Iburayon 3 - Ebaibuli

¹ Aso, iinacan lukalaunak, luimorete anyaraunio nakokuju, koomoomata Yesu, Ekiyakia ido Esasedoti lopeti lokilimonori oni.

² Kerai ŋesi lomunot mama ejai ŋol loaseuni ŋes, kwape Musa da keraar lomunot kotogoke kere.

³ Naarai ibusakinit Yesu ainakinio aibuses naepol adepar Musa, kwape edumunia loeduki etogo ayoŋio adepar etogo.

⁴ Naarai ejai ŋolitogo ekadukonike, konye loaduki kere ŋes Edeke.

⁵ Musa da kerai lomunot kotogoke kere kwape ebulesit, kanuka aitejenun nuepote ainerio,

⁶ konye Kristo kerai lomunot kotogoke kwape okoku. Kirai oni etogoke, arai kikamuni kagogoŋ ati tiŋ ka aolobobot naka amun kiton awasia.

⁷ Aso kwape ebalar Emoyo Lokalaunan ebe, “Lolo, arai kiirasi ekeporoto,

⁸ Sirikitininikata ikusitauon, kwape toma aitunyunyurikinio, Kwape kapaaran naka acodunio toma amodiŋ,

⁹ Nakakoduniata eoŋ lukapapaakus, ketemo, Koanyutu da akaswamisio ikar akaisaoŋon.

¹⁰ Ŋes abu kanyunyurikinia atur ŋin, Kabala ebe, ‘Epaarete apaarasia kere kotauonokec; Komam ejenete ikarotin,’

¹¹ Kwape keyapoikinia kakanyunyura ebe, ‘Mam cut elomunete aibworareteka.’ ”

¹² Kocoito, iinacan, kinyek ajaun kotoma idio kayesi etau loerono lomam iyuunit, lokitonyouni kama ejai Edeke lokajaran.

¹³ Konye kicorenenas ŋinipaaran, naeriŋar enyaritai “naka lolo”, kinyek aiŋal naka adiakar aitininik idio kayesi.

¹⁴ Naarai kirau ikamorak luka Kristo, arai kikamuni kagogoŋ ageunet naka amunowok kiton awasia.

¹⁵ Kwape eriŋar inerai ebe, “Lolo, arai kiirasi ekeporoto, Sirikitininikata ikusitauon, kwape toma aitunyunyurikinio.”

¹⁶ Naarai lukaŋai bo kiirarete, kitunyunyurikisi? Mere kereka ŋul kere luanyounete koMisiri kanuka Musa?

¹⁷ Ido lukaŋai bo luabu konyunyurik ikar akaisaoŋon? Mere kereka ŋul luapotu kodiakas, lukibirokinos akecetesin amodiŋ?

¹⁸ Ido lukaŋai bo luabu kiyapoik ebe mam cut elomarete aibworareteke, nabarai ŋul lueulakinete?

¹⁹ Ido kianyu ebe mam apotu kopedosi alomar kanuka amamus aiyuun.