Aswamisio 24 - Ebaibuli

¹ Kosodi ketuboros apaarasia akany, kijesar Anania esasedoti lopeti nepepe kice komakio, ka ekeneranikec, Teratulo. Kikujokis kesi ekayaiton nuesurokinitotor Paul.

² Kenyaraun ŋes, kogeu Teratulo aosan ebe: “Naarai kidumunit ainapakin naepol kanukon, wu Pelikis lokaibuses, kanuka apiirikinikon da eteteun akiro nuka ateker kana,

³ kicamunit da kaimal naepol koponesio kere kaiboisio da kere.

⁴ Konye kenyek aitapas jo noi, keŋaiŋait jo kopupok sio kasianutukon kanuesupaaka.

⁵ Naarai kidum isio ekesa lo erai ekamunaaran, ekesidikon da loka ecelet koYudayan kere anatar akwapin kere, ekeŋarenon da loka erioŋet loka Inasarayon.

⁶ Bobo da abu kotam amunaar eyekalu, kekamut, [kakotos atubokin kwape ejaatar ikisilakosi.

⁷ Konye kobu ekapolon Lusias kolema ŋes kagogoŋ naepol kakaninikosi,]

⁸ kicorak da ikewosatokoke aponare akonyenekon. Ijo elopet kaiŋitiŋitikon ipedori adumun akiro nukiwosat isio ŋes.”

⁹ Kiwosata Iyudayan da kobalas ebe, “Ikote nepenen.”

¹⁰ Kosodi kokwet ekayaiton Paul einer, Koboŋok ebe: “Naarai ajeni ebe irai ijo ekatubon loka ateker kana ikar luipu, atubo elop ketau kaloelakara,

¹¹ naarai ipedori ajenun ebe eroko apaarasia edepara atomon kanuarei ageun naadokaria eoŋ Yerusalem aima;

¹² mam ituŋa lu apotu kadumut koyekalu kipega kidiotunanan, karaida aituwutaar atukot, karaida katukosia, karaida kore.

¹³ Kwabo mam epedorete aitogogoŋ akiro ŋun nuiwosaete kwana.

¹⁴ Konye alimori kamakon nu ebe kwape ejaar Erot, loenyarito kesi erioŋet, kwaŋin amaia Edeke loka lukapapaakosi, eyuunit kere nuelimito ikisila, ka nuiwadikatai oitabon luka inabin,

¹⁵ amunokina Edeke, ŋol loecamunito kesi da ikulepek, ebe ejaun ajarun naka luedolito ka lumam edolito da.

¹⁶ Kanuka ŋun enyikokinit ajaut ketau lomam itoronio mama ejai Edeke ka ituŋa da apaarasia kere.

¹⁷ Akaulo naka ikar luipu abu kabu ainun atekereka nukaitim ka ainakineta da.

¹⁸ Kaŋun kadumut eoŋ koyekalu etesegaara, komamei ekodet karaida autar. Konye Iyudayan ice lukepote ko Asia—

¹⁹ lutiebusakinit ajaut ne akonyenekon aosan eoŋ, arai ejai adiokirot keoŋ,

²⁰ Arai bo kolimut lupelu aibucaret naeanyunitos kamakaŋ naabwoia kaurianet,

²¹ dimarai akirot na adiopet bon nakeworoi kabwoi kokidiŋikec ebe, ‘Kanuka ajarun naka ikatwak katubokinio lolo kakonyenekus.’ ”

²² Konye kisiyap Pelikis kes, naarai kejeni ace nuka Erot, kobala ebe, “Naijesunor Lusias ekapolon atubi akirokus.”

²³ Kosodi kicorak ekapolokiton aidar Paul konye kajalakinit, komam isimiki idio kopaperoke aijaanakin ŋes.

²⁴ Kosodi ketuboros apaarasia kodol Pelikis nepepe ka Durusila akeberu, nakerai Ayudayat, kiyakia anyaraun Paul, kiira ŋes inera nuka aiyuun naejai toma Kristo Yesu.

²⁵ Kopesik Paul ŋes akiro nuka adolit, ka nuka ayaikina, ka atubokinio naebunit, kokurianar Pelikis, Koboŋok ebe, “Kolot do kwana; kadum eoŋ apak, keworouni.”

²⁶ Komuno da ebe einakini ŋes Paul arupian, Kanuka ŋun konyaraunun eyala kaŋes,

²⁷ Kosodi ketuboros ikar iarei, kodakakinai Porukio Pesito airum aibois naka Pelikis; kekoto Pelikis aitojokio kama ka Iyudayan, kwaŋin kinyek Paul kaidaris.