Igalatian 3 - Ebaibuli

¹ Okwe yes Igalatian luemamei acoa! Iŋai bo kilemelem yes, luaponi Yesu Kristo kolimonokinai kaitebeikin kakonyenekus?

² Akoto aisisia akirot na bon kamakus; Idumut kereka Emoyo kanuka aswamisio nuka ikisila, arai bo kanuka aiirar kaiyuun?

³ Iraas kereka luemamei acoa kwaŋin? Naigeuniata ka Emoyo, iŋetakinete kereka kwana kakuan?

⁴ Iriebas nuetia nen atitai?—arai bo erai atitai.

⁵ Ŋol lokiinakini yes Emoyo, loiswamai da nukapedor kotomakus, iswamai kereka kanuka aswamisio nuka ikisila, arai bo kanuka aiirar naka aiyuun?

⁶ Kwape kiyuunitor Aburaam Edeke, ido kimarakinai ŋes araun adolit.

⁷ Aso kojenutu ebe ŋul Iuka aiyuun, kes eraas odwe luka Aburaam.

⁸ Kwabo naki wadikatai naeanyunia sek ebe itojoki Edeke Imo araun luedolito kanuka aiyuun, abu kolo kolimonok Aburaam Akiro Nukajokak ebe, “Isirereŋio atekerin kere kotomakon.”

⁹ Aso ŋul luka aiyuun isirereŋitoi nepepe ka Aburaam lokerai ekeyuunan.

¹⁰ Naarai kere lueraas luka aswamisio nuka ikisila ikenitoi; naarai iwadikatai ebe, “Kikenoi ŋin kere yenimam ericenenei akiro kere nuiwadikatai oitabo loka ikisila, aiswamaenen kes.”

¹¹ Aso idelelei ebe emamei ituŋanan yenitojokio kakonyen nuka Edeke kotoma okisila; naarai ebe, “Ejari ikadoliton kanuka aiyuun.”

¹² Konye ikisila mam eraas kanuka aiyuun, konye ebe, “Yeniswamai kes ejari kanukec.”

¹³ Abu Kristo kolaku oni kama kekenit loka ikisila, nakeraunia ekenit kanuwok, naarai iwadikatai ebe, “Kikenoi ŋin kere yenikajakinitai okitoi.”

¹⁴ Tetere edoikini Imo arereŋ naka Aburaam toma Yesu Kristo, tetere kidumuni aisumunet naka Emoyo kanuka aiyuun.

¹⁵ Iinacan, enera kopone loka etuŋanan; emamei yenitapalauni aitutuket naka ituŋanan naitogogoŋitere, karaida aiyat akiro.

¹⁶ Aponi kolimokinai Aburaam aisumuneta, ka aurike da. Mam inera ebe, Auriarikon, bala keraas luipu, dimarai bala kerai ediopet, “Aurikon”, ŋes Kristo.

¹⁷ Konye naenera nata ebe, mam ikisila itapalaunito aitutuket naitogogoŋit Edeke sek ikaru akwat aoŋon ka akaisauni eriŋa ikisila ejauna, ŋes mam itamamauniata da aisumunet.

¹⁸ Naarai arai kerai airumet kanuka ikisila, mam bobo erai kanuka aisumunet; konye abu Edeke koinak Aburaam airumet kanuka aisumunet.

¹⁹ Aso inyo bo ikisila? Aponi kiyatakinai kanuka aibucanareta, kiton naebunio aur nakisumunitere; kicorakinitai kanuka imalaikan kakan naka ekadiekan,

²⁰ Konye ekadiekan mam erai kanuka ediopet, kwabo erai Edeke ediopet.

²¹ Aso esurokinete kereka ikisila aisumuneta nuka Edeke? Madi akuj! Naarai arai keinakinitai ikisila luepedorete ainakin aijar, abeit tikerai adolit kanuka ikisila.

²² Konye agoloki naiwadikatai iboro kere toma adiakar, tetere einakinio luiyuunito aisumunet kanuka aiyuun Yesu Kristo.

²³ Aso eriŋa aiyuun kebuno kiyaito ikisila kigolokinitoi kiton naepukorere aiyuun,

²⁴ ŋes eraatar ikisila ekeŋarenikinoniwok mama ejai Kristo, tetere kitojokio araun luedolito kanuka aiyuun.

²⁵ Konye kwana adolu aiyuun mam bobo kiyait ekeŋarenikinon,

²⁶ Naarai iraas kere odwe luka Edeke kanuka aiyuun kotoma Kristo Yesu.

²⁷ Naarai yes kere lukibatisatai kotoma Kristo, inapata Kristo.

²⁸ Emamei Eyudayat karaida Eyonanit, emamei ebulesit karaida loijakakai, emamei lokiliokit karaida naberu, naarai iraas yesi kere idiopet kotoma Kristo Yesu.

²⁹ Ido arai iraas luka Kristo, aso iraas aur naka Aburaam, ikerumak da kwape ejaar aisumunet.