Akuudian 3 - Ebaibuli

¹ Arai eoŋ ituŋanan yenaanyunit aitieanio Kobela loka anyunyurake.

² Abu kenarenik, ketolot da, Kotoma amuton kwabo mere aica.

³ Abeit ieebokinit aibelonokin akekan Asurokinia eoŋ apaaran kere.

⁴ Esirinyo ŋesi akakiriŋ ka akamuny; Abilibil akakoio.

⁵ Aduk mama ajai, Kerigau kepiu ka apason.

⁶ Kesiboiki aiboisio nukamuton, Kwape luketwaka kolosek.

⁷ Kabwau, mam apedori alomar; Esilanirir ekarikot.

⁸ Eebo, kamony, kelala da ayuunio, Egoluni ailipika kina,

⁹ Abwa irotinika kamor nuikee, Etukud ŋesi ikasokono,

¹⁰ Esubit kamakaŋ bala adubu naeperuni, Kwape eŋatuny loeŋopi kaiboisio nukaiyeiyea.

¹¹ Ketapaa korotinika, kapoopo; Ketisilio.

¹² Eket akabwake, Kasipoki araut idesiara yenika emaleke.

¹³ Etolomik imalia luka akuraruke Oŋeretenyaka.

¹⁴ Arau lokimuaritono kotoma otunaka kere; Ekosiokee apaaran kere,

¹⁵ Kesimono adwaris, Ketuup aliasit naeta ria,

¹⁶ Abil da ikakel kinaroi, Karapak ekurwon.

¹⁷ Itwalan ekatau kama ejai ainapakin; Kemurwoki aiyalama kwape ejaar,

¹⁸ Kabala ebe, “Aolio akagogoŋ, Ka akamuno da mama ejai EJAKAIT.”

¹⁹ Kiitu aitieanioka, ka aitururuka, Aliasit naeta ria ka epiu da.

²⁰ Iitununei ekatau, Ipirisiar kotomakan,

²¹ Keitu nun, Ŋes ejaunor amun.

²² Mam enaŋi aitim naka EJAKAIT, Naarai mam inorari aisionike.

²³ Itet ŋinitupuruc, Epol akonimunonut.

²⁴ Ebala ekatau ebe, “EJAKAIT ŋes akorakineteka; Tape amuno ŋes.”

²⁵ Ejok EJAKAIT kama ejaas luidarito ŋes, Kama ejai aijar naemoot ŋes.

²⁶ Ejok ituŋanan amunoneno ka aidarenen kaiyaparit Aitajar naka EJAKAIT.

²⁷ Ejok ituŋanan aidak aiookot Kotoma atumunike.

²⁸ Kogitar aiboi bon kililin, Naarai edokoki ŋesi ŋin.

²⁹ Kibwaik akeituk apua; Elemuni kojai amun.

³⁰ Koialak ekeitinyo necjai yenibapi; Kimonikin amoromoroo,

³¹ Naarai mam EJAKAIT eiali Ikar kere.

³² Naarai karaida keyauni ican, Konye isionie ŋesi kwape ejaar apolou naka aitimike.

³³ Naarai mam imiela aitiean idwe luka iruna, Karaida aitakadikin kes.

³⁴ Aipudapuda Ienan kere luka akwap,

³⁵ Aitirii etube loka ituŋanan Kakonyen nuka ŋol loejai kuju kakuj.

³⁶ Aitapaar ituŋanan kakiroke, Mam EJAKAIT itojokit ŋun.

³⁷ Iŋai bo ŋol loinera kitodolikinoi, Arai mam EJAKAIT icorakinit?

³⁸ Mam kereka elomunete aronis ka aiokis Kaituk naka ŋol loejai kuju kakuj?

³⁹ Kanukinyo irurumaa ituŋanan yenikajaran, Ituŋanan yeniticanio kanuka aronisioke?

⁴⁰ Kerereoto, ketemo iponesiowok, Kaboŋosi bobo mama ejai EJAKAIT.

⁴¹ Ketonyoutu itauonowok ka akaniniwok da Mama ejai Edeke toma akuj.

⁴² “Kidiaka ido kipaliiki; Mam jo isionit.

⁴³ “Irapar kanyunyura korukitor sio; Iar komam itimit.

⁴⁴ Irapar kedou Kinyek ailip apedor.

⁴⁵ Ibu kituluo sio aiswageta ka asusujo Kokidin katekerin.

⁴⁶ “Lukasurupokosi kere Kiwoonanakis aituke.

⁴⁷ Kidolokis sio akurian ka aipany, Aijasio ka amudiario,

⁴⁸ Elele akakoŋu ieorin luka akipi, Kanuka amudiario naka akoku naka ikatuŋa,

⁴⁹ “Ebuki akakoŋu akiyo, komam itanani, Komam eionoi,

⁵⁰ Aitodol naesesenia EJAKAIT kwap, Koany ejai toma akuj,

⁵¹ Itakadikinit akakoŋu akaijar, Kanuka apesur kere nuka creka.

⁵² “Kamejata noi lukasurupoka kwape kakwcny, Komam akirot,

⁵³ Kaeakakis toma aipany ajari, Kebiribiroto kamor.

⁵⁴ Arapasi akip akouka; Kabala ebe, ‘Aolio.’

⁵⁵ “Abu kewone ekonikiror, wu EJAKAIT, Kajai aidules naka aipany,

⁵⁶ Ibu kiira ekaporoto ebe: “Sirikimina akonikii, Kaimonyoka aiŋarakinio.’

⁵⁷ Ibu kikuny kapaaran nakewoneo jo: Kobala ebe, ‘Sirikikurianar.’

⁵⁸ “Wu EJAKAIT, kipurok akiro nuka etauka; Ilaku akaijar.

⁵⁹ Wu EJAKAIT, iany akamwanio; Kotub ijo akakiro,

⁶⁰ Iany ekecenyanit kere, Ka akeeeinerun da kere mamakan.

⁶¹ “Ibu kiira, wu EJAKAIT, amorositikee, Ka ainerunikec da kere mamakan;

⁶² Aŋajepa nuka ŋul kalukanyoikinete, Ka nukalosikinito apaaran kere.

⁶³ Koany aiboikee ka anyounikee; Arai eoŋ ekecekosio,

⁶⁴ “Wu EJAKAIT, itaeakini kes Kwape ejaar aswam naka akaninikec.

⁶⁵ Iinakini kes aninik naka itauon, Ekonikenit mamakee.

⁶⁶ Irenet kes kanyunyura, Imudiari kes kokwap kakuj naka EJAKAIT.”