Anyoun 29 - Ebaibuli

¹ Na ŋes akirot naiswamakini kes aitalaunia kes, aijaanakin eoŋ kosasedotene: ilemuni emoŋ lotobait ka imerekekin iarei lumam eŋwalito,

² Ka imugatin lumam itubuunitoi, ka aluŋuren numam itubuunitoi nuinyalakinitai akinyet, ka imugatin luibenibena lumam itubuunitoi luinyonyoikinitai akinyet: ipouni kes kakiria nuidicic,

³ Ibwaikini kes odita ediopet, iyauni kes kodita, ka emoŋ lotobait ka imerekekin iarei.

⁴ Iyauni Aaron ka odweke okek loka ewema loka airiamunun, iloŋi kes kakip.

⁵ Ilemuni igoen, itanapi Aaron ekooti, ka ekaso loka epod, ka epod, ka yenikatorob, ieni ŋes kaener naka epod naicipitai kapirianut:

⁶ Ienienakini egoe akouke, idokokini aboko nakalaunan ogoe ŋol.

⁷ Kosodi ijo alemun akinyet nakinyonyoanakina, kobukok akouke kinyonyoanak ŋes,

⁸ Iyauni odweke da, kosodi aitanap kes ikootin.

⁹ Ieni kes kaeneta, Aaron ka odweke, ienieni igoen akwesikec: eraunos do isasedotin kokisil lomam edaun: itiakuni ijo Aaron ka odweke.

¹⁰ Iyauni da emoŋ lotobait kinaren kewema loka airiamunun: idokokinete Aaron ka odweke akaninikec omon lotobait.

¹¹ Iari ijo emoŋ lotobait kakonyen nuka EJAKAIT, kokek loka ewema loka airiamunun.

¹² Ilemuni aokot nuka emoŋ lotobait ijukonokini da amumwara nuka etem kebokoritikon; ibukokini da aokot kere kwap ketem,

¹³ Iwaruni da asiepai kere naerapit lukotoma, ka asiepai naka emany, ka iŋalur iarei, ka asiepaikec, icwei kes kotem.

¹⁴ Konye akiriŋ naka emoŋ lotobait, ka emukuleke, ka ikijitike icwei ijo kokina kiidukurun; erai ainakinet naka adiakar.

¹⁵ Iyanaari da emerekek ediopet; idokokinete Aaron ka odweke akaninikec akou naka emerekek.

¹⁶ Iari do ijo emerekek, iyanaari aokotoke, ibwatanakini otem.

¹⁷ Itubutubei emerekek, ilosi lukotomake, ka akeieke, kosodi aibwaikin inerioke ka akouke nepepe.

¹⁸ Icwei emerekek kere kotem: erai ainakinet naicweio mama ejai EJAKAIT: erai asakat naeuru saa, ainakinet naeinakinere kakim mama ejai EJAKAIT.

¹⁹ Iyanaari da emerekek ece; idokokinete Aaron ka odweke akaninikec akou naka emerekek.

²⁰ Kosodi ijo aiar emerekek, iyaŋaari aokot, ijukono kini okobet loka akit nakoteten naka Aaron, okoben da luka aki nukoteten nuka odweke, obokorokec lukapolok luka akaninikec nukoteten, obokorokec lukapolok da luka akeienekec nukoteten, ibwatanakini da aokot otem.

²¹ Ilemuni aokot nuejaas otem ka akinyet nakinyonyoanakina ibwatakini Aaron onapeneke da, odweke da, ka onapenekec da nepepe kaŋes: italaunio ŋes, ka inapeneke, ka odweke, ka inapen luka odweke da.

²² Ilemuni da asiepai nuka emerekek ka asonyok ka asiepai naerapit lukotoma ka asiepai naka emany ka iŋalur iarei ka asiepaikec, ka amurwo nakoteten; naarai erai emerekek loka atiakunio:

²³ Ka emugati ediopet, ka aluŋuret adiopet naka imugatin luinyalakinitai akinyet, ka emugati ediopet loebenibena kodita loka imugatin lumam itubuunitoi loejai akonyen nuka EJAKAIT:

²⁴ Ibwaikini kere akanin nuka Aaron ka akanin nuka odweke; ijaŋari kes araun ainakinet naijanio kakonyen nuka EJAKAIT.

