Daniel 9 - Ebaibuli

¹ Kokaru losodit loka Dario okoku loka Akasuero, loka aur naka Imedin, loaraun ekabaka loka ajakanut naka Ikaludean;

² kokaru losodit loka airumiteke abu eoŋ Daniel kajenu kanuka iitabon etiai loka ikar luibusakinit atubor aitodolikin aimejeikin naka Yerusalem kwape ejaar akirot naka EJAKAIT mama ejai enabi Yeremia, kes ikar akaisakanykaarei.

³ Kagipa mama ejai EJAKAIT Edeke, amoot ailip, ka aiŋaiŋa, kekanyi eteŋei, kanapite epuko ka ekurwon.

⁴ Kelip EJAKAIT Ekadeke, kalimo, kenera ebe, “Wu EJAKAIT Edeke lopeti, loketasuro, loitodoli aitutuket ka aitim mama kanul lueminas ŋes korieito da akeicorakineta;

⁵ Kidiaka isio, kiswama nukepali, kikwaik erono, kipaliiki isio apaar ainyein aituutooretakon, ka itubesiakon.

⁶ Mam kipou keirasi ikonibulesin inabin, luapotu kinerasi kokirorikon mama ejaas ikabakanakosi, ka ikapolokokosi, ka lukapapaakosi, ido mama ejaas ituŋa kere luka akwap.

⁷ Wu EJAKAIT, adolit ŋes nakon, konye do kirumito sio ileje, kwape lolo; ituŋa luka Yuda, ka luibojete koYerusalem, ka Isirael kere, lueapiete ka luelwaka, anatar akwapin kere nukireneari ijo kes, kanuka adiakaret naadiakasi mama ijai ijo.

⁸ Wu EJAKAIT, kirumito sio ileje, ikosikabakan, ka ikosikapolok, ka lukapapaakosi, naarai kipou kadiakasi kamakon.

⁹ Aitim ka aisioni eraas nuka EJAKAIT Ekosideke; karaida kipou kepaliikis ŋes:

¹⁰ kwabo mam kirimarit eporoto loka EJAKAIT Ekosideke alosenen okisilake, lukibwaikin kakonyenekosi kobulesinike inabin.

¹¹ Eebo, ebuca Isirael kere ikonikisila, apaasi, kinyeis arimar ekoniporoto: ŋes kibukokinere ekenit ka aiyaposit naewadikatai okisila luka Musa ekeiaanakinan loka Edeke; naarai kidiaka kamake.

¹² Kitogogon ŋesi akekiro, nuenera aluikin sio, ka ikatubokokosi lukitubonokinete sio; nakiinunia sio aronis naepol: naarai kwap kakuj kere mam apeŋo iswamakinitai kwape eswamakinere Yerusalem.

¹³ Kibunok sio aronis na kere, kwape iwadikatere okisila luka Musa: kwabo mam kipou kenainaata asianut naka EJAKAIT Ekosideke, kajalata numam adolitekos, kamisiikis akonibeit.

¹⁴ Kanuka nun kirerei EJAKAIT aronis, koinu mamakos: naarai edolit EJAKAIT Ekosideke kakeswamisio kere nuiswamai, mam da kipou karimasi ekeporoto.

¹⁵ Kwana da, wu EJAKAIT Ekosideke, lokitolom ikonituŋa kakwap nako Misiri kakan nakagogon, ido ibu kodumunia ekiror, kwape lolo; kidiaka isio, kiswama nueroko.

¹⁶ Wu EJAKAIT, kwape ejaar adolitekon kere, kenainait, kibelok anyunyurakon ka aisiopokon anyoun korekon Yerusalem, eronatakon lokalaunan: naarai kanuka aronisiokosi ka numam adolit nuka lukapapaakosi, aluor Yerusalem ka ikonituŋa amorosit mama ejaas nul kere lukirimorito,

¹⁷ Aso do, wu EJAKAIT Ekosideke, kiira ailip naka ebulesitikon, ka ainain ake, kitacaik akonikonyen aiboisikon nakalaunan naesil, kanuka EJAKAIT.

¹⁸ Wu Ekadeke, kitoik akonikit, kopup; kokweny, kosesen amejeikosi, ka ere loemaikinitai ekonikiror: naarai mam kiyauni ainainakosi akonyenekon kanuka adolitekosi, konye kanuka akoniitim naepol.

¹⁹ Wu EJAKAIT, kiira; wu EJAKAIT, kisioni: wu EJAKAIT, kopup, kiswama; sirikiyap; kanukon, wu Ekadeke, naarai emaikinitai erekon ka ituŋakon ekonikiror.”

²⁰ Kosodi napenerar, elipi, alimori da akaronis ka aronis naka ikatuŋa Isirael, ayait da aiŋaiŋaka akonyen nuka EJAKAIT, Ekadeke kanuka eronat lokalaunan loka Ekadeke;

²¹ Eebo, eriŋa enera kailip, aponi kitoporounoi katipet etuŋanan Gaburiel, loabu kaany kaitapoet kageunet, kikuny kapak naka ainakinet naka atiboŋ.

²² Ketejenik, kiner keoŋ, kotema atiar, “Ŋo Daniel, alom eoŋ kwana aitedesiar jo toma aijen,

²³ Ageunet naka aiŋaiŋakon kolom aicorakinet, abunit eoŋ da alimokin jo: naarai kiminai noi: asa koomoom akirot, kojen aitapoet.

²⁴ “Ecorakin asabaton akaisakanykaarei otunakon korekon da lokalaunan, aitanan adiakar, adaun da aronisio aitulue numam adolit, ainun adolit namam enaŋi, aipue da aitapoet ka enabi, ainyonyoikin da aibois nakalaunan noi akinyet.

²⁵ Aso do kojen komisiik, ageun naalomunia aicorakinet ainyakar ka aiduk Yerusalem kiton ekapolon loinyonyoikinio akinyet, ejaunos asabaton akanykaarei: asabaton da akaisakanykape ka nuarei, kodukoi bobo, irotin ka arwatatin, konye kapakio nuka ican.

²⁶ Ketuboros asabaton nun akaisakanykape ka nuarei, emudiario loinyonyoikinio akinyet, mam ejaun kibore: emudiarete ituŋa luka ekapolon loebuni ere ka aibois nakalaunan; ejaun esaneke kakalele, ejaunos da ijiisio kiton osaŋe; epeleikinitai aisimejeikin.

²⁷ Itogogoni ŋesi aitutuket kaluipu adaun asabato adiopet: itanani asubanit ka ainakinet atutubet naka asabato; ebuni da ŋol loisimejeikini kabebenok naka italesio; aitodol neebukokinere esaŋe loepeleikinitai mama ejai loisimejeikini.