Aswamisio 5 - Ebaibuli

¹ Konye ekiliokit ediopet, ekekiror Anania, ka akeberu Sapira, abu kogwela ibore yenajaatar,

² kiŋadak acepesan kotiai, kojeni akeberu da, koyau ace, kibwaik akejen nuka ikiyakia.

³ Konye kotema Petero atiar, “Anania, kanukinyo kisilelebia Satan etaukon aimod Emoyo Lokalaunan, ka aiŋadakin da acepesan kotiai loka amana?

⁴ Arai kesalakinit mam egwelara, mam kereka kesalit erai nakon? Nakedaunere agwelar, mam kerai nakakonipedor? Kikonakini bo ai ibwaikin akirot ŋin otaukon? Mam imodit ituŋa konye Edeke.”

⁵ Nakiiraria Anania akiro ŋun, kibiror kotwana. Kokuriakaros ituŋa kere noi lukiirarete ŋun.

⁶ Konyout ikatumunak konunukoto, kodakasi kiŋa, kidaata.

⁷ Ketuboros bala isawan iuni kolom akeberu da komam ejeni nukedoikinete.

⁸ Kotema Petero atiar, “Kolimokinai, ipotu kereka kogwelasi amana kotiai kaŋol” Kotema atiar, “Eebo, kotiai kaŋol.”

⁹ Kotema Petero atiar, “Kanukinyo ineruniata akodun Emoyo loka Ejakait? Koany, akejen nuka luedaete okilenikon ejaas okek, kidakarete jo da.”

¹⁰ Atipet kibirokin akejeke kotwana. Kolomut ikatumunak kodumut ketwana, kodakasi kiŋa, kidaata kidunyas kokilenike.

¹¹ Kokurianar Ekanisa kere, ka ituŋa kere lukiirarete ŋun,

¹² Kiswamai aanyuneta ka nukaumokin nuipu kotuŋa kakanin nuka ikiyakia. Kojaenenas kere nepepe kediopetau alomaret naka Solomon.

¹³ Ice da mam apotu kotitiŋikis aimorikikin kakes, konye ituŋa kitopoloorito kes.

¹⁴ Kiyatanakinos lukiyuunito mama ejai Ejakait, ikepuak, ikiliok ka aŋor;

¹⁵ kodakununete lukadekak orotin, ka aiperionokin ojam ka opalisin, tetere naitorio Petero kodolokini etoribeke ice kakesi.

¹⁶ Kotukonokinos da ituŋa lukoreria lukeapias ko Yerusalem, koyaununete lukadekak ka ŋul lukiticanenete ajokin nueroko; kitaŋaleunoi kes kere.

¹⁷ Konye konyou losasedoti lopeti ka lukejaas nepepe kaŋes kere, ŋes erioŋet loka Isadukayon, ileleba ekolo,

¹⁸ Kikamut ikiyakia koenikis aidaris naka ituŋa kere.

¹⁹ Konye kuare koŋaa emalaika loka Ejakait ikekia luka aidaris, kitolom kes kotema atiar,

²⁰ “Koloto, kobwaata koyekalu kolimokis ituŋa akiro kere nuka Aijar kana.”

²¹ Nakiirariata kesi, kolomasi oyekalu tupuruc sek, kisisianakis. Konye kobu losasedoti lopeti, ka ŋul lukejaas nepepe kaŋes, konyaraut aurianet, ka imakio kere luka idwe luka Isirael, kiyakiasi ituŋa aidaris tetere eyaunete kes.

²² Konye nakedolioto ikejaanakinak mam eanyuna kesi kaidaris; koboŋut kolimokis kes ebe,

²³ “Kidum aidaris eenen ejok, ebwoete ikedarak da kokekia; konye nakiŋaaria mam edumuna idiotuŋanan kotoma.”

²⁴ Nakiiraria ekapolokiton loka eyekalu ka isasedotin lupeti akiro ŋun, kobuonokinos noi kanukec ebe, “Ikonakini bo do akirot na ai?”

²⁵ Kobu etuŋanan kolimok kes ebe, “Ituŋa ŋul lukienikinito yesi aidaris ejaas toma oyekalu, ebwoete isisianakinete ituŋa.”

²⁶ Kosodi kolot ekapolokiton nepepe ka ikejaanakinak koomata kes, konye mere kagogoŋ, naarai kekuriaka ituŋa kinyeis aibiribir kes kamor.

²⁷ Nakeyauniata, kibwaikis akonyen nuka aurianet. Kiŋit losasedoti lopeti ebe,

²⁸ “Kipou kecorakis yes kagogoŋ ebe Sirikisisianakis kokiror kalo; ido koany, ilelebata Yerusalem kaisisianakinikus, ikotosi ayaŋaun aokot nuka etuŋanan kaŋol mamakosi.”

²⁹ Konye koboŋokis Petero ka ikiyakia ebe, “Kibusakinit arimarit Edeke aitelekarit ituŋa.

³⁰ Abu Edeke loka lukapapaawok kitaiaru Yesu, lokiarete kaikajakin okitoi.

³¹ Etopoloo Edeke ŋes kakanike nakoteten korau Lokapolon ka Eketaiaran, koinak Isirael aitoronokin ka aisionio adiakanareta.

³² Kirai isio ikajenak luka akiro kaŋun, nepepe ka Emoyo Lokalaunan, loainak Edeke kere luerimasi ŋes.”

³³ Nakiirariata ŋun, konomos noi ikecetauon, kinerut aiar kes.

³⁴ Konye etuŋanan ediopet, Eparisayot ekekiror Gamaliel, ekesisianakinan loka ikisila, lokeyonito ituŋa kere, kobwo kaurianet, kicorak kitolomarai ber ikiyakia kiŋa.

³⁵ Kotema kes atiar, “Yes ikiliok luka Isirael, kocoito nuiswamakinete ituŋa ŋul.

³⁶ Naarai eroko apaarasia nu edoluno abu Teudas konyou, kituro ebe erai lokapolon; kimorikikinos ŋes kituŋa bala akwat aoŋon; konye koarai ŋes, kere da lukerimarete ŋes kisiarakinos, mam eraun ibore.

³⁷ Akaulo kaŋol konyou Yuda Egalilayat, kapaarasia nuka aibil akwes, kiria ice kotuŋa atupar ŋes; ŋes da abu koolio; kere da lukerimarete ŋes kisiarakinos.

³⁸ Kwana da katemari yes atiar, Kinaca ituŋa ŋul, kinyeisi kes; naarai akirot na arai aswam na, arai erai naka ituŋa, eoliori;

³⁹ konye arai erai naka Edeke, mam ipedorete aitoolior kes; kinyeis diat atakanun bala itijiete Edeke.”

⁴⁰ Kocamut akekiro; nakenyarauniata ikiyakia, kodaata, kicorakis kes kinyeis einer kokiror loka Yesu, koosikis.

⁴¹ Aso kolomut kesi kaurianet, iyalamasi naarai imaritai luibusakinit aiticanio kanuka Ekiror kaŋol,

⁴² Ido ŋinipaaran, koyekalu ka oreria da mam inyeina aisisianakin ka alimonokin nuka Yesu ebe ŋes Kristo.