Ageun 3 - Ebaibuli

¹ Kepiiriana emun aitelekarit itian kere luka ais lukesubi EJAKAIT Edeke, Kotema ŋesi aberu atiar, “Eebo, abala teni Edeke ebe, ‘Mam inyamenenete araito nuka ekitoi ke re lokomanikor’?”

² Kotema aberu cmun atiar, “Kisiikinitai ainyam araito nuka ikito lukomanikor;

³ dimarai araito nuka ekitoi loejai kidiŋ omanikor, ŋun abala Edeke ebe, ‘Mam inyamenenete, karaida atiror, kinyeis atwakare.’’’

⁴ Kotema emun aberu atiar, “Mam cut itwakete.

⁵ Naarai ejeŋi Edeke ebe apaaran napinyamiata ŋun, ŋes ekwenyuniata akusikonye, iraunos yesi da bala Edeke, ajenenen nuejok ka nueroko.”

⁶ Nakeanyunia aberu ekitoi ebe ejok ainyam, isiyalamikinit da akonye, ekitoi da erai loisiŋobelei ayaun acoa, koden araitoke, konyam; koinak okilenike da, konyam.

⁷ Kitekwenyunai iarei kere akecekonye, kojenut ebe kimuialalas, kodonyut akui nuka etini, kosubut arobai.

⁸ Kiiras eporoto loka EJAKAIT Edeke itorit omanikor ariripet naka apaaran, konopata etuŋanan ka akeberu kakonyen nuka EJAKAIT Edeke kokidiij okito lukomanikor.

⁹ Kiworo EJAKAIT Edeke etuŋanan kotema ŋes ariar, “Ai bo ijai ijo?”

¹⁰ Kotema ŋesi atiar, “Abu keira ekoniporoto komanikor, kakurianar, naarai amujalal: kanop.”

¹¹ Kotema atiar, “Iŋai bo kilimokini jo ebe imujalal? Inyama ca ijo araito nuka ekitoi loabu keeorak jo ebe mam inyami?”

¹² Kobala etuŋanan ebe, “Aberu nakiinakin ajaenena keoŋ, ŋes kainakini araito nuka ekitoi, kanyam.”

¹³ Kotema EJAKAIT Edeke aberu atiar, “Anyoika nu nuiswama?” Kotema aberu atiar, “Emun kejodijodi, tape anyami.”

¹⁴ Kotema EJAKAIT Edeke emun atiar. “Kanu iswamaa ŋin, kikenokinitoi jo aitelekarit ibaren kere, ido aitelekarit nolitian kere loka ais: iliaenenei kakonikoik, inyamenenei apua apaarasia kere nuka aijarakon,

¹⁵ Ebwaikini asurup kidinikon ka aberu, ido kidiŋ aurikon ka aurike da; idecideeenenei akonikou ka jo da idecideeenenei aketitibat.”

¹⁶ Kotema ŋesi aberu atiar, “Eyatakini noi ikonican ka akonipotuunun, Kotoma ocan ŋes idoununio idwe, akoniimuit koiai neejai okilenikon, ido ŋes kiyait jo.”

¹⁷ Kotema ŋesi Adam atiar, “Naarai ibu ijo kiira eporoto loka aberukon, ainyam araito nuka ekitoi lokeeorakin jo ebe ‘Mam inyami’, ekeni alup kanukon; kotoma ailolitoikon ŋes idumunia luinyami apaarasia kere nuka aijarakon.

¹⁸ Kibwanakinete ikukwa ka isukukur: inyamenenei ikui luka ais.

¹⁹ Kotoma ainyinyir nuka akonyenekon ŋes idumunia inyamat, aitodol neibonoria alup, naarai nen ŋes kolo kilemunere; naarai irai ijo apua, ibonori da apua.”

²⁰ Komaik etuŋanan akeberu ekekiror Keba; naarai arai ŋesi toto naka luejarete kere.

²¹ Kiswamak EJAKAIT Edeke Adam ka akeberu inapen luka imukulen, kitanap kes.

²² Kobala EJAKAIT Edeke ebe, “Koany, etuluor etuŋanan bala ediopet kaoni aijen nuejok ka nueroko; aso natikwana kinye ŋesi arior akekan da adenun araito nuka ekitoi loka aijar, ka ainyam, ka aibut ikar kere”—

²³ Ŋes ejukaria EJAKAIT Edeke ŋes kina kemanikor loka Eden, akorienen alup nukelemunere ŋes.

²⁴ Kwaŋin kirenea ŋesi etuŋanan: kosodi kari nakokide naka emanikor loka Eden kibwaik Ikerubin, ka ekileŋ loimilia loibelonokin iwaitin kere, aidar erot loka ekitoi loka aijar.