²⁵ Ŋaari kes kakaninikec, icwei kes kotem kainakinet naicweio, araun asakat naeuru saa kakonyen nuka EJAKAIT: ŋes ainakinet naeinakinere kakim mama ejai EJAKAIT.

²⁶ Iyanaari atorob naka emerekek loka atiakunio naka Aaron, iianari araun ainakinet naijanio kakonyen nuka EJAKAIT: eraun nakon,

²⁷ Italauni da atorob naka ainakinet naijaŋio, ka amurwo naka ainakinet naedakakina, naijanio, naedakakinitai, nuka emerekek loka atiakunio, kes nuka Aaron ka nuka odweke.

²⁸ Eraunos nuitebeitai Aaron ka odweke ikar kere kodwe luka Isirael: naarai erai ainakinet naedakakinitai: eraun ainakinet naedakakinitai kodwe luka Isirael naka asuban nuka ainakinetakec nuka ainapakin, ŋes ainakinet naedakakinitai mama ejai EJAKAIT.

²⁹ Eraunos inapen lukalaunak luka Aaron luenapete odweke luetupanakinete ŋes, ainyonyoanakinio kotomakec, atiakunio da kotomakec.

³⁰ Enapenenei okokuke loeraun esasedoti aiboisike apaarasia akanykaarei naelomaria owema loka airiamunun aijaanakin toma aibois nakalaunan.

³¹ Iyanaari emerekek loka atiakunio, ipoi akirinike kaibois nakalaunan.

³² Enyamete Aaron ka odweke akiriŋ naka emerekek, ka imugatin lueiaas odita kokek Ioka ewema loka airiamunun.

³³ Enyamete kesi iboro nul lualucere, atiakunia ka aitalaunia kes: konye mam emoit enyami nul naarai eraas lukalaunak.

³⁴ Arai kideun akiriŋ naka atiakunio, arai imugatin aitodol tupuruc, icwei do ijo luideuna kakim: mam enyamio, naarai eraas lukalaunak.

³⁵ Iswamakini ijo kwaŋin Aaron ka odweke, kwape ejaatar nukecorak jo kere: itiakuni kes apaarasia akanykaarei.

³⁶ Ŋinipaaran iinakini emoŋ lotobait loka ainakinet naka adiakaret alucio: itesegaari etem nailucio ŋes; inyonyoanakini ŋes aitalaun,

³⁷ Iluci etem apaarasia akanykaarei, italauni ŋes: eraun etcm lokalaunan noi; yenetirori etem kere eraun yenikalaunan.

³⁸ Lu kes luiinakini ijo otem; imerekekin iarei luka ekaru ediopet, ŋinipaaran komam aisal.

³⁹ Iinakini idiopemerekek tupuruc; iinakini yenikiareit eboŋ:

⁴⁰ Nepepe kidiopemerekek, idiopet kotomon yenika epa * Ioka akiria nuidicic nuinyalakinitai kidiopet koonon yenika ekin t laka akinyet naerukuk: ka idiopet koonon yenika ekin loka ebino araun ainakinet namatat.

⁴¹ Iinakini imerekek yenikiareit eboŋ, iswamakini ŋes kwape ejaar ainakinet naka akiria naka tupuruc, ido kwape ejaar ainakineteke namatat, araun asakat naeuru saa, ainakinet naeinakinere kakim mama ejai EJAKAIT.

⁴² Eraun ainakinet naicweio naduc anatar aturiokus okek loka ewema loka airiamunun kakonyen nuka EJAKAIT: nekiriamuni kayes, ener kaio kanen,

⁴³ Ncn da ŋes kiriamun kidwe luka Isirael; italauni aibusesuka Ewema.

⁴⁴ Etalauni eoŋ ewema loka airiamunun, ka etem: etalauni da Aaron ka odweke, aijaanakin eoŋ kosasedotene.

⁴⁵ Eboienenei eoŋ kodwe luka Isirael, araun Ekecedeke.

⁴⁶ Ejenunete da ebe, ani Eoŋ EJAKAIT Ekecedeke, loetolomuni kes kakwap nako Misiri, tetere eboie kamakec: Arai eoŋ EJAKAIT Ekecedeke.