Apukokinio 10 - Ebaibuli

¹ Kasodi kaany emalaika ece Loegogoŋ ijesuni kakuj, enapit edou, kojai etaluka akouke, koputosi akekonyen bala akoloŋ, akekeje da bala ipirin luka akim.

² Kojai iitabo yenididi yenepukoritai akanike, Kibwaik akejuke nakoteten aŋolol, ka akejuke da nakokediany akwap,

³ kiworo keporoto loepol kwape loka eŋatuny loegat, Napiworoi, kinerata agirokineta akanykaarei ikeceporotoi.

⁴ Ido naadauniata agirokineta einer, abu kakoto aiwadik, konye abu keira eporoto loebuni kotoma akuj ebala ebe, “Kipucak nuenerata agirokineta akanykaarei, konye sirikiwadik ŋun.”

⁵ Emalaika da loabu kaany ebwoi kaŋolol ka akwap da, kikeu akekan nakoteten mama ejai akuj,

⁶ kiyapo kolimite ŋol loejari ikar ka ikar, lokesubi akuj; ka luejaas toma, ka akwap da, ka luejaas toma, ka aŋolol da, ka luejaas toma, ebe mam bobo ejaun apak,

⁷ konye toma apaarasia nuka eporoto loka emalaika lokikanyetekaarei, naekotor aikut akerupepe, kosodi aiyeiyea naka Edeke aitodolikinio, kwape ejaatar akiro nukajokak nuabu kolimonok ibulesinike inabin,

⁸ Kosodi abu eporoto loabu keira ebuni kotoma akuj kinera bobo keoŋ kobala ebe, “Kolot, kolem eitabo loepukoro kakan naka emalaika kaloebwoi kaŋolol ka akwap da.”

⁹ Kalot mama ejai emalaika, kalimok ŋes ainakin eoŋ iitabo. Kabala ŋesi eoŋ ebe, “Kolem, konyam ŋes; edwaruni kakoikikon, konye kaitukukon ewinyuni kwape esik loka ao,”

¹⁰ Kalem iitabo kakan naka emalaika, kanyam, kowiny kotoma aitukuka kwape esik loka ao, konye kadau ainyam, kodwaru akoikika.

¹¹ Kalimokis eoŋ ebe, “Kibusakinit jo adwarakin bobo ituŋa luipu ka atekerin, ka aŋajepa ka ikabakan da luipu.”