Ekalimonokinan 11 - Ebaibuli

¹ Kocakanakini ikoninyamat akipi: Naarai ianyuni kes ketuboros apaarasia nuipu.

² Koinak akorakinet mama ejaas ikanykaarei, eebo, kiton ikanykauni; Naarai mam iieni aronis anyoin ejaun toma akwap.

³ Arai kibwala idouon akiru, Kotepete toma akwap: Arai kibiror ekitoi da ari naka eŋalakimak, arai agolitomei, Aibois ŋipeŋin naebirokin, nepenen eperio.

⁴ Loeseseni ikwamin mam eyei; Loeseseni idouon da mam edwenyi.

⁵ Kwape mam ijenia erot loka ekwam kwape ejaar, karaida akoio kwape epolooto kotoma aliliget naka akapotion; kwape kwaŋin mam ijenia aswam naka Edeke loiswamai kere.

⁶ Koyeenenei ikonikinyom tupuruc, eboŋ da sirikitikok akonikan; naarai mam iieni kakesi luikemerete, arai lu arai nul, elemuni eriakakinos kere araun luejok.

⁷ Abeit ejok aica, ido erai naka aiyalama akonye asesen akoloŋ.

⁸ Eebo, kebut ituŋanan ikar luipu, kisiyalamikina kakes kere; konye kiitunite kereka apaarasia nuka amuton, naarai eraunos nuipu. Kere nuepote eraas aamameak.

⁹ Kisiyalamikinite akonitumun, ijo esapat; kitalakaanar ekonitau kapaarasia nuka akonitumun, kolosenenei korotin luipuda ekonitau, kasesen da naks akonikonye: konye kojen ebe kitubokini rwaru Edeke kanuka nun kere.

¹⁰ Aso kolema aiturur kere kotaukon, kolema da aronis kakuanakon: naarai atumun ka akurunan eraas aamameak.