Igalatian 2 - Ebaibuli

¹ Kosodi akaulo naka ikar itomon kaluoŋon abu kadoka bobo Yerusalem, nepepe ka Baranaba, kayaŋaasi da Tito nenipe kasio,

² Konye abu kadoka kanuka apukokinio; ido abu kapesik kes Akiro Nukajokak nualimonokinit Imo, konye kaiyeiyea kakonyen nuka ŋul kaluecamunitai, kenyek asubit bala akeri, arai bo abu kaker atitai.

³ Konye Tito da lokijaa keoŋ, karaida erai Eyonanit, mam kitiŋaikinitai akepio.

⁴ Konye kanuka iinacan lukeŋalak lukitolomunitai kaiyeiyea, lualomunito airot aosikiniowok nakijaar kotoma Kristo Yesu, tetere kitubulesenete oni,

⁵ mam kipou kacamut anonokikin kes nepecep da, tetere kisalakini yes abeit naka Akiro Nukajokak.

⁶ Konye kama kaŋul kaluecamunitai araut lukapolok, (kwape ejaatar kesi, mam eoŋ apodo; mam Edeke etiaki kotuŋa), mam ŋul luecamunitai apotu keyatakis eoŋ adiokirot,

⁷ konye kepuwai nakeanyuniata ebe aponi ketitiŋi Akiro Nukajokak alimonokin lumam ekepitai, kwape Petero da luekepitai,

⁸ (naarai ŋol loiswamakinit Petero ekiyakiane mama ejaas luekepitai, ŋes keswamakinit eoŋ da mama ejaas Imo,)

⁹ nakejenuniata da asianut nakainakinitai eoŋ, apotu Yakob, ka Kepa, ka Yokana, luecamunitai araut ipirin, kainakis eoŋ ka Baranaba akan nakoteten naka eidicane, tetere kilosi isio mama ejaas Imo, konye kes mama ejaas luekepitai.

¹⁰ Konye kokotosi sio aiitunite, lukican, akirot ŋin da nakadunyakinit aswam.

¹¹ Konye nakebunio Kepa Antiokia, abu kerebok ŋes atereikina, naarai kitelekarito ŋes akiro.

¹² Naarai eriŋa ituŋa ice epona kama ka Yakob, abu komor ainyam nepepe ka Imo; konye nakedolunioto kesi, abu kikunya kogitar bon, ekuriana luekepitai.

¹³ Kijoseikis da lyudayan ice kere nepepe kaŋes, kiton Baranaba da ayaŋaario kesoswaikec.

¹⁴ Konye naabu kaanyunia ebe mam kes etenete kabeit naka Akiro Nukajokak, abu kalimok Kepa kakonyenekec kere ebe, “Arai jo loirai Eyudayat, itupi iponesio luka Imo, kwabo mam itupi luka Iyudayan, ikwaikini ai itiŋaikini Imo atupar iponesio luka Iyudayan?”

¹⁵ Isio lukirai Iyudayan kauruunet kwabo mere Imo lukadiakanarak,

¹⁶ konye kijeni ebe mam ituŋanan itojokio araun yenedolit kanuka aswamisio nuka ikisila, dimarai kanuka aiyuun Kristo Yesu, isio da kipou keyuut Kristo Yesu, tetere kitojokio araut luedolito kanuka aiyuun Kristo, kwabo mere kanuka aswamisio nuka ikisila; naarai kanuka aswamisio nuka ikisila emamei yenejai akuan yenitojokio araun yenedolit.

¹⁷ Konye arai nakimootor aitojokio araun lukidolit kotoma Kristo, kitakanuni kirai ikadiakanarak, erai kereka Kristo ekejaanakinan loka adiakar? Madi akuj!

¹⁸ Naarai arai aduki bobo ŋun nuabu kamudia, etogogoŋi ebe arai ekebucaran.

¹⁹ Naarai kanuka ikisila abu eoŋ katwana mama ejaas ikisila, tetere ajari mama ejai Edeke,

²⁰ Aponi kebubukin nepepe ka Kristo; konye ajari, kwabo mere bobo eoŋ, konye ejari Kristo kotomakaŋ; aijar da naajaria kwana toma akuan, ajari toma aiyuun Okoku loka Edeke lokamina eoŋ, lokijaikin bon da kanukaŋ.

²¹ Mam etapalauni asianut naka Edeke; naarai arai ejai adolit kanuka ikisila, aso atwana Kristo atitai.