaida ikacudan,

¹¹ Karaida ikaroan, karaida yenikeŋitan aiokin, karaida ikepiedan, karaida yenikenitan lukatwak.

¹² Naarai ŋinituŋanan yeniswamai ŋun erai yeniketal mama ejai EJAKAIT; ido kanuka italesio kaŋul, ŋes ireŋearia EJAKAIT Ekonideke kes kakonyenekon.

¹³ Korai ijo loidolit kaneejai Ekonideke.

¹⁴ Naarai atekerin nu nuirumi ijo, epupete ŋul lueŋicete aanyuneta ka ikaroak; konye ijo, mam kicamakinit Ekonideke aiswamaenen kwaŋin.

¹⁵ “Kitonyoikini rwaru EJAKAIT Ekonideke enabi kokidiŋikon, koinacanakon, loeputos keoŋ; ŋol ŋes iirarete rwaru;

¹⁶ Kwape ejaatar kere nuibu kilip EJAKAIT Ekonideke koKoreb, kapaaran naka atukonokin, kobala ebe, ‘Kenyek akiirar bobo eporoto loka EJAKAIT Ekadeke, ido kenyek aanyun bobo akim na naepol, kenyek atwanare.’

¹⁷ Katema EJAKAIT eoŋ atiar, ‘Enerata ejok ŋun nualimut.

¹⁸ Etonyoikini kes rwaru enabi koinacanakec loeputos kajo: ido ebwaikini akakiro aitukuke, ido kilimokini yes kere nuecorakini.

¹⁹ Kosodi kanen, ŋinituŋanan yenimam iirari akakiro nuinera ŋesi kokirorika, etepeseni kanuka ŋun.

²⁰ Konye enabi loiilokini einer akiro kokirorika numam ecorakinit ŋes einer, arai ŋol loinera kokiror loka idekesio ice, eario enabi ŋol.’

²¹ Arai kitema ijo kotaukon ebe, ‘Kijenuni oni biai akirot namam EJAKAIT elimunit?’

²² Nainerar enabi kokiror loka EJAKAIT, arai mam akirot etakanunit, karaida adolore, ŋin ŋes akirot namam EJAKAIT elimunit: eilokini enabi einer, sirikikurianar ŋes.