Amos 5 - Ebaibuli

¹ Ŋo ekek loka Isirael, kiira akirot na, Naenera eoŋ akuudian joo

² “Ebiror abekot naka Isirael; Mam enyouni bobo: Alatakin alupoke; Emamei yenitonyouni.”

³ Naarai ebala EJAKAIT Edeke kwanata ebe: “Ere loalomunia elukumit, Ideunos akwatat, Ŋol da loalomunia akwatat, Ideunos itomon, Lukokek loka Isirael.”

⁴ Naarai ebala EJAKAIT ekek loka Isirael kwanata ebe: “Komoata eoŋ, ijarete;

⁵ Konye sirikimoata Bet-el, Karaida alomar Giligal, Sirikitoroto Beer-seba: Naarai abeit elosi Giligal aijoreorio, Epalun Bet-el.”

⁶ Komoata EJAKAIT, iiarete; Kinyek anokun kwape akim kokek loka Yosep, Idopori komameun yenitudeŋi kobet-el,

⁷ Yes luibelokinete etube araun adwaris, Luicakakinete adolit kwap!

⁸ Komoata ŋes lokesubi aacer Piliades ka Orion, Loibelokini etolim loka atwanare araun atupuruc, Loitumutonori apaaran kakuare; Loenyarauni akipi nuka aŋolol, Ebukokini kes toma akwap; EJAKAIT ŋes ekekiror.

⁹ Enesari ŋesi lukagogonok katular, Tetere ebunokini amudiar ere loegogon.

¹⁰ Elaete ŋin yenitoroni korute, Esacete ŋin yeninera nuitenara,

¹¹ Aso do naarai ipudapudaete lokican, Itelemete ŋes akima, Ipotu kodukoto itogoi luka amor nuegerer, Konye mam iboiete kotoma; Ipotu kiraata amanat nuejok nuka emusabibu, Konye mam imasete ebinokec.

¹² Naarai ajeni kwape ipuatar aibucanaretakus, Kwape da eiliiliotor aronisiokus; Yes luiroikinete ikadolitok, Luitelemenenete ainakineta, Luiremosi luilwaritos awai korute.

¹³ Kanuka ŋun ililiŋi locobe kapak kaŋin; Naarai erai apak naerono.

¹⁴ Komoata aiokis, konye mere aronis, Tetere ijarete: Tetere ejaenena EJAKAIT, Edeke loka ajoresio kayes, Kwape kibalatar.

¹⁵ Kolaata aronis, kominas ajokis, Kiticat etube korute: Motoko kosianak EJAKAIT, Edeke Ioka ajoresio, Aatoŋot naka Yosep,

¹⁶ Kanuka ŋun ebala EJAKAIT, Edeke loka aioresie, EJAKAIT, kwanata ebe: “Ejaun aimony toma asisiarin kere nuelalak; Ebalasi kotoma orotin kere ebe, ‘Wu okwe! Wu okwe!’ Enyaraunete ekakorion aibworo, Ka nul da luepiriaka akuudian, aimony.”

¹⁷ Ebala EJAKAIT ebe, “Ejaun teni aimony amanat kere nuka emusabibu: Naarai etori eoŋ kidinikus.”

¹⁸ Itukwi yes luimielas apaaran naka EJAKAIT! Kanukinyo ikototor apaaran naka EJAKAIT? Erai kereka amuton, kwabo mere aica.

¹⁹ Bala ekeri etuŋanan kama kenatuny, Kiriamas kedubu; Arai elomari togo kogonakin akan arwatat, Kokonyi ŋes emun.

²⁰ Mam kereka apaaran naka EJAKAIT eraun amuton, Kwabo mere aica? Amuton naeiesi cueucue, Naemamei amwekimwek kotoma?

²¹ “Alait, ameni ipueinokus, Kwabo mam esiyalamikinit atukonokinetakus nukaiyamakina.

²² Eebo, karaida iinakinete eoŋ ainakinetakus nuieweio ka ainakineta nuka akiria, Mam acamuni kes: Mam da etei ainakinetakus nuka ainapakin Nuka itianikus luetarioko.

²³ Kolema ca ijo eporoto loka ikososineikon; Naarai aneri apupun aruo naka adeudeunokon,

²⁴ Konye kolelei etube kwape akipi, Ka adolit da kwape aguurut naelelei ikar kere.

²⁵ “Ijo ekek loka Isirael, ipotu kereka koinut eoŋ asuban ka ainakineta kamodiŋ ikar akaisaoŋon?

²⁶ Eebo, ipotu kodakata Sikut ekabakakus ka Kaiwan aputosiakus, aacerit naka edekekus, loipotu kiswamaut.”

²⁷ Ebala EJAKAIT, loerai ekekiror Edeke loka aioresio ebe, “Kanuka ŋun, ainakini yes aijoreoreo juwai Damasiko.”