Daniel 11 - Ebaibuli

¹ “Eoŋ da, kokaru losodit loka Dario Emedit, abu kabwo aiticat ka aitogogoŋ ŋes.

² Kwana da ketodikini jo abeit. Koany, ebwoete ikabakan iuni bobo koPeresia; Iokiwononet da itelekari noi kes kere kabar; ido kegogoŋor kanuka abarake, isidiki kere ejie kajakanut naka Yonan.

³ Ebwoi da ekabaka lokagogonon, loirumi kayait naepol, iswamai ŋesi kwape ekotor.

⁴ Ido naebwoia ŋesi, ebila akejakanut, etiakatiakaun mama ejaas ikwamin luonon luka akuj; konye mam ekorakinio aurike karaida kwape ejaar airumiteke naerumit; naarai erutorio akejakanut, mama ejaas ice luegelara.

⁵ “Egogoŋ ekabaka loka ari naka eŋalakimak, konye ediopet kokapolokoke egogoŋ adepar ŋes; airumiteke da eraun airumit naepol.

⁶ Ketuboros ikar imorikikinos nepepe; ebuni akoku naka ekabaka loka ari naka eŋalakimak mama ejai ekabaka loka ari naka agolitomei aitutuk: konye mam nin icasi kapedor naka akekan; mam ŋol da ebwoi karaida aurike; konye ijaikinio ŋin, ka nul lukeyaunete, ka nol lokeurie, ka ŋol da loabu kitogogon ŋes kapakio kanun,

⁷ “Konye ebwoi atenut naelomuni kaliasike aiboisike, edolokini ŋesi ajore, elomari ore loegogon loka ekabaka loka ari naka agolitomei, esurokini kes, ipikori da.

⁸ Enatari da idekesiokec, ka aputosiakec nuecalara, ka iborokec luejok luka epuesa ka luka esabu, ayaŋaar Misiri; ido edauni icekaru komam esurokini ekabaka loka ari naka agolitomei.

⁹ Elomari ŋesi ajakanut naka ekabaka loka ari naka eŋalakimak, konye eboŋori akwapuke,

¹⁰ “Ejiosi odweke, etukonokinete ajore naepol naka irioneta lukapolok iyatanakini ŋes abunore, elelei, etubori; kosodi aboŋun ejie kiton aiboisike naegogon.

¹¹ Enyunyurikini ekabaka loka ari naka eŋalakimak, elomuni ejie kaŋes, ŋes ekabaka loka ari naka agolitomei; itonyouni aiore naepol, ijaikinio da ajore akanike.

¹² Naeyanaaria ajore, kiturokin eketau: ibirokini ilukumin luipu, konye mam ipikori.

¹³ Eboŋuni ekabaka loka agolitomei, itonyouni ajore naepol aitelekarit nasodit; ido ketuboros ikar iyatanakini abunore kajore naepol ka iboro da luipu,

¹⁴ “Kapaarasia kanun ebwoikinete luipu asurokin ekabaka loka ari naka eŋalakimak: ido itonyounos idwe luka luemeneraka kotunakon aiticat aitapoet; konye ibiroros.

¹⁵ Kosodi do ekabaka loka agolitomei abunore, eduki etut, irumiar ere loebwaitai: mam ebwoete irionera luka eŋalakimak, karaida iketuŋa luaseunitai, mam da ejaun agogoŋ aibwo,

¹⁶ Konye ŋol loebuni asurokin ŋes iswamai kwape ekotor, mam idio da yenebwoikini ŋes: ebwoi ŋesi kakwap nakaibuses, ejauni amudiar akanike.

¹⁷ Itemokini akonyeneke abunore kagogon kere naka ajakanutuke, eyaŋauni lukabeit nepepe kaŋes; iswamai ŋun; ikorakini ŋes akoku naka aŋor amudiar ŋes; konye mam ebwoi, karaida aisigalikin ŋes.

¹⁸ Akaulo kanun ibeloori akekonyen mama ejaas apujana, irumiari nuipu: konye itasani ekapolon amorosit nakeyauni ŋol; eebo, inyakakini ŋes amorositike.

¹⁹ Kosodi konyet aibeloor akekonyen mama ejaas ireria luegogon luka akwapuke elopet: konye iguikini, kibiror, komam bobo etakanuni.

²⁰ “Kosodi do enyouni ediopet aiboisike itotori eketeleman esolo kotoma aibuses naka ajakanut: konye kapaarasia nuikidioko emudiario, konye mere kanyunyura, karaida kojie.

²¹ Enyouni ekes Ioemwanitai aiboisike, lomam sek einakinitai aibuses naka ajakanut: konye ebuni ŋesi kapak nakainapakin, eyaŋaari ajakanut kanuka akiro nukaijodijod.

²² Elelearete ajoresio kwape kakalele kakonyeneke, ebilas; eebo, ekapolon loka aitutuket da.

