Ikisila 1 - Ebaibuli

¹ Nu kes akiro nualimokini Musa Isirael kere okekwa loka Yorodan kamodiŋ, kotoma Araba naiteos kaSup, kidiŋ Paran, ka Topel, ka Laban, ka Kaserot, ka Di-sakab.

² Erai alosit naka apaarasia atomon kanadiopet anyoun koKoreb ibei moru Seir kiton Kades-barunea.

³ Kosodi kokaru loka akaisaoŋon, kolap lokitomonet ka lodiopet, kapaaran nasodit naka elap, abu Musa kolimok idwe luka Isirael kwape ajaatar kere nuabala EJAKAIT ŋes aicorakin kes;

⁴ Kedau aidany Sikon ekabaka loka Imorain, lueboiete koKesibon, ka Og ekabaka loka Basan loeboie koAsitarot, ka Ederei:

⁵ Kokekwa loka Yorodan kakwap naka Moab, abu Musa kogeu alimor ikisila lu ebe,

⁶ “Abu EJAKAIT Ewokodeke kotema oni koKoreb atiar, ‘Iboioto yesi noi koroŋat kalo:

⁷ Kibelokinos, kobwota, koloto akwap nakiukon naka Imorain, ka aiboisio kere nuidunyatar, Araba, akwap nakiukon, ka apuutona, ka Eŋalakimak, ariri naka aŋolol, akwap naka Ikanaanin, ka Lebanon, kiton ocor lokapolon, ecor Eupurat.

⁸ Koany, ebwaik akwap akonyenekus: kolomasi, kirumata akwap naabu EJAKAIT kiyapoik lukapapaakus, Aburaam, ka Isaak, ka Yakob, ainakin kes ka aurikec naetupanakini.’

⁹ “Abu katema yes kapak kaya ebe, ‘Mam eoŋ bon apedori adakite yes:

¹⁰ Abu EJAKAIT Ekusideke kitupuu yes, ido koany, isubito yesi lolo bala aacer nuka akuj kanuka aipues.

¹¹ Kitupuu EJAKAIT, Edeke loka lukapapaakus etiaikus lo irwan alukumit, kisirereŋ yes, kwape kisumunio yes!

¹² Ekwaikini eoŋ ai apedori bon adakit aitapasitoikus, ka alaŋirukus, ka epegetekus?

¹³ Koseutu ituŋa luecoak, luka aijen, ka luejenas, kwape ejaatar atekerinikus, adakakini eoŋ apolokinit yes.’

¹⁴ Ipotu koboŋokis eoŋ ebe, ‘Ejokuna sio aswam akirot nainer ijo.’

¹⁵ Kwaŋin abu kadakak lukapolok luka atekerinikus, ituŋa luecoak luejenas, araun lukipolokinito yes, ikapolok luka ilukumin, ikapolok luka akwat, ikapolok luka akaisakany, ka ikapolok luka itomon, ka ijaka, kwape ejaatar atekerinikus.

¹⁶ Abu kecorak ikatubokokus kapak kaya ebe, ‘Kopupoto akiro nuka iinacanakus, kotubokis kadolit etuŋanan ka onaeeke, ka imoit yenejai kaŋes.

¹⁷ Mam itiakito ituŋa kotube; ipupete ludidik ka luepolok kopone ediopet; mam ikuriakaros akonyen nuka ituŋanan; naarai erai etube loka Edeke: akirot nakitionikini yes iyaunete mamaka, apupuni eoŋ ŋes.’

¹⁸ Abu kecorak yes kapak kaya akiro kere nukibusakinito aswam.

¹⁹ “Kipou kaloto anyoun koKoreb, ketoroto amodiŋ ŋin kere naepol naesogim naipotu koanyut, korot loebei akwap nakiukon naka Imorain, kwape kecorakinitor EJAKAIT Edekewok; kadoloto Kades-barunea.

²⁰ Abu katema yes atiar, ‘Idolut akwap nakiukon naka Imorain, nakiinakinit EJAKAIT Edekewok.

²¹ Koany, ebwaiki EJAKAIT Edekekon akwap akonyenekon: kolot kirum, kwape kilimokinia EJAKAIT Edeke loka lukapapaakon; sirikikurianar, karaida ajuruŋuŋ.’

²² Ipotu kikunyut neajai, ŋinituŋanan kayesi, kotemasi atiar, ‘Ketiliŋaasi ituŋa, korotakis oni akwap, tetere kiinunete oni akirot naka erot lokibusakinit aitor, ka ireria lukidolokini.’

