Igalatian 4 - Ebaibuli

¹ Konye abala ebe ekeruman naeriŋar erai ikoku, emamei atiaketait ka ebulesit, karaida kerai ejakait loka kere;

² konye eyaito ŋes ikedarak ka ikeŋadak aitodol apak naetetemit papake.

³ Oni da kwape kwaŋin, nakirokor kirai idwe, karaas ibulesin luka kanugeet nuka akwapin.

⁴ Konye naadolio apak naabeit, abu Edeke kijuk Okokuke, lokewuruuni aberu, lokewuruunio koyaito ikisila,

⁵ tetere elakuni ŋul lukeyaito ikisila, tetere oni kitaraunio odwe,

⁶ Ido naarai iraas odwe, abu Edeke kijuk Emoyo loka Okokuke otauonowok, loiworoi ebe, “Abba, Papa!”

⁷ Kanuka ŋun mam bobo irai ebulesit dimarai okoku, ido arai irai okoku, aso irai ekeruman kanuka Edeke,

⁸ Konye apak ya namam ijeniata Edeke, ipotu koraas ibulesin luka ŋul lumam eraas idekesio kauruunet;

⁹ konye kwana ijenut Edeke, konye aitelekarit ajenu Edeke yes, ikonakinete ai iboŋorete bobo mama ejaas nugeet nuekalanyaka ka nukibakor nuikotosi yesi kitubulesenoto bobo?

¹⁰ Iricito apaarasia, ka ilapio, ka apakio ka ikar da!

¹¹ Acoikinit akaitaaritoi kamakus kinyek araun natitai.

¹² Iinacan, keŋaiŋair yes, koraut kwape kaeoŋ, naarai arau eoŋ da kwape kayesi. Mam ipotu kikonakis erono kakirot kere;

¹³ konye ijenete ebe abu kalimonok yes Akiro Nukajokak irwan nasodit kanuka akalanyanut naka akuan;

¹⁴ ido karaida akakuan kerai acodunet kamakus, mam ipotu komwaŋata, karaida aiŋer eoŋ, konye ipotu kisukunyikis eoŋ kwape emalaika loka Edeke, kwape Kristo Yesu.

¹⁵ Aso ani bo akusiisirereŋikino? Naarai etogogoŋit nukus ebe, arai kepedor tikigorununut akusikonyen, koinakis eoŋ.

¹⁶ Arau kereka lokasurup kamakus kanuka alimonokin yes nukabeit?

¹⁷ Kikokotikinitos yes konye mere kotoma ajokis, dimarai kikotos agolor yes kiŋa, tetere yes ikokotikinete kes.

¹⁸ Konye ejok aikokotikinio duc kanuka akirot naejok, kwabo mere apak nakijaar eoŋ kayes bon.

¹⁹ Ikadwe, luariebar bobo bala nakedounon, aitodol naesubunere Kristo kotomakus,

²⁰ konye tikemuit ajaut kayes kwana, aijulakin ekaporoto, naarai abuonokin kanukus.

²¹ Kolimokinai, yes luikotos koyaito ikisila, mam kereka ipupete ikisila?

²² Naarai iwadikatai ebe ajaas Aburaam odweke iarei, ediopet loka abulesit, ediopet da loka naijakakai.

²³ Konye ŋol loka abulesit keurio kwape ejaar akuan, konye loka naijakakai kanuka aisumunet.

²⁴ Akiro ŋun eraas aput: naarai eraas aŋor ŋun aitutuketa aarei. Ebuni adiopet komoru Sinai, naeuriei kanuka ebulesene, ŋin ŋes Kagar.

²⁵ Kwabo Kagar na ŋes erai emoru Sinai kotoma Arabia; erianas ka Yerusalem loka tinenikwana; naarai erai ŋesi abulesit nenipe kikedwe da.

²⁶ Konye Yerusalem lokokuju ŋes naijakakai, ŋes ŋin totowok.

²⁷ Naarai iwadikatai ebe, “Kolakar ijo arakan namam iwuriei, Kodelo, kiworo ijo namam irieba aidoun, Naarai ipu idwe luka naejalakinitai aitelekarit luka ŋin naejai ekiliokit.”

²⁸ Konye iinacan, kirai oni idwe luka aisumunet, kwape ka Isaak.

²⁹ Konye kwape kolo abu ŋol loawurio kwape ejaar akuan koreitor lokeurio kwape eiaar Emoyo, kwape kwaŋin kwana da.

³⁰ Konye ebala ai naiwadikatai? Ebe, “Kireŋea abulesit ka okokuke, naarai mam okoku loka abulesit irumete kikoku loka naijakakai.”

³¹ Aso iinacan mam kirai idwe luka abulesit, dimarai luka naijakakai.