Ageun 34 - Ebaibuli

¹ Koloma Dina apese naaurikin Lea Yakob, aanyun apesur nuka akwap.

² Koanyu Sekem ŋes, okoku loka Kamor Ekibit, ejakait loka akwap; kikam ŋes, koperoto kaŋes, kitisil.

³ Kiketakin eketau mama ejai Dina akoku naka Yakob, komina apese, kinera kapese kasianut.

⁴ Kinera Sekem kapapake Kamor atiar, “Komanyakinai apese nin.”

⁵ Kiira Yakob ebe abu ŋesi komunau Dina akokuke; kojaas odweke kikebaren orony; kililin Yakob aitodol nakebonunioto.

⁶ Koloma Kamor, papake loka Sekem neejai Yakob ainerun kaŋes,

⁷ Kiirasi odwe luka Yakob ŋun kobonut korony; kokadakis ikesa, konyunyurikinos noi, naarai abu ŋesi kiswama nuka abaŋaanut koIsirael apero kakoku naka Yakob; akirot nin namam ibusakinit aswam.

⁸ Kineru Kamor kakes ebe, “Etau loka okokuka Sekem ipuda akonipese: kenainait koinak ŋes komany.

⁹ Ido kamanyanakinos yes kasio; koinanakis sio da akusipesur, yes da komanyete nukosi.

¹⁰ Kiboienenete kasio; ejai akwap akonyenekus; kiboienenete, kogwelanarete kotoma, kodumut iborokus.”

¹¹ Abu Sekem kotema papa loka apese ka ikeinacan atiar, “Kadum asianut kakonyenekus, lukibilakinete, kes kainakinete,

¹² Etiai kere loka iboro luka emanyit lukitemarete kainakinete kwape ikototor: konye koinakinai apese kamany.”

¹³ Kobonokis odwe luka Yakob Sekem ka Kamor papake kainal, naarai abu komunau Dina kinacikec.

¹⁴ Kotemasi atiar, “Mam sio kipedori akirot na, akorakin kinacikosi nol lomam ekepep: naarai ŋes akirot naka ileic kamakosi.

¹⁵ Kopone kala bon, kicamu isio yes: koraut kwape kasio, ebe nolikiliokit kayesi akepeneneo;

¹⁶ Kasodete akorakin yes akosipesur, ka sio da kamanycnenete nukus, ido keboienenete kayes, karautu ateker adiopet.

¹⁷ Konye arai mam icamunito akepio; kiyanaari akosipese, kaloto.”

¹⁸ Kisiyalamikis akecekiro Kamor, ka Sekem okoku loka Kamor.

¹⁹ Mam abu ekatumunan kiyap aswam akirot, naarai aminarit apese naka Yakob. Kitopolooritete aitelekarit kere kotogo leka papake.

²⁰ Kopotu Kamor ka Sekem okokuke orute loka ekecere, kinerut kituna luka erekec atiar.

²¹ “Inapakina ituŋa ŋul, aso kacamakisi kes aiboienen kakwap ka agwelanar; naarai koany, elalakinit kes akwap; kamanyenenete akecepesur, ka oni da kakoranakinete kes nuwok.

²² Kopone kalo bon ŋes iyuuniata ituŋa nul aiboienen kaoni, araun adiopeteker, arai ekepio nolikiliokit kaoni, kwape ekepere kes.

²³ Mam ti ikecebaren, ka ikeceboro, ka ikecetian kere keraunos luwok? Konye kacamutu kes, tetere ibojenenete kaoni.”

²⁴ Apotu kere lukelomarete korute loka erekec kiirasi Kamor ka Sekem okokuke; kokepai ŋolikiliokit kere lokelomanari korute loka erekec.

²⁵ Kosodi kapaaran kanakiwunict, eriebas kesi, idwe iarei lutelepai luka Yakob, Simeon ka Lebi, iinacan luka Dina, kitin nolitunanan ekekileŋ, kosurokis ere kaiyeiyea, koarata ikiliok kere.

²⁶ Koarata Kamor ka Sekem kakwanis naka ekileŋ, kitolomut Dina kotogo loka Sekem, koloto.

²⁷ Kopotu odwe luka Yakob mama ejaas luearar, konata ere, naarai apotu komunaut kinacikec.

²⁸ Koyanaasi ikecesipanin ka ikecebaren ka asigiriakec, ka luajaas ore, ka luajaas omanikor;

²⁹ Konatasi abarakec kere, ka idwekec ludidik, ka aijorokec, kere luajaas togo.

³⁰ Kotema Yakob Simeon ka Lebi atiar, “Kisiyalononoto eoŋ, aituwur eoŋ kotoma kaluiboienenete kakwap, kotoma oKanaanin, ka oPerisin: ido eoŋ, naarai ikidioko ikaruna, etukonokinos rwaru aitusurup eoŋ, ka aitoji eoŋ, kamudiario, eoŋ ka ekakal.”

³¹ Kotemasi atiar, “Kejokuna kereka ŋes aikonakin kinacikos bala nadote?”