Daniel 4 - Ebaibuli

¹ Nebukadenesar ekabaka, mama ejaas ituŋa, ka atekerin, ka aŋajepa kere luibojete kakwap kere; kiyatanakin ainapakin mama iiaas.

² Etojok aitodiar aanyuneta ka nukaumokin nuabu Edeke Loejai kuju kakuj keswamak eoŋ,

³ Epolok ca ma aanyunetake! Egogoŋ da nukaumokinike! Akejakanut ŋes ajakanut namam enaŋi, Airumiteke da ageun katurio kiton aturio.

⁴ Ajai eoŋ, Nebukadenesar, kaijamam kotogoka, egananai da kotogoka lokapolou.

⁵ Abu kaany airujasit naketukuriani; kesiyalonoŋoro aomisio kaperitika ka aitapoeta da nuka akouka.

⁶ Ŋes esilakinia ekisil lukacoa kere luko Pabulon ayaunio mamaka, tetere ketejenikinete eoŋ apolou naka airujasit.

⁷ Kosodete imurwok, ka ikasupok, ka Ikaludean, ka ikadwarak alomun: kalimok kes airujasit; konye mam apotu ketejenikis eoŋ apolouke.

⁸ Konye kokau kolom Daniel mamaka, ekekiror Beletesasar, kwape ejaar ekiror loka ekadeke, ejai kotomake emoyo loka idekesio lukalaunak; kalimok ŋes airujasit ebe,

⁹ “Wu Beletesasar, ekapolon loka imurwok, naarai ajeni ebe ejai emoyo loka idekesio lukalaunak kotomakon, ido emamei nakaiyeiyea nakisiyalononoi jo, kolimokinai aitapoeta nuka airuiasitika naabu kaany, ka apolouke da.

¹⁰ Aitapoeta nuka akouka kaperitika kes nuta: abu kaany, ido koany, ekitoi kokidin kakwap, epol da aoiauke.

¹¹ Kopoloor ekitoi, kogogonor, kodol aidike toma akuj, kotakanu da kosane loka akwap kere,

¹² Koiokuka akuike, kipu da araitoke, kojaas kotomake inyamat luedaunito kere: kojaas itian luka ais otolimike, kibojete akweny nuka akuj katenunake, konyamenenete kere luejaas awat,

¹³ Abu kaany kaitapoeta nuka akouka kaperitika, ido koany, kodoku ekedaran, ekalaunan, kokuiu,

¹⁴ Kikeseu ŋesi ekeporoto kobala kwanata ebe, ‘Kojep ekitoi, Kojep da aketenun, kilakilaka akuike, kisiarisiar araitoke; konyoutu itian kokwapuke, ka akweny da katenunake.

¹⁵ Konye do kinyek ekomio loka aliasike kalup, koenite kasuat ka aisinit kotoma anya nuka ais; kitapapal kakopyo nuka akuj, komora kitiaŋ ainyam inya luka akwap.

¹⁶ Kilocokinoi etauke loka etuŋanan, koinakinai ŋes etau loka etiaŋ: kotuboros apakio akanykaarei mamakeŋ.

¹⁷ Erai akirot kokisil loka ikedarak, aicorakinet da kakirot naka ikalaunak: tetere ejenunete lukajarak ebe irumit ŋol loejai kuju kakuj ajakanut naka ituŋa, einakini nin yenekoto, edakakini yenitasono kotuna.’

¹⁸ Abu eoŋ, ekabaka Nebukadenesar, kaany airujasit ŋin: ka jo da, wu Beletesasar, kolim apolouke, naarai mam epedorete lukacoa kere luka ajakanutuka aitejenikin eoŋ apolouke; konye ipedori ijo, naarai ejai emoyo loka idekesio lukalaunak kotomakon.”

¹⁹ Kosodi Daniel, ekekiror Beletesasar, aumokin nediokasilon, kisiyalononoto ŋes akeomisio. Koboŋok ekabaka ebe, “Beletesasar, kinye airujasit, karaida apolouke, aisiyaloŋoŋ jo.” Koboŋok Beletesasar ebe, “Ekaiakait, korai airujasit naka nul kalukilaito jo, apolouke da naka lukasurupokon.

