Ikisila 12 - Ebaibuli

¹ “Lu kes ikisila ka itubesia luidarenenete aitodol kakwap nakiinak EJAKAIT, Edeke loka lukapapaakus airum, apaarasia kere nuijariata yesi kakwap.

² Komudiasi aiboisio kere nuejaanakiniata atekerin nuirumete yesi ikecedekesio, koroŋan lueojak, koukon, kokwap da naka ŋolikitoi kaloepesit:

³ Kotiyanakis itemwanakec, komunyumunyata ipirinokec, kicweata Aserimikec: kojepejepata aputosia nuegerer nuka idekesiokec; komudiasi ekecekiror kaibois kaŋin.

⁴ Konye sirikiswamakis kwaŋin EJAKAIT Ekusideke.

⁵ Konye aibois naeseuni EJAKAIT Ekusideke aibwaikin ekekiror katekerinikus kere, komoenenete aiboisike, koponenenete nen:

⁶ Koyaŋaununete nen ainakinetakus nuicweio, ka asubanakus, ka lukitomonetakus, ka ainakinet naedakio naka akusikan, ka aiyaposiokus, ka ainakinetakus nuka akote, ka ikiyaik luka isipaninikus luka aituk ka luka amerekekin:

⁷ Konyamenenete kanen kakonyen nuka EJAKAIT Ekusideke, kolakanaros kotoma kaŋinibore kayeniswamaete, yesi ka ikaliakus, nakisirereŋio EJAKAIT yes.

⁸ Siriswamaete iboro kere lukiswamai oni kane lolo, ŋinituŋanan luedolito kakonyeneke:

⁹ Naarai eroko yes kedolo aiyeŋun ka airumet nakiinakinit yes EJAKAIT Ekusideke.

¹⁰ Konye kidokata Yorodan, kiboikinos da akwap nakisurumi yes EJAKAIT Ekusideke, kisiyeŋun yes kaneejaas lukasurupokus kere lukilukunito, kosodete iboikinos da inapakina;

¹¹ Kosodi kanen iyaŋaunete kere lukecorak yes aibois naeseuni EJAKAIT Ekusideke aisiboikin ekekiror; ainakinetakus nuicweio, ka asubanakus, lukitomonetakus, ka ainakinet naedakio naka akanikon, ka aiyaposiokus kere nuseuna nuiyapoikinete EJAKAIT:

¹² Kolakanaros kakonyen nuka EJAKAIT Ekusideke, yes ka ikusidwe lusap ka lupesur, ka ikusikejaanakinak, ka akusikejaanakinak ka Elebit loejai orekon, naarai emamei ŋes akorakinet karaida airumet kamakus.

¹³ Kocoite ebe mam iinakini ainakinetekon naicweio kaŋiniibois naianyuni:

¹⁴ Konye kaibois naeseuni EJAKAIT kotoma adiopet katekerinikus, iinakini kanen ainakinetakon nuicweio, nen da iswamaenena kere nukecorakini jo.

¹⁵ “Konye ipedori aiar ka ainyam akiriŋ koruteikon kere, kwape ejaunor eipud kere loka etaukon, kwape kisirereŋio EJAKAIT Ekonideke jo: epedorete lumam elaete ka luelaete da ainyam ŋin, kwape amori, ka amiam.

¹⁶ Konye sirinyamenenete aokot; kobukonorete kwap bala akipi.

¹⁷ Sirikinyamak oruteikon yenikitomonet yenika akimakon, ka ebinokon, ka akinyetekon, karaida ikiyaik luka isipaninikon luka aituk ka luka amerekekin, karaida aiyapositikon kere naiyapoi, karaida ainakinetakon nuka akote, karaida ainakinet naedakio naka akanikon;

¹⁸ Konye konyamak kes akonyen nuka EJAKAIT Ekonideke kaibois naeseuni EJAKAIT Ekonideke, ijo ka okokukon, ka akokukon, ka ekejaanakinanikon, ka akejaanakinanikon, ka Elebit loejai orekon: kolakanar kakonyen nuka EJAKAIT Ekonideke kotoma kanuiswamai kere.

¹⁹ Kocoite kinyek aijal Elebit apaarasia kere nuiboionono ijo kakwap.

²⁰ “Naitalalaaria EJAKAIT Ekonideke eikorukon, kwape kisumunio jo, kosodi ijo atemar atiar, ‘Anyami akiriŋ “naarai imiela ekonitau ainyam akiriŋ; ipedori ainyam akiriŋ kwape ejaar eimiel loka ekonitau.

²¹ Arai elwana kaneijai ijo aibois naeseuni EJAKAIT Ekonideke aibwaikin ekekiror, iari do yenika esipanikon loka aituk arai loka amerekekin, lokiinak EJAKAIT jo, kwape kecorakinia jo, inyamakini oruteikon, kwape ejaar eimiel loka ekonitau.

²² Kwape enyamere amori ka amiam, inyami ijo da ŋun kwaŋin: lumam elaete ka luelaete da enyamete ŋun kopone ediopet.

²³ Konye kitogogoŋ na ebe mam inyamete aokot: naarai aokot ŋes aijar; sirikinyam aijar nepepe kakiriŋ.

²⁴ Sirinyamenenei kes; kobukonori kwap bala akipi.

²⁵ Sirinyamenenei kes; tetere ijaun ejok, ka idwekon lukitupanakinete, naiswamaa ijo nuedolito kakonyen nuka EJAKAIT.

²⁶ Konye koyaŋanari iborokon lukalaunak luijaatar, ka aiyaposiokon, kolot aibois naeseuni EJAKAIT.

²⁷ Iinakini ainakinetakon nuicweio, akiriŋ ka aokot kotem loka EJAKAIT Ekonideke: ebukokinio aokot nuka asubanakon otem loka EJAKAIT Ekonideke, inyami ijo akiriŋ.

²⁸ Kidarenene kopupununei akiro nu kere nukecorak jo, tetere ijaun ejok ka ikonidwe lukitupanakinete jo ikar kere, naiswamaa nuejok nuedolito da kakonyen nuka EJAKAIT Ekonideke,

²⁹ “Naemudiaria EJAKAIT Ekonideke atekerin kakonyenekon, nuilosi ijo airum, kosodi ijo airum kes, iboikin da akwapukec;

³⁰ Kocoite jo kinyek alokio atupari kes kemudiar kes kakonyenekon; kinyek aiŋitun idekesiokee ebe, ‘Jjaanakinete atekerin nu ikecedekesio biai? Keswama eoŋ da kwape kwaŋin.’

³¹ Sirikiswamak kwaŋin EJAKAIT Ekonideke: naarai eswamakis ikecedekesio nuketal kere kaneejai EJAKAIT, nuelait ŋesi; naarai icweanakinete ikecedwe lusap ka lupesur mama ejaas idekesiokec.

³² “Ŋinikirot kere nakecorakini yes, ŋipeŋin iricete aiswamaenen: sirikiyatakis ace, karaida aiŋoŋoor ace.