Aswamisio 14 - Ebaibuli

¹ Kosodi kanen kotoma Ikonium, kolomasi nepepe toma atukos naka Iyudayan, ido kanuka ŋun nuenerasi kiyu ekodet loapol loka Iyudayan ka Iyonanin.

² Konye Iyudayan lumam kiyuunito kisidikoto Imo kitolomikis etau loerono asurokin iinacan.

³ Kosodete kosala nen apak naepol, inerasi katitiŋ kotoma Ejakait, lokitejenuni akirot naka akesianut, kocamak aanyuneta ka nukaumokin aiswamao kakaninikec,

⁴ Konye kotiakas ituŋa lukore; ice owai loka lyudayan, ice da owai loka ikiyakia,

⁵ Kiton neatakanunia asurokin naka Imo ka Iyudayan, nepepe kikayaitokokec, aiswamakin kes erono, ka aibiribir kamor.

⁶ Kejenut kes ŋun, kokereasi Lusitura ka Derube, ireria luka Lukaonia, ka akwapin nuedunyatar;

⁷ kanen da kolimonokis akiro nukajokak.

⁸ Kanen koLusitura kojai etuŋanan iboie, ilejekekas akekeje, eŋwalas ameun kakoik naka totoke, lomam alosi cut.

⁹ Abu ŋol kiira Paul inera; kosesen Paul ŋes, koany ebe ejai aiyuun naitanaleuni,

¹⁰ kolimok keporoto loepol ebe, “Kobwo kotenan kakonikeje.” Kodetun atipet, kosakasak.

¹¹ Nakeanyuniata ikodeta nukiswamai Paul, kikeseut iporotoikec, kobalas kaŋajep naka Lukaonia ebe, “Kijesakinos oni idekesio kaput naka ituŋa.”

¹² Komaikis Baranaba Seu, ka Paul da Kereme, naarai kerai ŋesi lokiŋarenikinit einer.

¹³ Koyau esasedoti loka Seu, lokejai eyekaluke kiŋaren naka ere, imoŋin ka abokoi nuka atur kiton okek, kokoto ainakin asuban nepepe kikodeta.

¹⁴ Konye nakejenuniata ikiyakia Baranaba ka Paul, kocilata ikecenapen, kokerata kolomasi okodet, kiworoto ebe,

¹⁵ “Ikatuŋa, kanukinyo iswamaata nu? Kirai isio da ituŋa lukepone kwape kayesi, kiinunit yes akiro nukaiokak, tetere ibelokinos ainyein akiro nu nukamameak kosesena Edeke lokajaran lokesubi akuj ka akwap ka aŋolol ka iboro da kere luejaas tomakec,

¹⁶ Katurio nuatuboros abu kojalak atekerin kere alosit kotoma orotinikec;

¹⁷ konye mam kinyein komamei aitejenunet, naarai kiswama nuejok, koinak yes akiru abunore kakuj, ka apakio nuka amio, isimonikini ikusitauon kinyamat ka aiyalama.”

¹⁸ Kakiro kaŋun, kitikokis ikodeta kationis ainakin kes asuban.

¹⁹ Konye kodolut Iyudayan luapote koAntiokia ka Ikonium; kisidikoto ikodeta, kibiribiroto Paul kamor, kiriasi kiŋa naka ere, koomito ebe atwana,

²⁰ Konye napelukunito ikesisiak, konyou, koloma ore; kapaaran naatupakini kolot Derube nepepe ka Baranaba.

²¹ Kosodi nakedauniata alimonokin akiro nukajokak toma ore ŋol, ka adumun ikesisiak luipu, koboŋosi Lusitura ka Ikonium ka Antiokia,

²² kitogogoŋo itauon luka ikesisiak, ka aikwenyar kes kosalito toma aiyuun ŋin, ebe da kibusakinit alomar toma ajakanut naka Edeke kotoma aiticanio nuipu.

²³ Nakedauniata aseikin kes imakio kotoma ŋolikanisa, kailip, ka ailuŋ, kibwaikis kes akanin nuka Ejakait lokiyuunito.

²⁴ Kitoro Pisidia, kodolot Pampulia.

²⁵ Kedaut alimonokin akirot toma Peruga, kijesaros kiton Atalia;

²⁶ konyout kanen kikwaŋaros kiton Antiokia nekolo elipakinere kes asianut naka Edeke kanuka aswam naadaut aitodol.

²⁷ Nakedolioto, kotukokis ekanisa, kitatamikis akiro kere nukiswamai Edeke nepepe kakes, ebe da aŋaik Imo ekek loka aiyuun,

²⁸ Kiboioto kanen apak namam edit nepepe kikesisiak.