²³ Kedautu aitutuk iswamai kaliokonut; naarai edokari, eraun lokagogon, kojaas kituna luikidioko.

²⁴ Kapak nakainapakin elomari aiboisio nuitelekarito amio nukobuku; iswamai numam lukapapake iswamatos, karaida lukapapaake; ekorakini kes lumejauna, ka lunatuna, ka iboro da: eebo, ebilakini iboteike asurokin ireria luegogon, adaun apak.

²⁵ Ido isidiki akepedor ka aketitin asurokin ekabaka loka ari naka eŋalakimak kajore naepol: itijie da ekabaka loka ari naka eŋalakimak ŋes ejie kajore naepol noi naededen: konye mam ebwoi, naarai ebilakinete ŋes ibotei.

²⁶ Eebo, nul luenyamete ikenyamat, kes ca emudiarete ŋes, elelei ajoreke: ibiroros luipu edanyio.

²⁷ Ido ikabakan nul luarei, ibwaikinete itauonokec ameŋeranut, esabanakinete enyamete nepepe: konye mam ekeriakaros; naarai ejaun esaŋe kapak naeseunitai.

²⁸ Ŋes konyet ebonoria akwapuke kiboro luipu; konye esurokini eketau aitutuket nakalaunan: iswamai nuekoto, kobonori do akwapuke.

²⁹ “Bbonori do kapak naeseunitai, elomari ari naka eŋalakimak; konye mam ejaun kapak kaŋin kwape sek ajaar nasodit,

³⁰ Naarai epote ameerin nuka Kitim asurokin ŋes; ŋes konyet iburakinia, eboŋori, enyunyurikini aitutuket nakalaunan, iswamai nuekoto; eboŋori do ibwaikini etau ŋul luejalete aitutuket nakalaunan.

³¹ Ebwoete irioneta kowaike, itisilianete aibois nakalaunan, ŋes ere loegogon, elemarete asubanit natir, esipokinete etal loisimejeikini.

³² Itapaari ŋesi kaijodijod ŋul lueswamaete nueroko asurokin aitutuket: konye do icasito ituŋa Iuejenete Ekecedeke, iswamaete nukatitin.

³³ Lukacoa da lukotoma otuŋa ituutoorete luipu: konye ibirokinos okileŋ, ka akim, ka aijoreorio, ka anatario, apaarasia nuipu.

³⁴ Kosodi naibirorotor, inarakinio kainarakin naedit: konye imorikikinos luipu mamakee kakiro nukaijodijod.

³⁵ Ibiroros da ice kakesi lukacoa, aililiaun kes, aitesegaar, aitalaun kes aitodol apak nakawasia: naarai eroko ejai apak naeseunitai.

³⁶ “Iswamai ekabaka kwape ekotor; iturokin, itopoloor bon aitelekar ecedeke kere, inera da nukaumokin aluikin Edeke loka idekesio: ekerianari da aitodol naitodolikinio anyunyura; naarai nuepeleikinitai iswamao,

³⁷ Mam da epodokini idekesio luka lukapapaake, karaida loimielas aŋor, karaida apod edeke kere: naarai etopoloor aitelekar kere.

³⁸ Konye kaiboisike itubusikini edeke loka ireria luegogon: itubusikini edeke lomam kolo ajenete lukapapaake kesabu, ka epuesa, ka amor nuka akais nuipu, ka iboro luketiai loepol.

³⁹ Ikwaikini da ireria luegogon aitelekarit kinarakinite edeke lomoit; nul da luecamunete ŋes iyatakini aibuses: einakini kes airum luipu, ekori akwap kanuka etiai.

⁴⁰ “Kapak da nakosane eremori ŋes ekabaka loka ari naka eŋalakimak: ebuni ekabaka loka ari naka agolitomei asurokin ŋes kwape etapipirio, kagalin, ka ikebwanenok, ka ameerin nuipu; elomari ŋesi akwapin, elelei, etubori.

⁴¹ Elomari da akwap nakaibuses, ibirokini luipu: konye itaiario nu kakanike, Edom, ka Moab, ka lukapolok luka idwe luka Amon.

⁴² Eriori da akekan akwapin: akwap da nako Misiri mam ekui.

⁴³ Konye edumuni apedor kama ejaas ainadisio nuka esabu ka nuka epuesa, ka iboro da kere luka akais nuipu luko Misiri: etupakinete ŋes Ilibian ka Itiopian.

⁴⁴ Konye isiyalononoete ŋes iyemuto luepote kokide, kari da naka agolitomei: elomari kanyunyura naededen amudiar, ka aidany da cut luipu.

⁴⁵ Ido iraikini iweman lukotogoke lokapolou kidiŋ kaŋolol ka eronat lokaibuses lokalaunan; konye edolokini osaŋeke, komam yeniŋarakini ŋes.