Ageun 19 - Ebaibuli

¹ Kodoloto imalaikan luarei Sodom eboŋ; kiboie Lot da korute loka Sodom; koany Lot kes, kolot aisiriamar; kokukum kitulurite akekonyen,

² Kotema atiar, “Koany, ikaiaka, kenainaito, kopautu togo loka ebulesitikus, koperoto aitiwalar akwap, kilotata akusikejen, kodilokis anyoun tupuruc, koloto.” Kotemasi atiar, “Mam, konye kiperi isio orot aitiwalar akwap.”

³ Kimaumau kes noi: kopaut oreke, kolomasi togoke; kipejo kes, kopeik imugatin lumam etubuunitoi, konyamata.

⁴ Konye eroko kepero, ituŋa lukore loko Sodom, idwe ka lukapolok, ituŋa kere luapote kaiboisio kere, kolukut etogo:

⁵ Kiworoto Lot kotemasi ŋes atiar, “Alubo ituŋa lualomut orekon kakuare kana? Kitolom kes nekiia isio kaiena kes.”

⁶ Koloma Lot kina neejaas kesi, kogolok ekek ekaukau.

⁷ Kotema atiar, “Keŋainaitos, ikakinacan, sirikiswamata aronis naetia nen.

⁸ Koany, kija eoŋ kadweka aarei numam ejenete ekiliokit, kenainaito, mere ketolom ŋun neijaas yesi, kiswamakis yesi kes kwape itojokitotor kakonyekus; konye ituŋa kwi mam iswamakinete akirot; naarai apotu kesi otolim loka eswika.”

⁹ Kotemasi atiar, “Irwa.” Kotemasi atiar, “Ekesa lo loabwotuni, ŋes do ekoto araun ekatubon; asa do kiswamakini jo nueroko aitelckarit nul.” Koridakis noi etuŋanan, ŋes Lot, kikunyakis apakar ekirigi.

¹⁰ Konye ituŋa kwi koriosi akaninikec, kitolomut Lot togo neajaas kesi, kogolokis ekirigi.

¹¹ Kitumudukata akonye nuka ituŋa kaluajaas okek, ludidik ka lukapolok kere; kopasa kes amoot ekek.

¹² Kotemasi ituŋa kwi Lot atiar, “Ijaas ijo kice nee? arai amuranikon, ka idwekon lusap ka lupesur, ka ice da luijaatar toma ore; kitoloma kes kotoma aibois kana.

¹³ Naarai kimudiari aibois na, naarai eyatakin noi aimonyokec kakonyen nuka EJAKAIT, ido EJAKAIT ŋes kijuku sio amudiar.”

¹⁴ Koloma Lot kinerata kimurakake, luakotosi aimany adweke, kotema atiar, “Konyout, kolomasi kaibois kana, naarai emudiari EJAKAIT ere lo.” Kosubite ŋes bala emoc kama ejaas ikamurakake.

¹⁵ Kiwala akwap kisuburikis imalaikan Lot, kobalas atiar, “Konyou, koyaŋa akoniberu, ka adwekon kere nuejaas ne; kinyek amudiario kotoma aiticanet naka ere.”

¹⁶ Konye kiyap; kitinata ituŋa akanike, ka akan naka aberuke, ka akan naka adweke aarei; kitimit EJAKAIT ŋes; kitolomut kibwaikis ŋes kina naka ere.

¹⁷ Kosodi kedaun aitolomun cut, kotema atiar, “Koker kinye atwanare; mam inoliari kaukon ido mam iyapi kotoma apuuton kere; kokeria oroŋat kinye amudiario.”

¹⁸ Kotema Lot atiar, “Okwe ekaiakait, mere kwaŋin,

¹⁹ Koany adum ekonibulesit asianut kakonyenekon, ido itopolo akoniitim nakitodik eoŋ, kitajar kenye atwanare; mam apedori akeriar oroŋat ŋol, kenyek aronis adolokin kasodi atwanare.

²⁰ Koany, ere nol ŋes loeapie akeriar, ido ŋes ere loedit; okwe kakeria nen, (mam edit?) ido eŋaleun akaijar.”

²¹ Kotema atiar, “Koany, kacamak kotoma akirot ŋin da, mam amudiari ere loibala ijo.

²² Kisunyite, kokeria nen; naarai mam apedori aisub akirot aitodol neidolio nen.” Ŋes enyaritere ere ŋol ekekiror Soar.

²³ Keniunit akoloŋ nakedolio Lot Soar.

²⁴ Kitetep EJAKAIT toma Sodom ka Gomora acukuman ka akim epote kama ejai EJAKAIT kotoma akui;

²⁵ Komudia ireria ŋul, ka Apuuton kere, ka ŋul kere lueboienenete koreria, ka iboro kere luabwanete kakwap.

²⁶ Konye konolia aberuke kau, etupit ŋes, koluor epir loka abalaŋ.

²⁷ Kodil Aburaam tupuruc kolot aibois neabwoia ŋesi kakonyen nuka EJAKAIT:

²⁸ Kosesen Sodom ka Gomora, ka akwap kere naka Apuuton, kireik, ido koany, kopuriei apuru naka akwap bala apuru naka eupa.

²⁹ Kosodi kemudia Edeke ireria luka apuuton, kiitu Edeke Aburaam, kijuka Lot anyoun kotoma oreria luaponi komudiarai, kedau amudiar ireria lueboieneneo Lot.

³⁰ Konyou Lot koSoar, kiboikin oroŋat nepepe kadweke aarei, naarai akuriana aiboikin Soar; kiboie kotoma abua, ŋes ka adweke kere.

³¹ Kotema nakiyai nadidi atiar, “Amojoŋ papawok, emamei da etuŋanan kotoma akwap loelomari mama kija oni kwape ejaar eipone loka akwap kere.

³² Aso ketamatata papawok aion, kaperoto kaŋes, kedara aur naka papawok.”

³³ Kitamatata papakec ajon akuare ŋin; koloma nakiyai kopero kapapake: mam abu kojen kwape aperio, karaida kwape anyounio.

³⁴ Kosodi kapaaran kanaatupakini kotema nakiyai nadidi atiar, “Koany, kwape abu kaperio bian kapapawok, ketamatata bobo aion akuare na da; ko loma ijo da koperoto kaŋes, kedara aur naka papawok.”

³⁵ Kitamatata bobo papakec ajon akuare ŋin, konyou nadidi, kopero kaŋes; mam abu kojen kwape aperio, karaida kwape anyounio.

³⁶ Kwaŋin abu Lot kourik adweke kere.

³⁷ Kouru nakiyai ikoku yenitelepat, komaik ekekiror Moab, nol ŋes papakec loka Imoabin kiton lolo.

³⁸ Kouru nadidi da ikoku yenitelepat komaik ekekiror Ben-ami; ŋol ŋes papa loka idwe luka Amon kiton lolo.