Aswamisio 22 - Ebaibuli

¹ “Yes ikiliok iinacan ka lukapapaka, kiirarai kwana nuenera aiiyaror.”

² Nakiirariata ebe inera kakes kaŋajep nAburaniat, kiyatakis aililiŋ tii. Kobala ebe:

³ “Arai eoŋ Eyudayat, kaurikinio Taruso, koKilikia, konye kasaunio kore kalo kakeje nuka Gamaliel, kesisianakinio kainyikokin kokisila luka lukapapaawok, abu kerumite ekokote kanuka Edeke kwape ijaatar yesi kere lolo.

⁴ Kareite ituŋa luka Erot kala kiton atwanare, kaenenei karemonokin aidaris ikiliok ka aŋor da,

⁵ kwape itejenikina esasedoti lopeti ka imakio kere luka aurianet, Abu kadum ibaluan kamakec ainar iinacan, kalot Damasiko tetere ekamuni luejaas ŋina da, ka ayaun kes Yerusalem eenitai tetere iticanio.

⁶ “Kosodi kanen napalosi, aapikin Damasiko, kidiŋ paaran, atipet kemiliaik aica naepol naabuni kokuju.

⁷ Kebirokin kwap, keira eporoto lokabala eoŋ ebe, ‘Saul, Saul, kanukinyo kireitor eoŋ?’

⁸ Kaboŋok ebe, ‘Ijoŋo iŋai, Ejakait?’ Kabala ebe, ‘Arai eoŋ Yesu Enasarayot, loireit ijo.’

⁹ Ŋul da lukejaas keoŋ apotu koanyut aica ŋin, konye mam apotu kiiras eporoto loka ŋol kalokinera keoŋ.

¹⁰ Kabala ebe, ‘Keswama anyoika, Ejakait?’ Katema Ejakait eoŋ atiar, ‘Konyou, koloma Damasiko, kanen kilimokinio kere nuitemokinitoi jo aswam.’

¹¹ Konye namam apedoritor aanyun kanuka amwekimwek naka aica kaŋin, karikosi eoŋ ŋul lukejaas keoŋ, kaloma Damasiko.

¹² Kanen Anania, etuŋanan loeyoŋit Edeke kwape ejaatar ikisila, loetojokitai koYudayan kere lukiboiete kanen,

¹³ kobu mamakaŋ, kobwo kodiekaŋ kabala ebe, ‘Onaceka Saul, kokweny.’ Ido kosawa kaŋol abu kakweny kaany ŋes.

¹⁴ Kobala ŋesi ebe, ‘Kiseu jo Edeke loka lukapapaawok tetere ijenuni nuekoto ŋesi, ka aanyun da Ekadoliton, apupun eporoto loelomuni kaitukuke;

¹⁵ naarai iraun ekekajenan kotuŋa kere kakiro kaŋun nuiany ka nuiiraa da.

¹⁶ Aso kwana idaret inyo? Konyou, kibatisai, kilota akonidiakanareta, kiwonete ekekiror.’

¹⁷ “Kosodi kanen nakadaunia aboŋun Yerusalem, elipi koyekalu, kogelakin ekamoyo,

¹⁸ Abu kaany ŋes, katema eoŋ atiar, ‘Kisunyite, konyou atipet koYerusalem, naarai mam ecamunete akoniitejenun kamakaŋ.’

¹⁹ Kabala ebe, ‘Ejakait, ejenete kesi ebe abu eoŋ kaenenenei ka aibuŋ da ŋul lukiyuunito jo kaŋinitukos kere.

²⁰ Naabukorere da aokot nuka Sitepan ekajenanikon, ajai eoŋ da abwoi eapie, ketojokite, kedari inapen luka lukearete ŋes.’

²¹ Katema eoŋ atiar, ‘Ape; naarai keyakiari jo neelwana mama ejaas Imo.’ ”

²² Apotu kopupokis ŋes kiton akirot ŋin; kosodete kodelosi kiworoto ebe, “Kicutasi oloŋai ŋol kakwap. Naarai mam ibus ŋes aijar.”

²³ Napecelasi, ka acakanar ikecenapen ka aiwelanar da apua kuju,

²⁴ kicorak ekapolon aitolomar ŋes ore loka iserikalei, kotema ŋes aŋicio kadaio, tetere ejenuni nuainakinit kes ecelas kwaŋin kanukeŋ,

²⁵ Nakedauniata aien ŋes kaunoi, kobala Paul ekapolokiton lokebwoi eapie ebe, “Ibus kereka yes aida etuŋanan loerai Eromayot komam etubokinitai?”

²⁶ Nakiiraria ekapolokiton kolot kitejen ekapolon kobala ebe, “Nunyoika ikoto ijo aswam? Naarai erai etuŋanan ŋol Eromayot.”

²⁷ Kobu ekapolon kiŋit ŋes ebe, “Kolimokinai, irai teni ijo Eromayot?” Kobala ebe, “Eebo.”

²⁸ Koboŋok ekapolon ebe, “Abu eoŋ kagwel araut Eromayot karupian nuipu.” Kobala Paul ebe, “Konye eoŋ euriat.”

²⁹ Atipet kobwata lukekapakina aiŋit ŋes; kokuriana ekapolon da, naarai ajenu ebe erai Eromayot ido abu koen ŋes.

³⁰ Apaaran naatupakini, kokoto ajenun abeit nuainakinete Iyudayan aosan ŋes, kolacak, kicorak isasedotin lupeti ka aurianet kere atukokin, koyanau Paul da kisibwo ŋes kakonyenekec.