Amos 7 - Ebaibuli

¹ Abu Ejakait EDEKE ketodik kwanata: ido koany, kosub ŋesi emaase kageunet naka alomun naka alibun nakokau; ido koany arai alibun nakokau kedau ekabaka aiŋer anyake.

² Kosodi kanen kedau emaase ainyam anya nuka akwap, kasodi eoŋ atemar atiar, “Wu Ejakait EDEKE, kenainait, kisioni! Ikwaikini do ai Yakob ebwoi? Naarai edit ŋesi!”

³ Kiitu EJAKAIT kanun; Kobala EJAKAIT ebe, “Mam ejauni.”

⁴ Abu Ejakait EDEKE ketodik kwanata: ido koany, kiworo Ejakait EDEKE erube loka akim; kidopoo ataro naepol, kouta aiŋiny akwap.

⁵ Kasodi eoŋ atemar atiar, “Wu Ejakait EDEKE, kenainait, kinyek! Ikwaikini do ai Yakob ebwoi? Naarai edit nesil”

⁶ Kiitu EJAKAIT kanun; Kobala Ejakait EDEKE ebe, “Mam nin da ejauni.”

⁷ Abu ŋesi ketodik kwanata: ido koany, ebwoi EJAKAIT eiduny karwatat naadukio kebiriji, itiŋit ebiriji kakanike.

⁸ Katema EJAKAIT eoŋ atiar, “Amos, iany inyo?” Kabala ebe, “Ebiriji.” Kosodi EJAKAIT atemar atiar, “Koany, ebwaikini ebiriii kidin kikatuna Isirael; Mam bobo enaeenenei kes.

⁹ Itisilio aiboisio nuiceleleete nuka Isaak, Iswapete aiboisio nukalaunak nuka Isirael; Anyoikini da ekek loka Yeroboam kekilen.”

¹⁰ Kosodi Amasia esasedoti loka Bet-el aiyakiar mama ejai Yeroboam ekabaka loka Isirael ebe, “Inerunit Amos asurokin jo kokidin kekek loka Isirael: mam akwap epedori atitiŋikin akekiro kere.

¹¹ Naarai ebala Amos kwanata ebe, ‘Etwani Yeroboam kekilen, Abeit da ijoreorio Isirael Anyoun kakwapuke.’ ”

¹² Bobo da kotema Amasia Amos atiar, “Ŋo ekadwaran, kolot, kokerea akwap naka Yuda, konyam atap kaŋina, kodwara da kaŋina,

¹³ Konye sirikidwara bobo koBet-el; naarai ŋes aibois nakalaunan naka ekabaka, erai da etogo loka ekabakane.”

¹⁴ Kosodi Amos aboŋokin Amasia ebe, “Mam arai enabi, karaida okoku loka enabi; konye arai ekeeokon, ido eketemonokinon ikito luka esukumor.

¹⁵ Abu EJAKAIT kalem kameet esipan, katema EJAKAIT atiar, ‘Kolot, kodwarak ikatuŋa Isirael.’

¹⁶ “Aso do, kiira akirot naka EJAKAIT. Ibala ijo ebe, ‘Sirikidwar aluikin Isirael, Sirikilimonok aluikin ekek loka Isaak.’

¹⁷ Kanuka ŋun ebala EJAKAIT kwanata ebe: Eraun akoniberu naadote kotoma ore, Ibiroros idwekon lusap ka lupesur kekilen, Ekorio alupokon kaitemis; Ŋo da itwanikini akwap namam elai, Abeit da ijoreorio Isirael anyoun kakwapuke.”