Anyoun 34 - Ebaibuli

¹ Kotema EJAKAIT Musa atiar, “Kikeu amor aarei nueputos kwape kanusodit: ewadikakini eoŋ amor akiro nuajaas toma amor nusodit, nuibu kobwan,

² Kitemokin moi kodoku tupuruc moru Sinai, kitodun mama ajai kaidi naka emoru.

³ Ido sirikedoku ituŋanan nepepe kajo, siriketakanu da idiotuŋanan komoru kere; karaida isipanin luka amerekekin ka aituk kinyeis adak kiŋaren kemoru kanol.”

⁴ Kikeu ŋesi amor aarei nuaputos kwape kanusodit; konyou Musa tupuruc sek, kodoka moru Sinai, kwape ecorakinitor EJAKAIT, koyana kakanike amor aarei.

⁵ Kijesun EJAKAIT kodou, kobwo kanen nepepe kaŋes, kolimo ekiror loka EJAKAIT.

⁶ Kitor EJAKAIT kakonyeneke, kolimo ebe, “EJAKAIT, EJAKAIT, Edeke loileleba aitim loesiana, loiyapi anyunyurikin, loepol aitim ka abeit:

⁷ Loiŋadat aitim mama ejaas ilukumin, loisioniei numam adolit ka aibucareta ka aronis; lomam itojokit luegwaunito akiro; loidopei numam adolit nuka lukapapa kodwekec, kodwe da luka idwekec, kiton atur nakiwuniet ka nakiwononet.”

⁸ Kisunya Musa, kitulur akou kwap, koma.

⁹ Kobala ebe, “Arai kwana adumunit asianut kakonyenekon, wu EJAKAIT, kenainait, kolosenenei EJAKAIT kokidinikosi; naarai eraas ituŋa lueninik imurisiŋa; kitimoi sio numam adolitekosi ka aronisikosi, koyanaarai araun airumetekon.”

¹⁰ Kotema atiar, “Koany, etutuki: kakonyen nuka ituŋakon kere eswamai nukaumokin, numam lem iswamatai kakwap kere, karaida kateker adio: eanyunete ituŋa kere luijai ijo mamakec aswam naka EJAKAIT, naarai esogim akirot nakeswamakini.

¹¹ Koric ijo nukecorak lolo: koany, ereŋeari koinarenikon Emorait, ka Ekanaanit, ka Ekitit, ka Eperisit, ka Ekibit, ka Eyebusit da.

¹² Kocoite, kinyek aitutuk kaluiboiete kakwap nailosete, kinyek araun atacit kamakus:

¹³ Konye ibilete itemwanakec, imunyumunyete da ipirinokec, iiepeiepete Aseraikec:

¹⁴ Naarai mam imaete ecedeke kere: naarai EJAKAIT, loerai ekekiror Ekolo, erai Edeke lokekolo:

¹⁵ Kinyek aitutuk kaluiboiete kakwap, kolosete eporo mama ejaas idekesiokec, koinakinete idekesiokec asuban, kinyek idiopet anyarar jo, inyami da asubanitike;

¹⁶ Kinyek amanyakin odwekon adwekec, adwekec alosit eporo mama ejaas idekesiokec, einakinete odwekon alosit adoteu mama ejaas idekesiokec.

¹⁷ Sirikiswamau idekesio lucaluna.

¹⁸ Kidarenenei epucit loka imugatin lumam itubuunitoi. Inyamenenei imugatin lumam itubuunitoi apaarasia akanykaarei, kwape kecorakinia jo, kapak naeseunitai kolap Abib; naarai olap Abib ŋes ilomunia kakwap nako Misiri.

¹⁹ Yenepukori aliliget kere erai yenikaŋ; ka ibarenekon kere lucraas ikiliok, ikiyaik luka imoŋin ka imerekekin.

²⁰ Ka ikiyaik luka asigirian ilakuni kimerekek: arai mam ilakuni ŋes, ibili ekemurisin, Ilakuni ikiyaik kere luka odwekon. Komamei da idio yenetakanuni kakonyeneka komamei ibore.

²¹ Iswamaenenei apaarasia akanykape, konye kapaaran nakikanyetekaarei iyenuni: Iyenuni kapak naka akor ka apak naka aisak da.

²² Iricenenei da epucit loka asabaton, ŋes loka araito nuegeete nuka akima, ka epucit loka atukonokin odula kosane loka ekaru.

²³ Etakanunete ikiliokokon kere irwan auni nolikaru kakonyen nuka EJAKAIT Edeke, Edeke loka Isirael.

²⁴ Naarai ereŋeari atekerin kakonyenekon, etalalai da iikorunokon: mam idiotuŋanan ipudakin akwapukon, nailosio atakanun kakonyen nuka EJAKAIT Ekonideke irwan auni nclikaru.

²⁵ Mam iinakini aokot nuka asubanitika kimugatin luitubuunitoi; karaida aideun asubanit naka epucit loka aleleŋio aitodol tupuruc.

²⁶ Iyauni nugeet nuka araito nuegeete kalupokon togo loka EJAKAIT Ekonideke. Mam ipoi ikalol kakile nuka totoke.”

²⁷ Kotema EJAKAIT Musa atiar, “Kiwadik ijo akiro nun: naarai kwape ejaatar akiro nun etutuk kaio ka Isirael.”

²⁸ Kojai ŋesi nina ka EJAKAIT apaarasia akaisaoŋon paaran ka kuare da; mam anyami atap karaida aimat akipi. Kiwadik ŋesi amor akiro nuka aitutuket, aicorakineta atomon.

²⁹ Kosodi kanen, nakijesunor Musa komoru Sinai, itinit Musa amor aarei nuka aitejenunet, nakijesunor ŋesi komoru, mam Musa ajeni ebe emilia amuny naka ereeteke kanuka einerike kaŋes,

³⁰ Keanyut Aaron ka idwe luka Isirael kere Musa, koany, emilia amuny naka ereeteke; kokuriakaros aikunyakin ŋes.

³¹ Kiworo Musa kes; kobonut Aaron ka ijaka kere luka ekodet neajai ŋesi; kiner Musa kakes.

³² Kokau kikunyut idwe luka Isirael kere; kicorak kes nun kere nuabu EJAKAIT kinera kaŋes komoru Sinai.

³³ Kedau Musa einer kakes, kiswapa ekereet,

³⁴ Konye nakelomanaria Musa akonyen nuka EJAKAIT einer kaŋes, kolacanari aiswapet, aitodol nakelomununia; kolom, kolimok idwe luka Isirael kere nukicorakinio;

³⁵ Koanyut idwe luka Isirael ereet loka Musa, ebe emilia amuny naka ereet loka Musa: kiswapa Musa bobo ereeteke, aitodol naalomaria einer kaŋes.