Amos 8 - Ebaibuli

¹ Abu Ejakait EDEKE ketodik kwanata: ido koany, edita loka araito nuka akamu.

² Kotema atiar, “Amos, iany inyo?” Katema atiar, “Edita loka araito nuka akamu.” Kosodi EJAKAIT atemar eoŋ atiar, “Abunok esaŋe ikatuŋa Isirael; Mam bobo enaeenenei kes.

³ Ebala EJAKAIT EDEKE ebe, Eraunos ikososinei luka eyekalu aibwolol kapaaran kaŋin; Ipu awat nukatwak; Kaniniibois kere ecakanarete kes kina kililinete.’

⁴ Kiirasi nu, yes luipudapudaete luilwaritos, Luitananete lukican luka akwap,

⁵ Luibalas ebe, “Wori bo edaunor ailamun naka elap, Tetere kigwelari akima? Ka apaaran da nakasabato, Tetere kijaikini akima? Kitidisiari epa, kitopoloori esekel, Kimoda kainineta nukainal,

⁶ Tetere kigweli yenikiean kepuesa, Ka yenilwaritoi kamuk, Kigwelari da agugu nuka akima.”

⁷ Eyapo EJAKAIT elimit apolou naka Yakob ebe, “Abeic mam kemurwokin adiopet kaswamisiokee.

⁸ Mam kereka akwap emarani kanuka ŋun, Ka ninirunenan da yeniboie kotoma aibworo? Eebo, enyouni eut kwape Ecor; Ilapanari kosodi aboŋori bobo kwape Ecor loko Misiri.”

⁹ Ebala Ejakait EDEKE ebe, “Kosodi kanen, kapaaran kaŋin, Ecolomari akoloŋ kidin paaran, Erumutoni akwap toma aica naka apaaran.

¹⁰ Eculuori ipucinokus aibworo, Ikososineikus kere akuudian; Ayauni ipukoi toma aŋabes kere, Ka epata toma ninikou; Etuluori bala aibworo okoku loteluna, Esaneke bala apaaran naedwar.”

¹¹ Koany, ebala Ejakait EDEKE ebe, “Epote apaarasia nuejukaria eoŋ ebeli kakwap, Mere ebeli loka inyamat, karaida akure naka akipi, Konye loka akiirar akiro nuka EJAKAIT.

¹² Irimete anyoun kaŋolol kiton aŋolol, Anyoun kagolitomei kiton kide; Ekerete lailo ka laije amoot akirot naka EJAKAIT, Komam edumunete.

¹³ “Kapaaran kaŋin iiloros abekon nutemel Ka ikatumunak da kanuka akure.

¹⁴ “Ŋul luiyapoete elimito aronis naka Samaria, Ebalas ebe, ‘Kwape ejaria ekonideke, ijo Dan,’ Ido ebe, ‘Kwape ejaria epone loka Beer-seba,’ Ibiroros kesi, mam oobo enyounete.”