Ageun 1 - Ebaibuli

¹ Kotoma ageunet abu Edeke kosub akuj ka akwap.

² Ido ajai akwap atai, komam etiakak; kojai amuton kokuju kaidules; kintkum emoyo loka Edeke kuju akipi.

³ Kobala Edeke ebe, “Kojau aica”; kosodi aica ajaun.

⁴ Koany Edeke aica ebe ejokuna; kotiak Edeke aica ka amuton.

⁵ Komaik Edeke aica Apaaran, ka amuton da komaik Akuar. Kojau atiboŋ kojau da atupuruc, ŋin ŋes apaaran nasodit.

⁶ Kobala Edeke ebe, “Kojau apak kidiŋ kakipi, kotiakite akipi ka akipi.”

⁷ Kosub Edeke apak, kotiak akipi nuajaas kwap kapak, ka akipi nuajaas kuju kapak: kojau kwaŋin.

⁸ Komaik Edeke apak Akuj. Kojau atiboŋ kojau da atupuruc, ŋin ŋes apaaran nakiareit.

⁹ Kobala Edeke ebe, “Kotukonokinos akip nuejaas kwap kakuj aibois adiopet, kotakan neconit.” Kojau kwaŋin.

¹⁰ Komaik Edeke neconit Akwap: ka atukon nuka akipi da komaik Aŋololin: koany Edeke ebe ejokuka.

¹¹ Kobala Edeke ebe, “Kobwaŋ akwap anya, koraata ikui icok, kora ekitoi loka araito araito koponeke, nuejaas icokokec, kotoma akwap.” Kojaas kwaŋin.

¹² Kobwaŋ akwap anya, koraata ikui icok koponekec, ka ekitoi da loerai araito nuejaas icokokec, kotoma oponeke. Koany Edeke ebe ejokuka.

¹³ Kojau atiboŋ kojau da atupuruc, ŋin ŋes apaaran nakiwuniet.

¹⁴ Kobala Edeke ebe, “Kojaut luecaete kapak naka akuj aitiak apaaran ka akuar: koraut kesi aanyuneta, kanuka apakio, ido kanuka apaarasia, ka ikar:

¹⁵ Kojaas kesi kanuka aica toma apak naka akuj, acaanakin akwap.” Kojau kwaŋin.

¹⁶ Kosub Edeke luecaete iarei luepolok; aica naepol adepar ayait apaaran, ka aica naepol ayait akuar; kosub aacer da.

¹⁷ Kibwaik Edeke kes apak naka akuj acaanakin akwap,

¹⁸ ayait da apaaran ka akuar, ido aitiak aica ka amuton: koany Edeke ebe ejokuka.

¹⁹ Kojau atiboŋ kojau da atupuruc, ŋin ŋes apaaran nakiwoŋonet.

²⁰ Kobala Edeke ebe, “Kilweka akip lueliatos luipu luejaas aijar, ido koporitos akweny kokuju kakwap toma apak naka akuj.”

²¹ Kosub Edeke itiaŋ lueiliilete luka aŋololin, ka iboro kere lukajarak luelosete, lukilwekete akip, koponesiokec, ka ŋinibore kere yeneporitoi yeneja abebenoka koponeke; koany Edeke ebe ejokuka.

²² Kisirereŋ Edeke kes, kotema atiar, “Kouriaros, kipuaros, kilelebunos akipi nuejaas toma aŋololin, kipuaros da lueporitos kakwap.”

²³ Kojau atiboŋ kojau da atupuruc, ŋin ŋes apaaran nakikanyet.

²⁴ Kobala Edeke ebe, “Kilwek akwap ŋinibore yenejai aijar kotoma oponeke, ibaren, ka yeneliat, ka etiaŋ loka akwap koponeke.” Kojau kwaŋin.

²⁵ Kosub Edeke etiaŋ loka akwap koponeke, ka ibaren koponekec, ka ŋinibore yeneliat kakwap koponeke: koany Edeke ebe ejokuka.

²⁶ Kobala Edeke ebe, “Kasubutu ituŋanan kotoma aputowok, asimawok: kainakis kes ayait lukecor, ka akweny nuka apak, ka ibaren, ka akwap kere, ka ŋinibore kere yeneliat kakwap.”

²⁷ Kosub Edeke ituŋanan kaputoke, kaputo naka Edeke ŋes asubunia; kosub kes yenikiliokit ka yeniberu.

²⁸ Kisirereŋ Edeke kes: kotema Edeke kes atiar, “Kouriaros kipuaros, kilelebunos akwap, kiruma; koyaitos lukecor, ka akweny nuka apak, ka ŋinibore kere yenejari yeneliat kakwap.”

²⁹ Kobala Edeke ebe, “Koany, kainakis ikui kere lueraete icok luejaas akwap kere, ka ŋolikitoi loejaas araito nuka ekitoi loerai icok, araun inyamat kamakus:

³⁰ Ka ŋolitiaŋ kere loka akwap, ka akweny kere nuka apak, ka yeneliat kere kotoma akwap yenejai apuru naka aijar, ainakinit kes ikui kere luelibete araun inyamat.” Kojau kwaŋin.

³¹ Koany Edeke ninibore kere yenikesubi, ido koany, ejokuna noi. Koiau atiboŋ kojau da atupurue, ŋin ŋes apaaran nakikanyetekape.