Iburayon 4 - Ebaibuli

¹ Aso, naeriŋar aisumunet naka alomar aibworareteke esalit, kakuriakaros, kinyek idio kayesi atakanun mam edolokinit.

² Naarai oni da kilimonokinitai Akiro Nukajokak kwape kakesi; konye akirot nakiirarete mam abu koinu kes ajokis, naarai mam aponi kimorikikinai kotoma aiyuun nepepe kaŋul luapotu kiirasi.

³ Naarai oni lukidau aiyuun, kilomari toma aibworaret ŋin, kwape abalar ebe, “Kwape keyapoikinia kakanyunyura ebe, ‘Mam cut elomunete aibworareteka,’ ” karaida apotu aswamisioke kodaunos ameun kageunet naka akwapin.

⁴ Naarai ejai neinerar nuka apaaran nakikanyetekaarei ebe, “Abu Edeke kibwora kapaaran nakikanyetekaarei, kotoma aswamisioke kere.”

⁵ Bobo da kotoma kana ebe, “Mam cut elomunete aibworareteka.”

⁶ Aso naarai esalit ice alomar tomake, ka ŋul da luageunete alimonokinio akiro nukajokak mam elomarete kanuka aiulanut,

⁷ bobo etiaki ŋesi apaaran ace, ebala kama ka Daudi ketubor apak naetia nen, ebe, “Lolo,” kwape abalar sek ebe, “Lolo arai kiirasi ekeporoto, Sirikitininikata ikusitauon.”

⁸ Naarai arai kisiyenunit Yosua kes, timam kinera nuka apaaran ace akaulo kapaarasia kaŋun,

⁹ Aso esalit aibworaret naka asabato mama ejaas ituŋa luka Edeke;

¹⁰ naarai yenelomari aibworareteke, eyenu do ŋesi da kotoma aswamisioke, kwape abu Edeke da kiyenunia kotoma nukeŋ,

¹¹ Aso kadunyakis alomar aibworaret ŋin, kinyek Idiotuŋanan aibirokin opone ŋol loka aiulanut.

¹² Naarai erai akirot naka Edeke nakajaran, nakapedor da, ekwana adepar ŋolikileŋ loekwana kowaitin kere, ipelori da kiton aitiak aijar ka emoyo, ailenyeta ka asum, emisiikin da aomisio ka nuelosikinit etau.

¹³ Kwabo emamei isubat yenimam etakani kakonyeneke, konye imujalalas iboro kere, ido ideleleete kakonyen nuka ŋol loejaas akirowok.

¹⁴ Aso naarai kija ka esasedoti lopeti lokapolon, lokelomari toma akuj, Yesu Okoku loka Edeke, keketakis noi alimoriwok,

¹⁵ Naarai emamei oni esasedoti lopeti lomam epedori arieba nepepe kaoni akalanyanutuwok, konye lokecodunio kakiro kere ariaka kaoni, komam adiakar.

¹⁶ Aso kekunyakis katitiŋ mama ejai eicoloŋ loka asianut, tetere kitimio, kadumutu da asianut nakinarakini oni kapakio nuka eipud.