Ageun 2 - Ebaibuli

¹ Kodaun aisub akuj ka akwap, ka ajoresiokee kere.

² Kapaaran nakikanyetekaarei kodaunite Edeke aisubuke nakesubi.

³ Kisireren Edeke apaaran nakikanyetekaarei, kitalau; naarai ŋipeŋin ŋes ebworaria kaisubuke kere nakesubi Edeke, nakiswamai.

⁴ Ŋol ŋes esube loka akuj, ido loka akwap naasubere. Kapaaran nakesubia EJAKAIT Edeke akwap ka akuj,

⁵ ido korina eiauna luebwanete luka ais kakwap, koroko da ebwanuna ikui luka ais; naarai mam EJAKAIT Edeke kitetepit akiru kakwap, komamei ituŋanan yenekoriei akwap.

⁶ Konye kopurionori elisina kokwap, kitapapalenenei akwap kere.

⁷ Kosub EJAKAIT Edeke etuŋanan kapua naka akwap, kokutak eiyeŋane loka aijar okumesike; koraun etuŋanan etau lokajaran.

⁸ Kiraik EJAKAIT Edeke emanikor ari nakokide, toma Eden; kibwaik nen etuŋanan lokesubi ŋesi.

⁹ Kitabwan EJAKAIT Edeke kakwap ŋolikitoi loisiyalamikinit akonyen, loejok ainyam; ekitoi loka aijar da kokidin omanikor, ka ekitoi da loka ajenun nuejok ka nueroko.

¹⁰ Kolom ecor kotoma Eden, aitapapal emanikor; ido kanen kotiakas koraunos icorin iwonon,

¹¹ Losodit ekekiror Pison; ŋol ŋes loirimorit akwap kere naka Kabila, naejai esabu.

¹² Esabu da loka akwap kaŋin ejokuna; ejai nen ebedelium ka amor nuemelomeloto.

¹³ Ecor lokiareit da ekekiror Gikon: ŋol ŋes loirimorit akwap kere naka Kus.

¹⁴ Ecor lokiwuniet da ekekiror Kidekel, ŋol ŋes loelosi kari nakokide naka Asuria; ka ecor lokiwononet ŋes Eupurat.

¹⁵ Koyana EJAKAIT Edeke etuŋanan, kibwaik ŋes toma omanikor loka Eden, akorienen ka aidar ŋes.

¹⁶ Kicorak EJAKAIT Edeke etuŋanan ebe, “Inyamenenei kwape ikotor araito nuka ŋolikitoi lokomanikor:

¹⁷ dimarai mam inyami nuka ekitoi loka ajenun nuejok ka nueroko: naarai kapaaran nainyamia ŋun itwani cut.”

¹⁸ Kobala EJAKAIT Edeke ebe, “Mam ejok etuŋanan ajakut bon; asubakini eoŋ ŋes ikenarakinan yenibusakinit.”

¹⁹ Kosodi kosubak EJAKAIT Edeke toma akwap nolitian loka ais, ka lueporitos kotoma apak; koyau kes neejai etuŋanan aanyun kwape emaanakinia ikecekiroriajido nolikiror kere lokemaikin etuŋanan ŋinibore yenikaiaran, koraun ŋol ekekiror.

²⁰ Komaanak etuŋanan ibaren kere ikiroria, ka lueporitos kapak, ka itian kere luka ais. Konye komam etuŋanan edumakina ikenarakinan yenibusakinit.

²¹ Kitojoto EJAKAIT Edeke etuŋanan ajo nuipu, kojotoor; koditu amaran adiopet, kinyakak akiriŋ toma aiboisike.

²² Kosub EJAKAIT Edeke aberu kamaran kaŋin naadituni kotunanan, koyau ŋes neejai etuŋanan.

²³ Kobala etuŋanan ebe, “Na ŋes akoit naka akoioka, Ido ŋes akiriŋ naka akiriŋika: enyarao ŋes Aberu, naarai aditunio kotunanan.”

²⁴ Ŋes inyeinia ekiliokit papake ka totoke, kiketakin neejai akeberu: koraut adiopekuan.

²⁵ Emujalalas kesi kere, etuŋanan ka akeberu, komam ileicikinito.