Aswamisio 18 - Ebaibuli

¹ Kokau kaŋun konyou ko Asene kodol Korinto.

² Kodum Eyudayat ekekiror Akuila, euriat koPonto, kerai ŋesi abunore ŋipeŋin koItalia nepepe kakeberu Pirisikila, naarai abu Kulaudio kicorakinite Iyudayan kere anyoun koRome. Kodol Paul mama ejaas;

³ naarai kerai akeceswam adiopet, kosal mamakec, kiswamata nepepe, naarai keraas ikasubak iweman.

⁴ Kopetanak akiro katukos ŋinisabato, kotam aimaumaun Iyudayan ka Iyonanin.

⁵ Konye nakijesunotor Sila ka Timoteo koMakedonia, kitiŋaik akirot Paul, kitejenanak lyudayan ebe Yesu ŋes Kristo.

⁶ Nakitepegiata ka ainyanakin Edeke, kilakilak inapeneke, kotema kes atiar, “Kojaas aokotokus akwesikus; alai eoŋ; amear kwana alosi mama ejaas Imo.”

⁷ Konyou kanen, koloma togo loka etuŋanan ekekiror Tito Yusito, loemai Edeke, lokeapias eketogo katukos.

⁸ Abu Kirisipo ekayaiton loka atukos kiyuu Ejakait, nepepe ka lukokaleke kere; nakiirariata Ikorinton luipu Paul kiyuut, kibatisai.

⁹ Kolimok Ejakait Paul kaitapoet kuare ebe, “Sirikikurianar, konye kiner, sirikililiŋ;

¹⁰ naarai ajai eoŋ nenipe kajo, kwabo emamei ituŋanan yenikisurokini aitican; naarai ejaas eoŋ ituŋa luipu ore lo.”

¹¹ Kosalak nen apak naka ekaru ediopet ka ilapio ikanykape, isisianakini kes akirot naka Edeke.

¹² Konye nakeraar Galio ekayaiton loko Akaia, konyoikis Iyudayan Paul ketau ediopet, koyaata airabis.

¹³ Kobalas ebe, “Ijodijodi ekesa lo ituŋa aima Edeke asurokin ikisila.”

¹⁴ Konye nakekotor Paul aooŋ akeituk, kotema Galio Iyudayan atiar, “Wu yes Iyudayan, arai erai akirot naka aswam aronis arai naka adiakaret naerono, tikebusakinit atitiŋikin kayes;

¹⁵ konye arai erai akirot naka aiŋiseta nuka akiro ka ikiroria ka ikisilakus, nukus bo ŋun; mam eoŋ akoto araut ekatubon kaŋun.”

¹⁶ Kireŋea kes kairabis.

¹⁷ Kikamutu kere Sosetene, ekayaiton loka atukos, koleata kairabis. Konye mam Galio apodo ŋun.

¹⁸ Kokau kaŋun kosalak Paul apaarasia nuipu, kosodi kotwar iinacan, kikwaŋar alosit Suria, kouparos ka Pirisikila ka Akuila. Kobaren akekou koKenekerea, naarai kiyapot.

¹⁹ Kodoloto Epeso, kinye kes kaŋina; konye koloma ŋesi elopet atukos, kopeta ka Iyudayan akiro.

²⁰ Nakilipiata ŋes asalakin apak naepol, koŋer;

²¹ konye kotwaras kakes kobala ebe, “Aboŋuni bobo mama ijaas arai itoiokit Edeke.” Kikwaŋa anyoun ko Epeso.

²² Nakedokunia Kaisarea, kodoka kiyoga ekanisa, kijesar Antiokia.

²³ Kosalak nen adiopak, kosodi konyou, kitor anatar akwapin nuka Galatia, ka Pirugia, itogogoŋi ikesisiak kere.

²⁴ Kobu Eyudayat Epeso, ekekiror Apolo, euriat loka Alegesanderia, etuŋanan loisisianakinitai; kerai lokapedor kotoma nukiwadikatai.

²⁵ Aponi kituutooritete korot loka Ejakait; kodunyakinite komoyo, kinera kisisianakini kacoit akiro nuka Yesu, konye kojeni aibatis naka Yokana bon.

²⁶ Kogeu einer katitiŋ katukos; konye nakiirariata Pirisikila ka Akuila, koyaŋaasi ŋes, kiyatakis aitejenun kacoit erot loka Edeke.

²⁷ Nakekotor aikwaŋar alosit Akaia, kisicerededata iinacan, kiwadikakis ikesisiak aisukunyikin ŋes, Nakedolio, kiŋarak noi ŋul lukiyuunito kanuka asianut,

²⁸ naarai kiteleka Iyudayan kagogoŋ, kaitebeikin, itodikini kakiro nukiwadikatai ebe Yesu ŋes Kristo.