Ekosio 2 - Ebaibuli

¹ Arai eoŋ aturot naka Saron, Apecel naka aditon.

² Kwape apecel kotoma okukwa, Ikoni nen naminataka kotoma apesur.

³ Kwape kelamai kokito lukomanikor, Ikoni nen lominataka kotoma otelepai. Abu keboikini kotolimike kaiyalama naepol, Koiiiimikis araitoke aanyigolika,

⁴ Kayanau togo lokepucit, Emederake kokuiukan ŋes amin.

⁵ Kigaŋ ai kimusabibun lueokito, kitalakarai kalam: Naarai ketedek amin.

⁶ Koiai akekan nakokediany akouka, Katunite kakekan nakoteten.

⁷ Kesiyapoi yes, wu apesur nuka Yerusalem, Kalimit amorio, ka amiameik nuka ais, Kinyeis aisidik arai aitwekenyun amin, Aitodol neakotokinor.

⁸ Eporoto loka lominataka! Koany, ebunit, Etaci koronan, icuro koukon.

⁹ Esubit lominataka bala amori arai amiam nadidi: Koany, ebwoi kokau karwatatakosi, Eseseni kotoma adirisan, Ireonokini kapedon.

¹⁰ Kiner lominataka, katema atiar, “Konyou, naminataka, atemeleka, kaloto.

¹¹ Naarai koany, atubor aiporo, Adaun akiru, alot;

¹² Atakanut aturo kakwap; Adolut apaarasia nueyeioto akweny, Epupunio eporoto loka adudumer kakwapuwok;

¹³ Itokoni etini araitoke, Ituroete imusabibun, Euruuni asakatakec. Konyou, naminataka, atemeleka, kaloto,

¹⁴ Wu ajeleka, naejai toma acilana nuka atiiba, Toma aŋopis naka aibois naimukurur, Kaany ma akonyenekon, kapup eporotokon; Naarai ejok ekoniporoto, akonikonyen da nuitemelelas.

¹⁵ Kikamakinai ikuei, ikuei ludidik luemunaunete imanikoria luka emusabibu: Naarai ituroete imanikoriawok.”

¹⁶ Lominataka ŋes lokaŋ, eoŋ da nakeŋ: Itadakenenei esipanike neeiaas apecelun.

¹⁷ Aitodol naeriripio apaaran, ilicaros itolimo, Kibelokin, lominataka, koput kwape amori arai amiam nadidi Koronan luka Beter.