Iburayon 10 - Ebaibuli

¹ Naarai ejai ikisila etoribe loka ajokisio nuepote, kwabo mere aput obe naka akiro kaŋun, mam epedorete cut aitodolikin ŋul luikunyakinete, kanuka asuban ŋupeŋun nueinanakinete tiritir, ŋolikaru ŋolikaru.

² Arai mere kwaŋin, mam ti do kinyeis ainanakin? Naarai luemaete naedauniata aitesegario cut irwan atipet, timam bobo kilepilep adiakar.

³ Konye kotoma asuban ŋun ejai aisiitunio adiakanareta ŋolikaru, ŋolikaru.

⁴ Naarai mam epedorete aokot nuka imoŋin ka akinei alemar adiakanareta.

⁵ Naarai naalomunia Kristo toma akwapin abala ebe, “Mam ibu kokoto asubanit ka ainakinet, Konye ibu kitemok akuan kanukaŋ;

⁶ Mam isiyalamikinit ainakineta nuicweio, karaida ainakineta nuka adiakar,

⁷ Kasodi kener ebe, ‘Koany, abu eoŋ,’ (Iwadikatai nukaŋ oitabo lonunuko) ‘Aswam nuikoto ijo, wu Edeke.’ ”

⁸ Naarai naenerar kokuju ebe, “Asuban ka ainakineta ka ainakineta nuicweio, ka nuka adiakar, mam ibu kokoto, karaida aisiyalamikin,” (ŋun kes nueinanakinio kwape ejaatar ikisila),

⁹ kosodi konyet einer ebe, “Koany, abu eoŋ aswam nuikoto ijo.” Elemari nasodit tetere iticasi nakiareit.

¹⁰ Kotoma akot kaŋin aponi oni kitalaun kanuka ainakinet naka akuan naka Yesu Kristo irwan atipet bon.

¹¹ Ŋolisasedoti da ebwoi ŋinipaaran kotoma aijaanakinike, icebokinit ainanakin asuban ŋupeŋun, numam cut epedorete alemar adiakanareta.

¹² Konye nakedaunia Kristo ainakin asubanit adiopet kanuka adiakanareta naedauni ikar kere, kosodi kiboikin akan nakoteten naka Edeke,

¹³ ameuni kanen idareunit aitodol naibwaikinere lukasurupoke araun iicoloŋ yenika akeieke,

¹⁴ Naarai kotoma ainakinet adiopet abu kitodolik luitalaunio kiton ikar kere.

¹⁵ Emoyo Lokalaunan da itejenari nuwok, naarai naadaunia einer ebe,

¹⁶ “Ebala Ejakait ebe, Na ŋes aitutuket naetutuki kakes, Akaulo kapaarasia kaŋun, Epikakini ikakisila otauonokec, Ewadikakini da aomisiokec.”

¹⁷ Kosodi konyet ebala ebe, “Mam bobo eituni adiakanaretakec ka epalikec.”

¹⁸ Konye napejaar alemario ŋun, mam bobo einakinio asubanit kanuka adiakar.

¹⁹ Aso iinacan, naarai kija katitiŋ alomar toma aibois nakalaunan kanuka aokot nuka Yesu,

²⁰ kotoma orot lokitetet ka loejari da, lokicilakini oni kotoma aigalisit, ŋes atemar ebe, akekuan,

²¹ ido kwape kijaar kesasedoti lokapolon loeyait etogo loka Edeke,

²² kekunyakis ketau lokabeit, ka aiyuun naedoliorit cut, kobwatai itauonowok da ainyein aomisio nueroko, kiloŋai da awatewok kakipi nuelaete.

²³ Keketakis alimor amunowok komam kiriaŋiriaŋa, naarai lokisumunit erai lomunot.

²⁴ Kaomoomas aisinyikokin bonik ka bonik amin ka aswam nuejokuka,

²⁵ kenyeis apalun atukonokin nepepe, kwape iswamaata ice, konye kecoras; ido keyatanakinito ŋun kwape ianyuniata apaaran ŋin eyapuunit adolun.

²⁶ Naarai arai kilosikinit adiakanar nakiidaunia ainakinio ajenun abeit, mam esalit bobo asubanit kanuka adiakanareta,

²⁷ dimarai aidarit kakurian atubokinio, ka adedeŋ naka akim naebunit aicwe lukasurup.

²⁸ Yenemwaŋi ikisila luka Musa etwani komam itimio, kanuka ikajenak iarei arai iuni.

²⁹ Iwomito biai, nanyoin aiticanet naitelekarit noi naibusakinit ituŋanan yenipudapudai Okoku loka Edeke, komunaa da aokot nuka aitutuket, nuapotu kitalaut ŋes, komor da Emoyo loka asianut?

³⁰ Naarai kijeni ŋol loabu kiner ebe, “Enyaŋit ŋes lokaŋ, eoŋ ataci.” Bobo da ebe, “Irabakini Ejakait iketuŋa.”

³¹ Erai akirot naesogim aibirokin akanin nuka Edeke lokajaran.

³² Konye kiitutu apaarasia nukolo, naidauniata ainwakakinio, nuititiŋikinioto aut naepol naka aisiriebio,

³³ acepakio araun lusesena kanuka amoromor ka areio, acepakio da naimorianakinotor kaluiswamakinio ŋun,

³⁴ Naarai ipotu kitimoto ienan, ido ipotu kotitiŋikis kalakara aŋatario naka ikusiboro, kojenete ebe ejaas yes iboro luejok adepar ido lueperonorete.

³⁵ Aso sirikicakasi atitinikus, naejai eropit loepol.

³⁶ Naarai ipudasi atitiŋikin, tetere iswamaete nuekoto Edeke, kosodete kijaut naisumunitai.

³⁷ “Naarai eriŋa esalit apak naedit noi, Kosodi loebuni ebuni komam itumor;

³⁸ Konye ekadolitonika ejari kanuka aiyuun, Ido arai eboŋori kau, Mam ekatau elelakinit ŋes.”

³⁹ Konye mam oni kirai lukibonori kau toma amudiario, konye kirai luka aiyuun kanuka aitajar aijar,