Ageun 18 - Ebaibuli

¹ Kitaanyikin EJAKAIT ŋes koluan luka Mamure, nakiboio kokek loka ewemake kidin paaran:

² Kiteluo akekonye kite, ido koany, ebwoete ituŋa iuni kakonyeneke. Nakeanyunia kes, koker kokek loka ewema airiamun kakes; kisudedikin kwap.

³ Kotema atiar, “Wu EkaJAKAIT, arai adumunit asianut kakonyenekon, kenaiŋait, sirikitubor ainac ekonibulesit.

⁴ Aso cabo koinun adisikipi, kilotasi akusikeje, kiyenut kotolim loka ekitoi.

⁵ Ayauni eoŋ idionyamat, kolakaros itauonokus: kosodete konyet kotuboros. Naarai idolut neejai ekusibulesit.” Kotemasi atiar, “Kiswama kwaŋin kwape ibalar.”

⁶ Kisunya Aburaam alomar owema neejai Sara, kotema atiar, “Kisunyak kitemok aitemisio auni nuka akiria nuidicic, kigurunio atap.”

⁷ Koker Aburaam osipan, koyau itaok yenejok yenirosok, koinak ekejaanakinan; kisunyak aipoore.

⁸ Koyana akinyet ka akile, ka itaok yenetemokinit, kibwaik akonyenekec; kobwo koapie kakes kotolim loka ekitoi, konyama.

⁹ Kotemasi atiar, “Ai bo ejai akoniberu Sara?” Kotema atiar, “Koany, ejai owema.”

¹⁰ Kotema atiar, “Abeit aboŋuni eoŋ neijai kedol apak; ido koany, euruuni akoniberu Sara ikoku yenitelepat.” Kiira Sara kokek loka ewema lokejai kauken,

¹¹ Ido kemoiotjito noi Aburaam ka Sara, kokokosanito ikar luipu noi: mam bobo Sara ajai kwape ejaar eipone loka aŋor.

¹² Kokieni Sara kotauke atiar, “Kadau amoion kwana, ekajakait da emoionit, eyalamikin kereka eoŋ?”

¹³ Kotema EJAKAIT Aburaam atiar, “Inyo bo etekien Sara, ebe, ‘Auruuni kereka eoŋ ikoku amojoŋit?’

¹⁴ Ejai ibore yenikaruni EJAKAIT? Aboŋuni eoŋ neijai kapaarasia kaŋun, kedolo apak, ido euruuni Sara esapat.”

¹⁵ Kosodi Sara aipeg ebe, “Mam akienit”; naarai akuriana. Kotema ŋes atiar, “Mam; konye ikienit.”

¹⁶ Konyout ituŋa kanen, kiteluosi Sodom; kinyamak Aburaam kes orot.

¹⁷ Kotema EJAKAIT atiar, “Emunonikini kereka eoŋ Aburaam nin naeswamai?

¹⁸ Naarai abeit eraun Aburaam ateker naepol nakagogon, isirerenio da atekerin kere nuka akwap kotomaken.

¹⁹ Naarai ajenu ŋes kanuka nu, tetere icorakini ikedwe ka lukokaleke luetupakinete, tetere ericito erot loka EJAKAIT, aswam abeit ka etube; tetere einuni EJAKAIT Aburaam ŋun nuabu kinerak ŋes.”

²⁰ Kotema EJAKAIT atiar, “Naarai epol noi aimony naka Sodom ka Gomora, ido naarai eroko noi adiakanaretakec;

²¹ Mere ber kejesar kaany arai eswamaata cut kwape ejaar aimony naabu kodol neajai; arai mere kwaŋin, aienuni.”

²² Kotiakas ituŋa kanen, koloto Sodom; konye koroko Aburaam ebwoi kakonyen nuka EJAKAIT.

²³ Kikunyak Aburaam kotema atiar, “Imudiari kereka ijo ikadolitok nepepe kikaronok?

²⁴ Elemuni ejaas ikadolitok akaisakany toma ore: imudiari komam itimi aibois kanuka ikadolitok akaisakany luejaas toma?

²⁵ Tiesil ijo aswam kwaŋin, aiar ikadolitok nepepe kikaronok; tiesilok ŋun; mam Ekatubon loka akwap kere iswamai nuka adolit?”

²⁶ Kotema EJAKAIT atiar, “Arai kadum koSodom ikadolitok akaisakany kotoma ore, etimi aibois kere kanukec.”

²⁷ Koboŋok Aburaam kotema atiar, “Koany, atamak eoŋ einer ka EJAKAIT, karaida karai eoŋ apua ka ekurwon:

²⁸ Elemuni emamuunete ikany kotoma ikadolitok akaisakany; imudiari ere kere naarai amamuut ikany?” Kotema atiar, “Mam amudiari, arai kadum kanen akaisaoŋon ka lukany.”

²⁹ Kinera kaŋes bobo atiar, “Elemuni etakanunete akaisaoŋon.” Kotema atiar, “Mam eswamai kwaŋin kanuka nul akaisaoŋon.”

³⁰ Kotema atiar, “Kenainait, wu EJAKAIT, sirikinyunyurikin, mere kener bobo: elemuni kotakanut akaisauni kanen.” Kotema atiar, “Mam eswamai kwaŋin arai kadum akaisauni.”

³¹ Kotema atiar, “Koany, atamak eoŋ einer ka EJAKAIT: elemuni kotakanut akaisaarei kanen.” Kotema atiar, “Mam amudiari kanuka ŋul akaisaarei.”

³² Kotema atiar, “Kenainait, EJAKAIT, sirikinyunyurikin, mere kener bobo irwan na bon: elemuni kotakanut itomon.” Kotema atiar, “Mam amudiari kanuka nul itomon.”

³³ Kolot EJAKAIT, napekedaunia ŋesi einer ka Aburaam: kobono Aburaam aiboisike.