Ekosio 7 - Ebaibuli

¹ Eiokuka ca ma akonikeie kotoma amuk, Ijo akoku naka lokapolon! Amurwosikon nupakir esubito bala iboro luka akais nuipu, Aswam naka akanin nuka ekeswaman loepiriana.

² Aipulekon esubit bala aikopo naeieuna, Namam etwaniarit ebino loinyalakinitai: Akoikikon esubit bala atukit naka akima, Naelukunito apecelun.

³ Esubito ikisinakon bala ikalei iarei Lumwatok luka amori.

⁴ Esubit emurisinikon bala etogo loeoia loka ikel luka etom; Esubito akonvekon bala ataparin nuka Kesibon nuejaas orute loka Bat-rabim; Esubito ikumesikon bala etogo loeoia loka Lebanon Loesesenas ka Damasiko.

⁵ Esubit akoukon kotomakon bala Karamel, Esubito da itima luka akoukon bala lumugeik; Ikamuni ekabaka kaicipetakec.

⁶ Itemelel ca ma ijo, isiyalamikinit da, Ŋo naminat, nakalakar!

⁷ Esubit aojaukon na bala edukudukut, Ikisinakon bala aibuneta nuka emusabibu.

⁸ Kener ebe, Adokar odukudukut ŋ ol, Ketin atenunake:

⁹ Kosubito ikisinakon bala aibuneta nuka emusabibu, Aures naka eiyeijanekon bala alam. Kosubite aitukukon bala ebino loitelekarit kaiokis, Loitololoor lominataka, Loidiririei kaituke nuka ŋul kaluejotoete.

¹⁰ Arai eoŋ naka lominataka, Aiŋ obeleke da ejai neajar,

¹¹ Kobia, lominataka, kaloto amanat; Kapero oreria.

¹² Kadiloto omanikoria luka emusabibu: Kaanyut arai iburukunyit emusabibu, eterara da aketur, Arai ituroto akamamagan: Kainak kaŋina aminaka.

¹³ Eurok ma aiduduma, Okekiawok da ejaas araito nuka akais nuipu nuka iponesio kere, Nukitetiak ka numoion da, Nukenadakinit jo, lominataka.