2 Timoti 1 - Ebaibuli

¹ Paul ekiyakia loka Kristo Yesu kanuka akot naka Edeke, kwape ejaar aisumunet naka aijar naejai toma Kristo Yesu,

² Mama ejai Timoteo ikakoku yeniminat: Asianut, aitim, ka ainapakin nuepote kama ejai Edeke Papa ka Kristo Yesu Ejakaitiwok.

³ Emalai eoŋ Edeke loejaanakini ameun ka lukapapaaka kaomisio nuelaete, nakeitununio jo komam apali kotoma ailipika, akuare ka apaaran,

⁴ Emuit aanyun jo, naeitunio akonikiyo, tetere ilelebun aiyalamakaŋ.

⁵ Nakesiitunere aiyuun namam esoswai naejai kotomakon, naageuni aiboi kotoma tataakon Lois, ka totokon Eunike; ido etogogoŋit ebe ejai kotomakon da,

⁶ Kanuka ŋun ŋes kesiitunio jo aitunyonokin ainakinet naka Edeke naejai kotomakon, kanuka aidokokinio akaninika,

⁷ Naarai mam Edeke abu koinak oni emoyo loka akurian, dimarai loka apedor ka loka amin, ka loka aiyapaarit da.

⁸ Aso kinyeis ileic airum jo kanuka aitejenun naka Ejakaitiwok, karaida kanukaŋ, eenatake, konye kiticaneneno nepepe kAkiro Nukajokak, kwape ejaar apedor naka Edeke,

⁹ loabu kitajar oni, konyarau da anyarit nakalaunan, mere kwape ejaatar aswamisiowok, dimarai kwape ejaar alosikiniteke elopet ka asianut, naabu koinak oni kotoma Kristo Yesu eriŋa apakio nuka ikar,

¹⁰ konye kwana etakanun asianut ŋin kanuka aitodikinio naka Eketajaraniwok Kristo Yesu, loabu kitapalau atwanare, kitacau da aijar ka amamus aibos kanuka Akiro Nukajokak,

¹¹ nukadakakinere eoŋ araun ekalimonokinan, ka ekiyakia, ka ekesisianakinan da.

¹² Kanuka ŋun da ŋes ariebar kwaŋin. Konye mam kerumito ileic, naarai ajeni loabu keyuu, ido etogogoŋi ebe epedori ŋesi aidarenen nuketitiŋitai kiton apaaran ŋin.

¹³ Kojau kaanyunet naka akiro nuka aijar nuibu kopup kamakaŋ, kotoma aiyuun ka amin naejai toma Kristo Yesu,

¹⁴ Kidarenenei ibore yenejok yenikititiŋitai kanuka Emoyo Lokalaunan loiboie kotomawok.

¹⁵ Ijeni ijo na ebe, kere luejaas toma Asia apotu kebonokis ipuran, kotomakec ejai Pugelo, ka Keremogene,

¹⁶ Kitim Ejakait eka! loka Onesiporo, naarai abu kesiyenu eoŋ irwan ipu, kwabo mam apotu ileic kiruma ŋes kanuka erikotoka.

¹⁷ Konye nakejaar Rome, kinyikok amoot eoŋ, kadum da—

¹⁸ koinak Ejakait ŋes adumun aitimio kama ka Ejakait kapaaran kaŋin-ido kaijaanakin kere naabu kijaanak ko Epeso, ijeni ijo noi jokan.