Apukokinio 1 - Ebaibuli

¹ Apukokin naka Yesu Kristo naabu Edeke koinak ŋes aitodikin ikebulesin nuibusakinit adoikin atipet, kitejen kanuka aijukar ekemalaika mama ejai Yokana ekebulesit,

² lokitejenuni akirot naka Edeke, ka ajenanut naka Yesu Kristo, kere nuabu koany.

³ Isirereŋitoi ŋin yenesiomi, ka ŋul da luepupete akiro nuka adwarasit kana, ka luericete da nuiwadikatai kotomakeŋ; naarai eapie apak.

⁴ Yokana mama ejaas ikanisan ikanykaarei luka Asia: Asianut kojai mama ijaas ka ainapakin nuepote kama ejai ŋol loejai, ido lokejai, ido loebuni, ido kama ejaas Imoyon ikanykaarei luejaas kiŋaren keicoloŋoke,

⁵ ido kama ejai Yesu Kristo, ekajenan lomunot, ekiyai loka ikatwak, ekayaiton da loka ikabakan luka akwapin. Mama ejai ŋol lokimina oni, lokilacuni da kotoma adiakanaretawok kanuka aokotoke,

⁶ kituluo da oni ajakanut, isasedotin luka Edeke Papake, mama ejai ŋol kojai aibuses ka ailerit, kiton ikar ka ikar. Amen.

⁷ Koany ebuni nepepe kidouon, eanyuni ŋes ŋinikoŋu, kere lukicumete ŋes; ibworos atekerin kere nuka akwap kanukeŋ. Eebo, Amen,

⁸ Ebala Ejakait Edeke ebe, “Arai eoŋ Alupa ka Omega, loejai, ido lokejai, ido loebuni, Lokapedor kere,”

⁹ Eoŋ Yokana, onacekus, loamori nepepe kayes aiticanio, ka ajakanut, ka atitiŋ, nuejaas toma Yesu, abu kajai apujan naenyaritai Patumo, kanuka akirot naka Edeke, ka aitejenun da nuka Yesu.

¹⁰ Abu kajai kotoma Omoyo kapaaran naka Ejakait, kasodi apupun eporoto loepol kokaukaŋ, bala loka arupepe,

¹¹ kobala ebe, “Kiwadik nuiany toma oitabo, kijukak ikanisan ikanykaarei, mama ejai Epeso, ka Sumuruna, ka Perugamo, ka Suatira, ka Sarudio, ka Piladelupia, ka Laodikia da.”

¹² Abu kebelokin aanyun eporoto loenera keoŋ, ido naebelokinor abu kaany ipirin lukatalai ikanykaarei luka esabu,

¹³ ido kokidiŋ kipirin lukatalai kaany loeputosi bala okoku loka etuŋanan enapit anapito naedolit akejen, koenite da amuny naka esabu atorobuke;

¹⁴ kokwaŋ akouke ka iketim da kwape ajul nukakwaŋak, kwape akako; akekonye da kwape aipeloret naka akim,

¹⁵ akekeje da aikomon nuepwatat, bala naililiauna kotoma oupa, eporotoke da kosubite bala eporoto loka akipi nuipu;

¹⁶ ido abu kitiŋite aacer akanykaarei kakanike nakoteten, ido kolom kaitukuke ekileŋ loekwana kowaitin iarei kere, ereeteke da kosubite bala akoloŋ naecai kakepedor,

¹⁷ Naanyunia ŋes, abu kebirokin akejeneke bala atwanit. Kedokok akanike nakoteten, kabala ebe, “Sirikiyoŋ, arai eoŋ losodit ka lokawasia da,

¹⁸ ido Lokajaran; abu katwanite, ido koany ajari ikar ka ikar, ajai kilaceta luka Atwanare ka luka Okatwak.

¹⁹ Aso kiwadik nuiany, nuejaas, ka nuejaunete da akaulo kaŋun.

²⁰ Aiyeiyea naka aacer akanykaarei nuiany kakanika nakoteten, ka ipirin lukatalai ikanykaarei luka esabu. Aacer ŋun akanykaarei kes imalaikan luka ikanisan ikanykaarei, ka ipirin da lukatalai ikanykaarei kes ikanisan ikanykaarei.