Ikisila 13 - Ebaibuli

¹ “Arai ketakanu enabi kamakon arai ekerujan airujasia koinak jo aanyunet arai aumokinet,

² Kosodi aanyunet arai aumokinet adolore, nakilimokinia do jo ebe, ‘Katupasi icedekesio lumam jo ijenunit, kejaanakis kes’;

³ Sirikipupok akiro nuka enabi kaŋol, arai nuka ekerujan kaŋol lokairujasia: naarai kigimori EJAKAIT Ekusideke yes, ajenun arai iminas EJAKAIT Ekusideke kekusitau kere ka akusiijar kere.

⁴ Kotupenenete EJAKAIT Ekusideke, koyoŋito ŋes, koricito aicorakinetake, korimarito ekeporoto, kijaanakis ŋes, kimorikikinos da kaŋes.

⁵ Eario enabi ŋol arai ekerujan ŋol lokairujasia; naarai ener nukepali mama ejai EJAKAIT Ekusideke lokitolomuni yes kakwap nako Misiri, lokilakuni yes kotogo loka ebulesene, aitapaar yes korot lokicorakinit EJAKAIT Ekusideke aitorit. Ilemari kwaŋin aronis kamakon.

⁶ “Arai kiijodijod onacekon, okoku loka totokon, arai okokukon, arai akokukon, arai aberu naka atorobukon, arai opaperokon loesubit bala aijarakon alopet, kaiyeiyea, ebe, ‘Kaloto kejaanakisi icedekesio,’ lumam ijenunit, ijo, karaida lukapapaakon;

⁷ Idekesio luka ituŋa lukirimorito jo, luidunyas kajo, arai luelwaka kaneijai ijo, ameun kosaŋe ediopet loka akwap kiton osaŋe loce loka akwap;

⁸ Sirikicam akekiro, karaida apupun ŋes; karaida akonikoŋu aitim ŋes, karaida aideun, karaida aibwa ŋes:

⁹ Konye iari ŋes cut; akonikan ŋes egei aiar ŋes, kosodete konyet akanin nuka ituŋa kere.

¹⁰ Ibiribirei ŋes kamor, kotwana; naarai akoto ŋesi aitapaar jo anyoun kama ejai EJAKAIT Ekonideke lokitolomuni jo kakwap nako Misiri, kotogo da loka ebulesene.

¹¹ Epupuni Isirael kere, eyoŋi da, mam bobo iswamai aronis naikoni nen kamakon.

¹² “Arai kipupu ijo korekon ediopet lokiinakinit jo EJAKAIT aiboienen kotoma, ebakai ebe,

¹³ ‘Alomasi lukelepa ice kamakon, etapaasi luiboienenete korekec ebe, “Kaloto kejaanakisi icedekesio,”, lumam yes ijenunito;

¹⁴ Iŋituni do ijo, imoi, iŋici kojokan; ido koany, arai erai abeit, kitogogoŋitete akiro, ebe eswamaun naketal ŋin kamakon;

¹⁵ Idanyi luiboienenete kore kaŋol kakwanis naka ekileŋ, imudiari kes cut, ka luejaas toma kere, ka ibareneke, kakwanis naka ekileŋ.

¹⁶ Kotukokini luŋatanake kere kidiŋ orotoke, icwei ere kakim, ka luŋatanake kere, mama ejai EJAKAIT Ekonideke: eraun aapoŋor ikar kere; mam bobo edukio.

¹⁷ Sirikiŋadak idiobore yenikenitoi akanikon: tetere ibelokin EJAKAIT ainyein adedeŋ naka akenyunyura, kitim jo, kisioni jo, kitupuu jo, kwape abu kiyapoikinitor lukapapaakon;

¹⁸ Naipupio ijo eporoto loka EJAKAIT Ekonideke, aricite aicorakinetake kere nukecorakini jo lolo, aiswamaenen nuedolito kakonyen nuka EJAKAIT Ekonideke.