²⁰ Ekitoi loibu ijo koany, loapoloor, Ioagogon, loadolit aidike toma akuj, loatakani mama ejaas kere luka akwap;

²¹ loajokuka akuike, loapol araitoke, loajaas kotomake inyamat luedaunito kere; loeboiete itian luka ais kokwapuke, loeboiete akweny nuka akuj katenunake:

²² ŋes ijo, wu ekabaka, loipoloor, loigogon: naarai apoloor apoloukon, adol toma akuj, airumitekon da kiton osaŋe loka akwap,

²³ Ido kwape keanyunia ekabaka ekedaran, ekalaunan edokuni kokuju ebala ebe, ‘Kojep ekitoi, komudia ŋes; konye kinyek ekomio loka aliasike kalup, koenite kasuat ka aisinit, kotoma anya nuka ais; kopalal kakopyo nuka akuj, komora kitian luka ais, aitodol neatuborotor apakio akanykaarei mamakeŋ:

²⁴ Na ŋes apolouke, wu ekabaka, erai ekisil loka ŋol loejai kuju kakuj, loabunok ekajakait ekabaka:

²⁵ ebe, kireŋeario jo anyoun kotuna, ibojenenete ijo kitian luka ais, inyami anya kwape imoŋin, ipalalar kakopyo nuka akuj, etuboros apakio akanykaarei kamakon; aitodol naijenunia ijo ebe irumit ŋol loejai kuju kakuj ajakanut naka iruna, einakini da nin yenekoto ŋesi.

²⁶ Ido naarai ecorakin ainyein ekomio loka alias nuka ekitoi; icasi akonijakanut kamakon, kidau ajenun ebe eyait Akui,

²⁷ Aso do, wu ekabaka, kocam ainerunika, kosac akonironisio kanuka aswam adolit, numam adolitekon da kaitim lukican; motoko ejaun aitooiaar aiiamamakon.”

²⁸ Apotu nun kere kodoikis ekabaka Nebukadenesar,

²⁹ Ketuboros ilapio itomon ka luarei, kojai ŋesi irimi kotogo lokekabakane ko Babulon.

³⁰ Kiner ekabaka, kobala ebe, “Mere kereka lo Babulon lokapolon loabu kaduk araun aibois nakekabakane, kanuka agogoŋ naka apedorika, ka aibuses da naka apolouka?”

³¹ Eriŋa akirot ejai aituk naka ekabaka, kodou eporoto ebuni kokuiu ebe, “Wu ekabaka Nebukadenesar, inerai mamakon: anyou ajakanut kamakon,

³² Kirenear kotuna, ibojenenete ijo kitian luka ais; inyami anya kwape imoŋin, etuboros apakio akanykaarei kamakon; aitodol naijenunia ijo ebe irumit ŋol loejai kuiu kaku; ajakanut naka ituŋa, einakini da ŋin yenekoto ŋesi.”

³³ Kosawa kanol kitodolikinitai akirot mama ejai Nebukadenesar, aponi kirenearai kotuna, konyam anya kwape imoŋin, kopalal akekuan kakopyo nuka akuj, aitodol naepoloorotor iketima kwape aiulo nuka imorukaalen, akebelekeka da kwape kabelekeka nuka akweny.

³⁴ Ketuboros apaarasia, abu eoŋ Nebukadenesar keteluo akakonye akui, kobonu aijeneka mamaka, kemal ŋol loejai kuju kakuj, keturite ŋes, ketopoloo da ŋol loebusi ikar kere: Naarai airumiteke ŋes airum namam enaŋi, Akejakanut da ageun katurio kiton aturio.

³⁵ Luibojete kakwap da kere mam imarakinitai araut ibore: Iswamai ŋesi kwape ekotor kajore naka akuj, Ido mama ejaas luibojete kakwap: Emamei da yenepedori aitikokin akekan, Karaida atemar ŋes atiar, “Anyoika bo nuiswamai?”

³⁶ Kapak kaŋin da koboŋ aijeneka mamaka; ido kanuka aibuses naka ajakanutuka, koboŋ akapolou ka akamwekimwek da; komoata ikakenerunak ka ijakaka neajai; keticasi kajakanutuka, kiyatakinai mamaka apolou naedeparit.

³⁷ Kwana do eoŋ Nebukadenesar eturit, etopoloorit, etubusikinit da Ekabaka loka akuj; naarai eraas akeswamisio kere abeit, ikerotin da etube; nul da luelosete kaiturokina epedori ŋesi aitisil.