Anyoun 33 - Ebaibuli

¹ Kotema EJAKAIT Musa atiar, “Konyoutu koloto kane, ijo ka ituŋa lukitolomuni kakwap nako Misiri, kolomasi yesi akwap nakolo esiyapokinit eoŋ Aburaam, ka Isaak, ka Yakob ebe,, Ainakini akoniwur.’

² Ido eyakuni emalaika koinarenikon; ereŋeari da Ekanaanit, ka Emorait, ka Ekitit, ka Eperisit, ka Ekibit, ka Eyebusit da:

³ Kakwap naeleleete akile ka esik: naarai mam eoŋ kiupakin kayes; naarai iraas yesi ituŋa lueninik imurisiŋa: kenyek amudiar yes korot.”

⁴ Kepuput ituŋa akiro ŋun nueroko, kitururwoto; komamuun ituŋanan yenisirit akekuan.

⁵ Kotema EJAKAIT Musa atiar, “Kolimok idwe luka Isirael ebe, ‘Iraas yesi lueninik imurisiŋa: arai kiupakin eoŋ kayes karaida apak naedit noi, kamudiari eoŋ yes: asa do kolaca luisirito, kasodi konyet ajenun nukeswamakini yes.’’’

⁶ Kolacasi idwe luka Isirael luesirito kesi ageun komoru Koreb kaiyatakin.

⁷ Ayananari Musa ewema asiponokin kina kiidukurun; kolwanikina koidukurun; komaik Ewema loka airiamunun. Kosodi ŋinituŋanan yenekoto EJAKAIT alosenen owema laka airiamunun, loajai kina kiidukurun.

⁸ Kosodi naelomanaria Musa owema, anyoununete ituŋa kere, kobwo ŋinitunanan kokek loka ewemake, asesen Musa aitodol neelomaria owema.

⁹ Kosodi kanen, naalomanaria Musa toma owema, kijesunun epir loka edou, kobwo kokek loka ewema: kinerakinos EJAKAIT ka Musa.

¹⁰ Koanyut ituŋa kere epir loka edou ebwoi kokek loka Ewema: konyout ituŋa kere komaata, nlnirunanan kokek loka ewemake.

¹¹ Kinerenenas EJAKAIT kaMusa kiteos, kwape ineratar etuŋanan kopaperoke. Kobononori bobo ŋesi oidukurun: konye ekekejaanakinan Yosua, okoku loka Nun, ekatumunan, mam anyoununei koWema.

¹² Kotema Musa EJAKAIT atiar, “Koany, ibala ijo eoŋ ebe, ‘Koyana ituŋa lu’: ido mam kitejcnikinit eoŋ lokiyakiari keoŋ, Konye ibu ijo kiner ebe,, Kajeni jo kekonikiror, ibu da kodum asianut kakonyeneka.’

¹³ Kanuka nun, kenainait, arai adumunit asianut kakonyenekon, kitodikinai ikonirotin, tetere kajenuni jo, kasodi adumun asianut kakonyenekon: ido koomoom ebe erai ateker na ikonituŋa.”

¹⁴ Kotema ŋes atiar, “Ajaenena eoŋ kajo, eoŋ da kesiyenuni jo.”

¹⁵ Kotema ŋes atiar, “Arai mam ijaenena keoŋ, sirikiiyana sio nina.

¹⁶ Naarai ikwaikinio ai ejenunio ebe abu eoŋ kadum asianut kakonyenekon, eoŋ ka ikonituŋa da? Mere ti ŋes ejenunere naarai iupa ijo kasio, kasodete atiakunio, eoŋ ka ikonituŋa, kotoma otuŋa kere luejaas akwap?”

¹⁷ Kotema EJAKAIT Musa atiar, “Eswamai ŋin da nainer ijo; naarai ibu kodum asianut kakonyeneka, eoŋ da kajeni jo kekonikiror.”

¹⁸ Kobala ebe, “Kenaiŋait, kitodik eoŋ akoniibuses.”

¹⁹ Kotema atiar, “Etotori akajokis kere akonyenekon, alimori da ekiror loka EJAKAIT kakonyenekon; ido ekonakini asianut nin yenakoto aikonakin asianut, etimi da yenakoto aitim.”

²⁰ Kobala ebe, “Mam ipedori aanyun akakonyen: naarai mam ituŋanan kaanyuni eoŋ kosodi aijar.”

²¹ Kobala EJAKAIT ebe, “Koany, ejai aibois naeapie keoŋ, ibwoi ijo katiiba:

²² Kosodi naitorio aibusesuka, kepiikini jo toma acilat naka atiiba, arapakini jo kakakan aitodol neatuboror eoŋ:

²³ Alemari akakan, ianyuni ijo epuraka; konye akakonyen mam eanyunos.’