Daniel 5 - Ebaibuli

¹ Kipoik ekabaka Belesasar elukumit loka ijakake epucit, komat ebino kakonyen nuka elukumit ŋol.

² Kiir ŋesi ebino, kicorak Belesasar ayaun iboro luka esabu ka luka epuesa luabu Nebukadenesar papake konat koyekalu loajai Yerusalem; tetere emasi ekabaka ka ijakake, ka akenor ka akebusian da kotomakec.

³ Aponi koyaunai iboro luka esabu luaponi konatarai koyekalu loka etogo loka Edeke loajai Yerusalem; komasia ekabaka ka ijakake, ka akenor ka akebusian da.

⁴ Komasete ebino, kituritos idekesio luka esabu, ka luka epuesa, ka luka aisinin, ka luka asua, ka luka akito, ka luka amor da.

⁵ Kosawa kanol kotakanut ibokor luka akan naka etuŋanan, kiwadik kinaren kepir loka atala, karwatat naeladatai naka etogo lokapolou loka ekabaka: koany ekabaka atutubet naka akan naewadikai.

⁶ Kosodi kijulakinos akonyen nuka ekabaka, kisiyalononoto ŋes akeomisio; komaranata akojo nuka itulinike, koretonokinos akekunin,

⁷ Kiworo ekabaka aitolomun ikasupok, Ikaludean, ka ikadwarak. Kotema ekabaka lukacoa luko Babulon atiar, “ŋin yenepedori asoman nuiwadikatai nu, ka aitodikin da eoŋ apoloukec, kitanapai lomuge, erikot da loka esabu omurisiŋike, eraun ekayaiton lokiwuniet loka ajakanut,”

⁸ Kolomutu do lukacoa kere luka ekabaka: konye mam apedorete asoman nuiwadikatai, karaida aitejenikin ekabaka apolouke.

⁹ Kosodi kiyalonoŋ ekabaka Belesasar noi, kijulakinos akekonyen, kobuonokinos ijakake.

¹⁰ Kolom akabaka togo loka epucit kanuka akiro nuka ekabaka ka ijakake, Kotema akabaka atiar, “Wu ekabaka, kobusi ikar kere; kinyeis akoniwomisio aisiyaloŋoŋ jo, karaida akonyenekon aijulakin.

¹¹ Ejai etuŋanan toma ajakanutukon, loejai emoyo loka idekesio lukalaunak kotomake; kapaarasia da nuka papakon aponi kodumunai aica ka aijen ka acoa da tomake kwape kacoa naka idekesio. Abu ekabaka Nebukadenesar papakon, ŋes ekabaka, papakon, kitarau ŋes ekapolon loka imurwok, ka ikasupok, ka Ikaludean, ka ikadwarak da;

¹² naarai kojai kotoma Daniel ŋol loabu ekabaka komaik Beletesasar, emoyo loitelekarit, ka aijen ka apirianut aitejenun apolou naka airujasia, ka abeunun asogolin, ka ailae ilomorun. Aso konyarau Daniel, ŋes da kitodikini apoloukee.”

¹³ Kosodi koyaunai Daniel akonyen nuka ekabaka. Kotema ekabaka Daniel atiar, “Ŋo kereka Daniel ŋol, loirai lokodwe luka aijoreunio naka Yuda, luejoreuni papaka koYuda?

¹⁴ Apupu eoŋ nukon, ebe ejai emoyo loka idekesio kotomakon, ido ejai aica ka aijen ka acoa da naitelekarit tomakon.

¹⁵ Kwana do aponi kitolomunai lukacoa, ikasupok, akonyeneka tetere esiomete nuiwadikatai ŋun, ketejenikis da eoŋ apoloukee: konye mam apedorete aitodikin apoloukee.

¹⁶ Konye apupu nukon ebe ipedori ijo aitejen apolou, ka ailae ilomorun; asa arai ipedori ijo asoman nuiwadikatai ŋun, ka aitejenikin eoŋ apoloukee, kitanapi lomuge, ka erikot loka esabu omurisinikon, iraun ekayaiton lokiwuniet loka ajakanut.”

¹⁷ Kosodi Daniel aboŋokin ekabaka ebe, “Koraut ainakinetakon nukon, koinak da ece iropitokon; konye asomakini eoŋ ekabaka nuiwadikatai, etejenikini ŋes apoloukee da.

¹⁸ Wu jo ekabaka, abu Edeke loejai kuju kakuj koinak Nebukadenesar papakon ajakanut, ka apolou, ka aibuses, ka apedor:

¹⁹ ido kanuka apolou naabu koinak ŋes, komaranata koyonito ituŋa kere, ka atekerin ka aŋajepa kakonyeneke: yenakoto ŋesi aiar, abu koar, yenakoto aidar ejari, abu kidar; yenakoto adakakin, abu kodakak, ka yenakoto da aitisil, abu kitisil.

²⁰ Konye naeomiaror eketau, koninikiar da ekemoyo tape iswamai nukeitur, aponi kolemarai koicoloŋoke loka ekabakane, kodemarai da akeibuses:

²¹ kirenearai kodwe luka ituŋa; korau eketau kwape kitian, kiboienenei kitukoi; kitanyamai anya kwape imoŋin, kopalal akekuan kakopyo nuka akuj: aitodol naajenunia ebe irumit Edeke loejai kuju kakuj ajakanut naka ituŋa, ido edakakini ŋin yenekoto ŋesi,

²² Ŋo da, okokuke, wu Belesasar, mam itasonikino kotaukon, karaida ibu kojen nun kere;

²³ konye iomiara aluikin EJAKAIT loka akuj; apotu koyaut iboro lukotogoke akonyenekon, ipotu komasiata ebino, ijo ka ijakakon, ka anorokon, ka abusianakon da; ibu kiturite idekesio luka epuesa, ka luka esabu, ka luka aisinin, ka luka asua, ka luka akito, ka luka amor da, lumam eanyunete, karaida akiirar, kwabo mam ejenete da: konye Edeke loejai eiyenanekon akanike, loerai elopet ikonirotin kere, mam ibu kitopoloo.

²⁴ “Kosodi aponi kijukunai atutubet naka akan anyoun kakonyeneke, aponi kiwadikai nuiwadikatai nu.

²⁵ Na ŋes aiwadika naewadikatai, MENE, MENE, TEKEL, UPARASIN. (Apolouke Kimario, kimario, kitemio, atiakatiakauneta.)

²⁶ Na ŋes apolou naka akirot; MBNE; abu Edeke kimar akonijakanut, kitanan da.

²⁷ TEKEL; kitemitoi jo kaitemisioit, ido itakanu ikadit,

²⁸ PERES; etiakak akonijakanut, einakinio Imedin ka Iperesian.”

²⁹ Kosodi Belesasar aicorakin, kitanapai Daniel lomuge, konapakis erikot loka esabu omurisiŋike, kolimoroi nuke ebe, korau ekayaiton lokiwuniet loka ajakanut.

³⁰ Kakuare kaŋin koarai Belesasar ekabaka Ekaludeat.

³¹ Kirum Dario Emedit ajakanut, korai loka ikar kwaka akaisakanykape ka luarei.