²³ Abu ketojok akirot ŋin: kaseu ituŋa itomon ka luarei, ediopetuŋanan kaŋiniteker:

²⁴ Apotu kibelokinos koloto oroŋat, kodoloto aditot naka Esukol, korotata.

²⁵ Kolemut araito nuka akwap kakaninikec, koinut oni, koinut da akirot ebe, ‘Ejok akwap nakiinakinit EJAKAIT Ewokodeke.’

²⁶ “Konye ipotu koŋeroto alosit, kipaliikis aicorakinet naka EJAKAIT Ekusideke:

²⁷ Ipotu kirurumata kowemanakus ebe, ‘Kanu naarai kilait EJAKAIT oni, ŋes kitolomunia kakwap nako Misiri, aijaikin oni akan naka Imorain, amudiar oni,

²⁸ Ai bo kilosi oni? acalasi iwokoinacan iwokotauon, ebe, “Epolok ituŋa, eojak da adepar oni; epolok ireria, ebwaitai da kiton akuj; bobo da kianyu odwe luka Anakim kaŋina.”

²⁹ Kasodi eoŋ atemar yes ebe, ‘Sirikiyaloŋoŋoto, karaida akurianar kes.

³⁰ EJAKAIT Ekusideke lokiŋarenikinit yes, ŋes kjiiikini yes kwape ejaatar kere nuabu kiswama kanukus koMisiri kakonyenekus;

³¹ Kamodiŋ da, neianyuniata kwape kidakio EJAKAIT Ekusideke yes, kwape edakia etuŋanan ikokuke, korotin kere luilosete, aitodol naidolunioto aibois na.’

³² Konye kakirot kaŋin, mam ipotu kiyuut EJAKAIT Ekusideke,

³³ Loabu kiŋarenikinite yes korot, amoikin yes aibois naibubukincte ikusiweman, kotoma akim kuare, aitodikin yes erot loitorete, kotoma odou da paaran.

³⁴ “Kopup EJAKAIT akusikiro, konyunyurikin, kiyapo ebe,

³⁵ ‘Abeit mam idiopet kotuŋa kalu luka aturi kana nakaronon eanyuni akwap naejok naeyapoik ainakin lukapapaakus,

³⁶ Dimarai Kaleb, okoku loka Yepune, ŋes eanyuni; ainakini ŋes ka ikedwe akwap naecak ŋesi: naarai atupa cut EJAKAIT.’

³⁷ Abu da EJAKAIT kanyunyurik eoŋ kanukus ebe, ‘Mam jo da ilomari ŋina:

³⁸ Yosua, okoku loka Nun, loebwoi kakonyenekon, ŋes elomari ŋina: kitogogoŋ ijo ŋes; naarai ŋes isurumi Isirael akwap.

³⁹ Bobo da ludidikikus, luibalasi yesi ebe eraunos imejan, ka idwekus, lumam lolo ejenete ajokis karaida aronis, kes elomarete, ainakini kes akwap, irumete.

⁴⁰ Konye yes, kibelokinos, koloto modiŋ korot loebei Aŋolol Nakareŋan.’

⁴¹ “Kosodete yesi aboŋokin eoŋ ebe, ‘Kidiaka isio kama ejai EJAKAIT, kilosi ejie, kwape ejaatar kere nukicorak EJAKAIT Ewokodeke oni.’ Ipotu koenata ŋinituŋanan lujiisike, koomitos araut akirot naebenen adokar oroŋ at.

⁴² Katema EJAKAIT eoŋ atiar, ‘Kolimok kes ebe, Sirikidokasi, karaida ejie; naarai mam eoŋ ajai kayes; kinyeis lukasurupokus aidany yes.’

⁴³ Abu kalimok yes kwaŋin, koŋeroto apupun; konye ipotu kipaliikis aicorakinet naka EJAKAIT, koŋasikinos adokar oroŋat.

⁴⁴ Kopotu Imorain lueboiete koroŋat kaŋol asurokin yes, korukioto yes, kwape erukio ao, kodanyata yes koSeir kiton Koruma.

⁴⁵ Ipotu koboŋut aimony akonyen nuka EJAKAIT; konye mam EJAKAIT abu kopup ekusiporoto, karaida aitoikin yes akit.

⁴⁶ Kwaŋin ipotu kiboioto koKades apaarasia nuipu, kwape ejaatar apaarasia nuipotu kiboioto kaŋina.