Apukokinio 2 - Ebaibuli

¹ “Kiwadikak emalaika loka ekanisa lokotoma Epeso ebe: Inera kwanata ŋol loitiŋit aacer akanykaarei kakanike nakoteten, loelosenenei kokidiŋ opirin lukatalai ikanykaarei luka esabu ebe:

² “Ajeni akoniswamisio, ka aitaaritoi, ka aŋirikinitekon, ido kwape mam ipedoria atitiŋikin ituŋa lukaronok, ido ibu kitem ŋul luenyaras bonik ikiyakia, kwabo mam eraas, kodum ebe eraas ikeŋalak,

³ Iŋirikinit ka atitiŋikin kanuka ekakiror, kwabo mam ibu kopas.

⁴ Konye ejai eoŋ akirot na kajo ebe ibu kojal akonimin nasodit.

⁵ Aso kiitu nekibirunor, kitoronikin, kiswama da aswamisio nusodit. Konye arai mam iswamai kwaŋin, abuni mamakon, alemari da epirikon lokatala kaiboisike, dimikito kitoronikin.

⁶ Konye ejai jo na ebe ilait aswamisio nuka Inikolain, nualait eoŋ da.

⁷ Ŋin yenejai akit, kopup nuelimokini Emoyo ikanisan. Ŋin yenipikori ainakini ŋes ainyam araito nuka ekitoi loka aijar, loejai Paradais loka Edeke.

⁸ “Ido kiwadikak emalaika loka ekanisa lokotoma Sumuruna ebe: Inera kwanata ŋol losodit ka lokawasia da, loabu kotwanite ido ejari, ebe:

⁹ “Ajeni aiticaniokon, ka ikonibakor, (konye irai ekabaran) ka amoromor naka ŋul kaluenyaras bonik Iyudayan, kwabo mam eraas, konye eraas atukos naka Satan.

¹⁰ Sirikiyoŋ nukidoikinete aisirieb jo, Koany, elosi Satan acakakin ice kayes aidaris, tetere kitemio, kiticanio da yes apaarasia atomon. Koraenena lomunot kiton atwanare, eoŋ da kainakini jo aboko naka aijar,

¹¹ Ŋin yenejai akit, kopup nuelimokini Emoyo ikanisan. Ŋin yenipikori mam epipilikini cut atwanare nakiareit.

¹² “Ido kiwadikak emalaika loka ekanisa lokotoma Perugamo ebe: Inera kwanata ŋol loejai ekileŋ loekwana kowaitin iarei kere ebe:

¹³ “Ajeni mama iboio, neejai eicoloŋ loka Satan; ido ikamunit noi ekakiror, kwabo mam ibu koŋer aiyuunika, karaida kapaarasia nuka Antipa ekajenanika, lomunotoka, loaarakinio mamakus, mama iboio Satan.

¹⁴ Konye ejai eoŋ akiro nuikidioko kajo, naarai ejaas jo ituŋa luikamunito aisisianakin naka Balaam, loesisianakini Balak acakakin aitiguikinet akonyen nuka idwe luka Isirael, ainyam nueinakinio aputosia, ka adotear da.

¹⁵ Ejaas jo da kwaŋin ituŋa luikamunito aisisianakin naka Inikolain,

¹⁶ Aso kitoronikin. Konye arai mam iswamai kwaŋin abunit atipet mamakon, ajiikini kakes kekileŋ loka aitukuka.

¹⁷ Ŋin yenejai akit, kopup nuelimokini Emoyo ikanisan. Ŋin yenipikori ainakini ŋes emanu loebwaitai, ainakini da ŋes amoru naekwaŋ, ido iwadikatai amoru ekiror lokitetet, lomam ituŋanan ejeni nabarai yenijauni.

¹⁸ “Ido kiwadikak emalaika loka ekanisa lokotoma Suatira ebe: Inera kwanata Okoku loka Edeke, ŋol loejaas akonyeke bala aipelonoreta nuka akim, akejeke da eputosi kwape aikomon nuepwatat ebe:

¹⁹ “Ajeni akoniswamisio, ka amin ka aiyuun ka aijaanakin, ka aŋirikinitekon da, ka aswamisiokon nukawasia kwape itelekaritotor kwa nusodit.

²⁰ Konye ejai eoŋ akirot na kajo, naarai inyeinit aberu ŋin, Yesebel, naenyara bon anabi, isisianakini iŋalaari da ikabulesin tetere edotearos, ka ainyam nueinakinio aputosia.

²¹ Abu kainak ŋes apak tetere itoronikin, kwabo mam ekoto aitoronikin kotoma adoteuke.

²² Koany, acakakini ŋes ojam, ka ŋul da luedoteete nepepe kaŋes acakakini toma aiticanio naepol, dimikito kitoronikinos kotoma aswamisioke.

²³ Ido aari ikedwe katwanare. Ejenunete da ikanisan kere ebe eoŋ ŋopeŋol loererei aomisio ka itauon, eoŋ da ainakini ŋinidiopet kayesi kwape ejaatar aswamisiokus.

²⁴ Konye kabala yes ice luijaas Suatira luemamei aisisianakin ŋin kere, lumam ijenete nuidulok nuka Satan, kwape ineratar, mam kebwaikini yes abwokon ace;

²⁵ nabarai kikamut noi yenijaatar, kiton naabunio.

²⁶ Ŋin yenipikori, ka aricit aswamisioka kiton awasia, ainakini ŋes apolou kama ejaas atekerin,

²⁷ Ŋes da icokiei kes kebela loka asuat, kwape ebwaŋabwaŋatar amoti nuka ekajean, kwape kainakinia da Papaka eoŋ;

²⁸ eoŋ da ainakini ŋes etop.

²⁹ Ŋin yenejai akit, kopup nuelimokini Emoyo ikanisan.